ໃນວັນທີ 21 ເມສາ 2017 ຜ່ານມາ ກະຊວງກະສິກຳ ແລະປ່າໄມ້ ໄດ້ເປີດກອງປະຊຸມ ກະສິກຳສະອາດ ຕິດພັນກັບຂະແໜງການປູູກຝັງ ປະຈຳປີ 2016 ຢູ່ນະຄອນຫຼວງວຽງຈັນ ເຊິ່ງທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ກະຊວງກະສິກຳ ແລະ ປ່າໄມ້ ໄດ້ກ່າວວ່າ: ປັດຈຸບັນ ການຜະລິດກະສິກຳອິນຊີ ທີ່ເຂົ້າໃນລະບົບມາດຕະຖານ ໄດ້ຂະຫຍາຍອອກ 8 ແຂວງ ມີນະຄອນຫລວງວຽງຈັນ, ວຽງຈັນ, ຫລວງພະບາງ, ຊຽງຂວາງ, ອຸດົມໄຊ, ສະຫວັນນະເຂດ, ຈຳປາສັກ ແລະ ແຂວງໄຊຍະບູລີ ມີກຸ່ມຜູ້ຜະລິດ ແລະ ປະກອບການ ທີ່ໄດ້ຮັບໃບຢັ້ງຢືນ ຈາກກົມປູກຝັງທັງໝົດ 39 ຫົວໜ່ວຍ ລວມມີ 2 ສູນກະສິກຳ, 14 ບໍລິສັດ, 22 ກຸ່ມໃຫຍ່ 84 ກຸ່ມຍ່ອຍ ແລະ 1 ກອງຜະລິດ ຂອງກົມໃຫຍ່ພະລາທິການກອງທັບ, ລວມມີຊາວກະສິກອນ 2.780 ກວ່າຄອບຄົວ, ກວມເອົາເນື້ອທີ 7.980 ກວ່າເຮັກຕາ, ຜົນຜະລິດທີ່ໄດ້ຮັບການຢັ້ງຢືນ ລວມທັງໝົດ 3.370 ກວ່າໂຕນ/ປີ
ໃນນັ້ນ ບັນດາບໍລິສັດທີ່ໄດ້ ໃບຢັ້ງຢືນສົ່ງອອກ ຜະລິດຕະພັນອິນຊີເຊັ່ນ: ບໍລິສັດ ຜະລິດຕະພັນລາວ ຂາອອກ-ຂາເຂົ້າ ຈຳກັດ, ຜະລິດຕະພັນເຂົ້າອິນຊີ ທີ່ເມືອງສັງທອງ, ຄຣັບກຣິນ ຈຳກັດ ຜະລິດກາເຟຢູ່ ເມືອງປາກຊ່ອງ, ເຮີລີເທດ ໂກຣເວີ ຈຳປາສັກ ອິມພອດ-ເອກສປອດ ຈຳກັດ ຜະລິດໝາກມ່ວງຫິມະພານ ທີ່ ແຂວງຈຳປາສັກ, ບໍລິສັດປູກມອນ-ລ້ຽງມອນ ແລະ ສາວໄໝ ຈຳກັດ ຢູ່ ແຂວງຊຽງຂວາງ, ບໍລິສັດ ແຊຟຣອນຈຳກັດ ສົ່ງເສີມເກັບຊື້ ແລະ ປຸງແຕ່ງກາເຟອິນຊີ ເພື່ອການສົ່ງອອກ ຢູ່ແຂວງຫລວງພະບາງ, ບໍລິສັດ ຊາຈຳປາຄຳລາວ ຈຳກັດຜູ້ດຽວ ດຳເນີນກິດຈະການສົ່ງເສີມ, ເກັບຊື້ ແລະ ປຸງແຕ່ງຊາອິນຊີ ຢູ່ ເມືອງໄຊສະຖານ ແຂວງໄຊຍະບູລີ.
ດ້ານການສົ່ງເສີມ ການຕະຫລາດ ກົມປູກຝັງໄດ້ສົ່ງເສີມ ແລະ ພັດທະນາ ຕະຫລາດກະສິກຳອິນຊີ ຂອງກຸ່ມຊາວກະສິກອນ ໃນບາງແຂວງເຊັ່ນ: ນະຄອນຫລວງວຽງຈັນ, ຊຽງຂວາງ, ຫລວງພະບາງ ແລະ ແຂວງສະຫວັນນະເຂດ. ພ້ອມນີ້, ຍັງໄດ້ຈັດວາງສະແດງສິນຄ້າ ກະສິກຳອິນຊີ ກໍຄື ໂຄສະນາເຜີຍແຜ່ ຜ່ານສື່ປະເພດຕ່າງໆ ເພື່ອອຳນວຍຄວາມສະດວກ ໃນການເຂົ້າເຖິງຕະຫລາດ ກະສິກຳອິນຊີ ທັງພາຍໃນ ແລະ ຕ່າງປະເທດ.
ແຫຼ່ງຂ່າວ: ສຳນັກຂ່າວສານປະເທດລາວ