ສຳນັກຂ່າວສານປະເທດລາວ ລາຍງານເມື່ອວັນທີ 4 ເມສາ 2017 ນີ້ວ່າ ເຈົ້າໜ້າທີ່ໂຄງການເສັ້ນທາງລົດໄຟລາວ-ຈີນໄດ້ເຄັ່ງຮ້ອນບຸກເບີກແລວເສັ້ນທາງ ແລະ ຂຸດເຈາະອຸບມົງລອດພື້ນລົດໄຟຫ້າວຫັນເພື່ອຮັບປະກັນເຮັດໃຫ້ວຽກບາງຈຸດສໍາຄັນມີຄືບໜ້າຕາມແຜນ ປັດຈຸບັນນີ້ ການບຸກເບີກ ແລະ ຂຸດເຈາະເສັ້ນທາງລົດໄຟໃນແຂວງຫລວງນໍ້າທາ, ອຸດົມໄຊ, ຫລວງພະບາງ ແລະ ແຂວງວຽງຈັນໄດ້ດໍາເນີນການຈັດຕັ້ງປະຕິບັດໄວເກີນຄາດໂດຍໃຊ້ເຄື່ອງກົນຈັກທັນສະໄໝ.

ທ່ານ ຕຸ່ນ ເຈົ້າໜ້າທີ່ພາກສະໜາມໄດ້ເປີດເຜີຍຜ່ານທາງເຟສບຸກຂອງຕົນໃນວັນທີ 4 ເມສາ 2017 ນີ້ວ່າ: ການຂຸດເຈາະອຸບມົງເສັ້ນທາງລົດໄຟຢູ່ບ້ານນາດາວ ເມືອງວັງວຽງ ແຂວງວຽງຈັນໄດ້ດໍາເນີນໄປດ້ວຍຄວາມລາບລື້ນ ເຖິງແມ່ນວ່າລະດູຝົນຈະເຂົ້າມາໃນອີກ 2 ເດືອນຕໍ່ໜ້າ ແຕ່ນັກວິຊາການ ພ້ອມກໍາມະກອນກໍບໍ່ຫວັ່ນໄຫວ ເນື່ອງຈາກວ່າລະບົບການເຮັດວຽກມີແຜນທີ່ດີ ແລະ ມີກົນຈັກທັນສະໄໝ.