ເມື່ອວັນທີ 18 ເມສາ 2017 ເວັບໄຊຂ່າວສົດ ແລະ ເອເອຟພີລາຍງານຄວາມຄືບໜ້າຂອງສະຖານະການຕຶງຄຽດໃນມະຫາສະໝຸດເກົາຫຼີເໜືອ ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ຮຽກຮ້ອງໃຫ້ທຸກຝ່າຍຮ່ວມກັນຫາທາງອອກຢ່າງສັນຕິວິທີ ຫຼັງການຫາລືກັບ ທ່ານ ໄມຕ໌ ເພນຊ໌ ຮອງປະທານາທິບໍດີ ສະຫະລັດອາເມລິກາ ທີ່ນະຄອນຫຼວງ ໂຕກຽວ ປະເທດ ຍີ່ປຸ່ນ ເຊິ່ງໄດ້ເຕືອນເກົາຫຼີເໜືອວ່າບໍ່ຄວນທົດສອບຄວາມອົດທົນຂອງປະທານາທິບໍດີສະຫະລັດອາເມລິກາ “ໂດນັລ ທຣັມ” ໂດຍໄດ້ຢືນຢັນວ່າທາງສະຫະລັດຍັງບໍ່ໄດ້ຕັດທາງເລືອກໃດອອກໄປຮວມເຖິງການແຊກແຊງທາງທະຫານ ສ່ວນຈີນລະບຸວ່າ ຍິນດີສະໜັບສະໜູນໃຫ້ມີການເຈລະຈາເກີດເປັນຮູບປະທຳ ຂະນະທີ່ເກົາຫຼີເໜືອຢືນຢັນວ່າ  ຈະບໍ່ຢຸດຕິການພັດທະນາອາວຸດນິວເຄຣຍ ແລະ ຈະເພີ່ມຄວາມຖີ່ໃນການທົດສອບຂີປະນາວຸດຂ້າມທະວີບ ຫຼື ໄອຊີບີເອັມ ເປັນຕໍ່ອາທິດ, ຕໍ່ເດືອນ ແລະ  ຕໍ່ປີ ພ້ອມຂູ່ວ່າຫາກສະຫະລັດຕັດສິນໃຈໃຊ້ກຳລັງທະຫານ ເກົາຫຼີເໜືອຈະຕອບໂຕ້ດ້ວຍອາວຸດນິວເຄຣຍແບບເຕັມອັດຕາເສິກ

ທ່ານ ຮັນ ຊອງເຣຍ ຜູ້ຊ່ວຍລັດຖະມົນຕີກະຊວງການຕ່າງປະເທດເກົາຫຼີເໜືອ ກ່າວວ່າ ຫາກສະຫະລັດໃຊ້ກຳລັງທະຫານກັບເກົາຫຼີເໜືອກໍ່ຈະນຳໄປສູ່ສົງຄາມເຕັມຮູບແບບ ແລະ ເກົາຫຼີເໜືອຈະພັດທະນາອາວຸດນິວເຄຣຍຕໍ່ໄປ ເພາະອາວຸດນິວເຄຣຍຈະສາມາດຄຸ້ມເກົາຫຼີເໜືອຈາກສະຫະລັດໄດ້,​ ຂະນະທີ່ທ່ານ ຄິມ ອິນ ຮະຍອງ ເອກອັກຄະຣາຊາທູດເກົາຫຼີເໜືອປະຈຳສະຫະປະຊາຊາດ ຫຼື ຢູເອັນ ລະບຸວ່າ ເກົາຫຼີເໜືອມີຄວາມພ້ອມໃນການເຮັດສົງຄາມທຸກຮູບແບບກັບສະຫະລັດຢ່າງສົມນ້ຳສົມເນື້ອ

ດ້ານທ່ານ ເພນຊ໌ ກ່າວວ່າ ສະຫະລັດມີກຳລັງທະຫານ 28,500 ນາຍ ຢູ່ໃນເກົາຫຼີໃຕ້ ແລະ ຈະທຳລາຍລ້າງທຸກການໂຈມຕີຂອງເກົາຫຼີເໜືອ ບໍ່ວ່າຈະເປັນອາວຸດສົງຄາມທົ່ວໄປ ຫຼື ອາວຸດນິວເຄຣຍ ໂດຍສະຫະລັດຈະຕອບໂຕ້ເກົາຫຼີເໜືອດ້ວຍແສນຍານຸພາບທີ່ເໜືອກວ່າຢ່າງແນ່ນອນ ນອກຈານີ້ ທ່ານ ເພນຊ໌ ຍັງປະກາດວ່າ ກົນລະຍຸດການໃຊ້ຄວາມອົດທົນຂອງສະຫະລັດຕໍ່ເກົາຫຼີເໜືອທີ່ໃຊ້ມາດົນກວ່າ 20 ປີ ນັ້ນສິ້ນສຸດລົງແລ້ວ ແລະ ສະຫະລັດມີຄວາມໝັ້ນໃຈວ່າຈີນຈະດຳເນີນການຈັດການກັບເກົາຫຼີເໜືອໄດ້ ແຕ່ຫາກຈີນບໍ່ສາມາດເຮັດໄດ້ ສະຫະລັດຈະດຳເນີນການຈັດການເອງ ຕາມທີ່ປະທານາທິບໍດີ ໂດນັລ ທຣັມ ລະບຸໄວ້ກ່ອນໜ້ານີ້.