ເວັບໄຊຂ່າວ ມະຕິຊົນ ອອນໄລນ໌ ນຳສະເໜີຂ່າວເມື່ອວັນທີ 20 ເມສາ 2017 ນີ້ວ່າ ທ່ານ ໄມຄ໌ ເພນຊ໌ ຮອງປະທານາທິບໍດີສະຫະລັດອາເມລິກາ ທີ່ຢູ່ໃນລະຫວ່າງການເດີນທາງຢຽມຢາມອິນໂດເນເຊຍ ເປີດເຜີຍເມື່ອວັນທີ 20 ເມສາ 2017 ນີ້ວ່າ ປະທານາທິບໍດີ ໂດນັລ ທຣັມ ຂອງສະຫະລັດ ຈະເຂົ້າຮ່ວມການປະຊຸມສຸດຍອດຜູ້ນຳສຳຄັນຫຼາຍເວທີໃນອາຊີ ໃນເດືອນພະຈິກນີ້ ນັບເປັນສັນຍານທີ່ສະແດງໃຫ້ເຫັນເຖິງພັນທະທີ່ແໜ້ນແຟ້ນບໍ່ສັ່ນຄອນທີ່ສະຫະລັດມີຕໍ່ຊາດພັນທະມິດໃນພາກພື້ນນີ້
ທ່ານ ເພນຊ໌ ເປີດເຜີຍວ່າ ປະທານາທິບໍດີສະຫະລັດ ຈະເດີນທາງເຂົ້າຮ່ວມປະຊຸມສຸດຍອດຜູ້ນຳສະຫະລັດ-ອ່ຊຽນ ແລະ ສຸດຍອດຜູ້ນຳສະຫະລັດ-ອາຊີຕະເວັນອອກທີ່ຟິລິບປິນ ແລະ ການປະຊຸມກຸ່ມການຮ່ວມມືທາງເສດຖະກິດອາຊີ-ແປຊີຟິກ (ເອເປກ) ທີ່ປະເທດຫວຽດນາມເຊິ່ງມີກຳນົດຈະຈັດຂຶ້ນໃນເດືອນພະຈິກ
ຂ່າວລະບຸວ່າ ອະດີດປະທານາທິບໍດີ ບາຣັກ ໂອບາມາຂອງສະຫະລັດ ຖືເປັນແຂກປະຈຳຂອງພາກພື້ນອາຊີ-ແປຊີຟິກ ຈາກການໜູນນະໂຍບາຍຕ່າງປະເທດຄື “ຫັນໜ້າຫາອາຊີ” ທີ່ມຸ່ງເປົ້າໃຫ້ຄວາມສຳຄັນກັນພາກພື້ນນີ້ເພື່ອຖ່ວງດູນອຳນາດ ແລະ ອິດທິພົນຂອງຈີນທີ່ແຜ່ຂະຫຍາຍຢ່າງໄວວາ
ທັງນີ້ ການຕັດສິນໃຈເດີນທາງເຂົ້າຮ່ວມການປະຊຸມຕ່າງໆ ດັ່ງກ່າວຖືເປັນເລືອງໜ້າປະຫຼາດໃຈສຳລັບຫຼາຍຝ່າຍ ຈາກການທີ່ ທຣັມ ໜູນນະໂຍບາຍ “ອາເມລິກາຕ້ອງມາກ່ອນ” ແລະ ການຕັດສິນໃຈໂຍນຄວາມຕົກລົງຫຸ້ນສ່ວນເສດຖະກິດພາກພື້ນແປຊີຟິກ (ທີພີພີ) ເຊິ່ງຖືເປັນເສົາຫຼັກສຳຄັນທາງເສດຖະກິດໃນນະໂຍບາຍຫັນຫາອາຊີຂອງໂອບາມາຖິ້ມໄປ.