ວັນທີ 3 ເມສາ 2017 ທີ່ສະໂມສອນບ້ານຄອຍເມືອງຫຼວງພະບາງ ໄດ້ຈັດພິທີຝຶກແອບນາງສາວ ແລະ ຊ້ອມຍ່າງເພື່ອເຂົ້າໃນງານປະກວດສັງຂານປະຈໍາປີ 2017 ໂດຍການເປັນປະທານຂອງທ່ານ ນາງ ອິນທະວອນ ພົມມະຈັນ ຮອງເຈົ້າເມືອງຫຼວງພະບາງ,ຜູ້ຊີ້ນໍາວຽກງານວັດຖະນະທໍາ-ສັງຄົມ,ທັງເປັນປະທານຮັບຜິດຊອບກອງປະກວດນາງສັງຂານປະຈໍາປີ 2017,ມີສະຫະພັນຍິງເມືອງຫຼວງພະບາງ,ຜູ້ຮັບຜິດຊອບກອງປະກວດດບັນດາຜູ້ປົກຄອງນາງສາວເຂົ້າປະກວດ ພ້ອມດ້ວຍນາງສາວເຂົ້າປະກວດທັງໝົດ 30 ນ້ອງ ແລະ ນ້ອງນາຍແບບ ຫຼື ສະມາດບອຍ ເຂົ້າຮ່ວມ.
ທ່ານ ນາງ ອິນທະວອນ ພົມມະຈັນ ຮອງເຈົ້າເມືອງຫຼວງພະບາງ,ຜູ້ຊີ້ນໍາວຽກງານວັດຖະນະທໍາ-ສັງຄົມ, ທັງເປັນປະ ທານຮັບຜິດຊອບກອງປະກວດນາງສັງຂານປະຈໍາປີ 2017 ໄດ້ໃຫ້ສໍາພາດວ່າ: ຜ່ານການຄັດເລືອກ ແລະ ຝຶກແອບມານີ້ໄດ້ 6 ວັນ,ທາງຄະນະຮັບຜິດຊອບກອງປະກວດໄດ້ຄັດເລືອກເອົານ້ອງນາງສາວ ທີ່ມາຈາກສະຖາບັນການສຶກສາ ແລະ ພາກສ່ວນຕ່າງໆ ອ້ອມເທດສະບານເມືອງຫຼວງພະບາງ ເຊິ່ງມີຜູ້ເຂົ້າມາຄັດເລືອກທັງໝົດ 70 ກວ່ານ້ອງ,ໃນນັ້ນກອງປະກວດໄດ້ຄັດເລືອກເອົາ 30 ນ້ອງ,ເປັນຜູ້ທີ່ມີມາດຖານ,ມີຄວາມງາມ,ມີຄວາມພ້ອມ ແລະ ໃນບັນດາ 30 ນ້ອງນີ້ຈະໄດ້ເປັນຕົວແທນໃຫ້ແກ່ເອື້ອຍນ້ອງແມ່ຍິງໃນທົ່ວເມືອງຫຼວງພະບາງ ເຂົ້າມາຄັດ ເພື່ອຝຶກຊ້ອມ ຂື້ນປະກວດເອົານາງສັງຂານປະຈໍາປີ 2017 ໃນ 2 ຄໍ່າຄືນ ຄື: ວັນທີ່ 11 – 12 ເມສາ ນີ້.ສະນັ້ນ ເພື່ອເຮັດໃຫ້ຈໍານວນ 30 ນ້ອງທີ່ເຂົ້າມາຝຶກຊ້ອມນີ້ໃຫ້ມີຄວາມພ້ອມ,ມີມາດຖານເງື່ອນໄຂທຸກໆນ້ອງ ແລະ ມີຄວາມພາກພູມໃຈທີ່ເປັນຕົວແທນໃຫ້ແກ່ເອື້ອຍນ້ອງແມ່ຍິງໃນທົ່ວເມືອງຫຼວງພະບາງ ໃນນີ້ໄດ້ຝຶກແອບການຟ້ອນລໍາວົງລາວ,ມາລະຍາດໃນການປາກເວົ້າຫຼື ມາລະຍາດໃນການຍ່າງ,ການວາງທ່າ,ການວາງມື ລວມໄປເຖິງກິລິຍາມາລະຍາດຄະນົບທໍານຽມຕາມແບບຊາວຫຼວງພະບາງ..ທ່ານ ຍັງໃຫ້ຮູ້ຕື່ມວ່າ: ກິດຈະກໍາໃນການປະກວດຄືນທີ່ 1 ແມ່ນຈະໄດ້ໃຫ້ທັງໝົດ 30 ນ້ອງ ນຸ່ງເຄື່ອງໃນຊຸດສີ້ນໄໝ-ເສື້ອໄໝ,ຊຸດອອກງານເດີນໂຊເທິງເວທີ 3 ຮອບ, ເພື່ອກໍາມະການຈະໄດ້ໃຫ້ຄະ ແນນ,ຫຼັງຈາກນັ້ນຈະມີການສະແດງສິລະປະຂອງພາກສ່ວນຕ່າງໆທີ່ໄດ້ກະກຽມ ແລະ ພິເສດປີນີ້ໃນຄືນທີ່ 1 ນີ້ ນາງສາວ 30 ນ້ອງຈະໄດ້ນຸ່ງຊຸດຊົນເຜົ່າທີ່ເປັນເອກະລັກສະເພາະໃນແຂວງຫຼວງພະບາງຮ່ວມເດີນໂຊກັບຊາຍແບບ ໃຫ້ມວນຊົນໄດ້ຊົມ.ສ່ວນໃນຄືນທີ່ 2 ເປັນຄືນສຸດທ້າຍຂອງການປະກວດ 30 ນາງສາວຈະໄດ້ ໃສ່ ຊຸດສາລະບັບຄືກັນໝົດ ຂື້ນເດີນໂຊເພື່ອໃຫ້ກໍາມະການໃຫ້ຄະແນນ,ຫຼັງຈາກນັ້ນຈະມີຊາຍແບບຈໍານວນ 10 ນ້ອງ ມາຟ້ອນລໍາວົງຮ່ວມກັບຜູ້ເຂົ້າປະກວດນາງສັງຂານ,ທ່ານ ຍັງໄດ້ເຊີນຊວນພໍ່ແມ່ປະຊາຊົນ,ມວນຊົນທັງຫຼາຍ ເຂົ້າມາຮ່ວມຊົມຮ່ວມເຊຍໃນງານປະກວດນາງສັງຂານປະຈໍາປີ 2017 ໃຫ້ມີບັນຍາກາດຟົດຟື້ນມ່ວນຊື້ນ ພ້ອມທັງຊ່ວຍໂວດໃຫ້ກໍາລັງໃຈແກ່ນ້ອງນາງສາວທັງໝົດ 30 ນ້ອງ ຢູທີ່ ເດີ່ນທາດຫຼວງ ເມືອງຫຼວງພະບາງ ໃນຄໍ່າຄືນວັນທີ່ 11-12 ເມສາ 2017ນີ້.
ຂ່າວຈາກ: ເພັດສາຄອນ ສິມມະວົງ