ສຳນັກງານເອເອຟພີລາຍງານຈາກປະເທດສິງກະໂປ ເມື່ອວັນທີ 4 ເມສາ 2017 ວ່າ ຄວາມບໍ່ໝັ້ນຄົງ ແລະ ການຮົ່ວໄຫຼຢ່າງງ່າຍດາຍຂອງອາວຸດ ເຮັດໃຫ້ໝູ່ເກາະມິນດາເນົາ ແລະ ເກາະອື່ນໆ ທີ່ຢູ່ໃກ້ຄຽງ ທາງພາກໃຕ້ຂອງຟິລິບປິນ ກາຍເປັນທີ່ໝາຍຕາຂອງກຸ່ມຫົວຮຸນແຮງ ທ່ານ ໂຣຮານ ກູນາຣັດນາ ນັກວິເຄາະຕໍ່ຕ້ານການກໍ່ການຮ້າຍ ກ່າວຕໍ່ທີ່ປະຊຸມວ່າດ້ວຍຄວາມໝັ້ນຄົງແຫ່ງພາກພື້ນ “ມິລິໂພລ” ທີ່ສິງຂະໂປ ເມື່ອວັນອັງຄານວ່າ ຂະນະນີ້ກຸ່ມໄອເອສກຽມກໍ່ຕັ້ງດິນແດນອານາເຂດ ທາງພາກໃຕ້ຂອງຟິລິບປິນ.

ການສື່ສານຫຼ້າສຸດຊີ້ໃຫ້ເຫັນວ່າ ກຸ່ມໄອເອສໄດ້ປະກາດຢ່າງເປັນທາງການວ່າ ໄດ້ກໍ່ຕັ້ງໜ່ວຍອາຊີຕະເວັນອອກຂອງໄອເອສ ໃນພາກໃຕ້ຂອງຟິລິບປິນ ການຄາດເດົາຂອງເຮົາໃນປີ 2017 ຄືໄພຄຸກຄາມໃນພາກພື້ນນີ້ຈະຂະຫຍາຍຕົວ ເພາະການກໍ່ຕັ້ງແກນກາງຂອງໄອເອສ ໃນພາກໃຕ້ຂອງ ຟິລິບປິນ “ທ່ານ ກູນາຣັດນາ ” ກ່າວ

ສ່ວນທ່ານ ເຄ. ຊານມູກັມ ລັດຖະມົນຕີກະຊວງປ້ອງກັນປະເທດສິງກະໂປກ່າວວ່າ ພາກໃຕ້ຟິລິບປິນກຳລັງກາຍເປັນພື້ນທີ່ຍາກຕໍ່ການຄວບຄຸມ ເຖິງແມ່ນວ່າລັດຖະບານມະນິລາ ຈະໃຊ້ຄວາມພະຍາຍາມຢ່າງເຖິງທີ່ສຸດ “ດັ່ງນັ້ນພື້ນທີ່ນີ້ຈິ່ງກາຍເປັນແຫຼ່ງຫຼົບຊ້ອນທີ່ປອດໄພ ສຳລັບນັກຮົບທີ່ເດີນທາງກັບຈາກຕະເວັນອອກກາງ”