ສຳນັກຂ່າວເອພີລາຍງານຈາກເມືອງ ຊິຄາໂກ ປະເທດສະຫະລັດ ອາເມລິກາ ເມື່ອວັນທີ10 ເມສາ 2017 ວ່າ ພາບບັນທຶກວິດີໂອສະແດງໃຫ້ເຫັນເຈົ້າໜ້າທີ່ຮັກສາຄວາມປອດໄພ 3 ຄົນ ຂອງສະໜາມບິນ ໂອແຮ ເມືອງ ຊິຄາໂກ ລັດອິລລິນອຍສ໌ ລາກດຶງຜູ້ໂດຍສານຊາຍຄົນໜຶ່ງ ລົງຈາກທ້ຽວບິນ 3411 ສາຍການບິນ ຢູໄນເຕັດ ແອຣໄລນ ທີ່ກຳ ລັງຈະອອກເດີນທາງໄປເມືອງ ຫລຸຍສະວິລ ລັດເຄນທັດກີ ເມື່ອແລງວັນອາທິດທີ່ຜ່ານມາ

ເຫດເກີດຂຶ້ນເມື່ອຫຼັງຈາກຜູ້ໂດຍສານຂຶ້ນເຄື່ອງບິນໝົດແລ້ວ ພະນັກງານຕ້ອນຮັບເທິງເຮືອບິນຂອງຢູໄນເຕັດ ປະກາດຕໍ່ທຸກຄົນວ່າ ຕ້ອງການໃຫ້ຜູ້ໂດຍສານ 4 ຄົນສະໝັກໃຈສະຫຼະບ່ອນນັ່ງ ໃຫ້ພະນັກງານສຳຮອງຂອງຢູໄນເຕັດ ທີ່ຈຳເປັນຕ້ອງເດີນທາງໄປເມືອງຫລຸຍສະວິລໃນວັນຈັນ ເພື່ອທຳການບິນໃນອີກທ້ຽວບິນໜຶ່ງ ແລະ ເຮືອບິນຈະບໍ່ອອກເດີນທາງຈົນກວ່າພະນັກງານສຳຮອງຂອງບໍລິສັດຈະມີບ່ອນນັ່ງ

ທ່ານ ຊາລີ ໂຮບາຣ ໂຄສົກຂອງຢູໄນເຕັດແອໄລນ ກ່າວວ່າ ພະນັກງານຢູໄນເຕັດປະກາດລາຍຊື່ລູກຄ້າ 4 ຄົນທີ່ຈະຕ້ອງລົງຈາກເຄື່ອງ ແລະ 3 ຄົນກໍ່ຍອມປະຕິບັດຕາມໂດຍດີ ມີພຽງ 1 ຄົນ ປະຕິເສດ ຈິ່ງໄດ້ຮຽກເຈົ້າໜ້າທີ່ຮັກສາຄວາມປອດໄພຂອງສະໜາມບິນຂຶ້ນມາ “ເຮົາປະຕິບັດຕາມຂະບວນການທີ່ຖືກຕ້ອງແລ້ວ” ໂຮບາຣ ໄດ້ເຜີຍຕໍ່ສຳນັກຂ່າວເອພີທາງໂທລະສັບ “ເຮືອບີນຕ້ອງອອກເດີນທາງ ເຮົາຕ້ອງການນຳພາລູກຄ້າຂອງເຮົາໄປສູ່ຈຸດໝາຍ ແຕ່ເມື່ອສຸພາບບູລຸດທ່ານໜຶ່ງບໍ່ຍອມລົງຈາກເຄື່ອງ ເຮົາຈະເປັນຕ້ອງຮຽກສຳນັກງານຕຳຫຼວດຊິຄາໂກ”