ສຳນັກຂ່າວສານປະເທດລາວ ລາຍງານເມື່ອວັນທີ 4 ເມສາ 2017 ນີ້ວ່າ ຜູ້ອຳນວຍການລັດວິສາຫະກິດນໍ້າປະປານະຄອນຫລວງວຽງຈັນ ​ໄດ້​ຮຽກຮ້ອງ​ມາ​ຍັງ​ສັງຄົມ​ກໍ​ຄື​ປະຊາຊົນ​ບັນດາ​ເຜົ່າ​ໃນ​ການສະ​ເຫລີ​ມສະຫລອງ​ປີ​ໃໝ່​ລາວ​ໃຫ້​​ໃຊ້​ນໍ້າ​ຢ່າງ​ປະ​ຢັດ, ພາຍຫລັງເຫັນ​ວ່າຄວາມຕ້ອງການຊົມ​ໃຊ້​ນໍ້າ​ໃນ​ໄລຍະ​ນີ້​ອາດ​ເພີ່ມຂຶ້ນ​ເທົ່າ​ຕົວ.​

ທ່ານ​ອໍານວຍ​ການ ກ່າວ​ວ່າ: ລັດ​ວິ​ສາ​ຫະກິດນໍ້າປະປາ ນະຄອນຫລວງເປັນໜ່ວຍງານສຳຄັນໃນການບໍລິການນໍ້າສະອາດໃຫ້ສັງຄົມໄດ້ຊົມໃຊ້ເຂົ້າໃນຊີວິດປະຈຳວັນຢ່າງ​ທົ່ວ​ເຖິງ ​ແລະ ມາ​ຮອດ​ປັດຈຸບັນຄວາມ​ຕ້ອງການ​ນໍ້າ​ຢູ່​ນະ ຄອນຫລວງ​ວຽງ​ຈັນ ​ມີຫລາຍ​ກວ່າ 3 ​ແສນ​ແມັດ​ກ້ອນຕໍ່​ມື້, ​ແຕ່​ສາມາດ​ສະໜອງ​ໄດ້​ພຽງ​ແຕ່ 280.000 ​ແມັ​ດກ້ອນ​ຕໍ່​ມື້, ​ໂດຍ​ໄດ້​ແຍກ​ຜູ້​ຊົມ​ໃຊ້ນໍ້າ​ອອກ​ເປັນ 3 ປະ​ເພດ​ຄື: ຜູ້ຊົມໃຊ້ທົ່ວໄປ​ແຕ່ 1-10 ແມັດກ້ອນຈະ​ຄິດ​ໄລ່​ຄ່າ​ນໍ້າ 1.434 ກີບຕໍ່​ແມັດ​ກ້ອນ​, 11-50 ​ແມ່ນ 1.986 ກີບຕໍ່​ແມັດ​ກ້ອນ, ​ແຕ່ 31-50 ຈະ​ຄິດ​ໄລ່ 2.538 ກີບຕໍ່​ແມັດ​ກ້ອນ ​ແລະ ​ແຕ່ 51 ​ແມັດ​ກ້ອນຂຶ້ນໄປ​ແມ່ນຈະ​ຄິດ​ໄລ່ 3.089 ກີບ​ຕໍ່​ແມັດ​ກ້ອນ. ສ່ວນປະເພດອົງການລັດ, ສະ ຖານທູດ ແລະ ອົງການຈັດຕັ້ງສາກົນຈະ​ຄິດ​ໄລ່ 2.538 ກີບ​ຕໍ່​​ແມັດ​ກ້ອນ ແລະ ພາກສ່ວນທຸລະກິດບໍລິການ​ເຊັ່ນ: ໂຮງແຮມ, ຮ້ານອາຫານ, ໂຮງງານຜະລິດນໍ້າກ້ອນ, ນໍ້າດື່ມຈະ​ຄິດ​ໄລ່ 3.089 ກີບ​ຕໍ່​ແມັດ​ກ້ອນ. ​​ແຕ່ແນວ​​ໃດ​ກໍ​ຕາມ​, ປີ​ນີ້ຄາດ​ວ່າ​ສະພາບ​ແມ່​ນໍ້າ​ສາຍ​ຕ່າງໆຈະ​ມີ​ລັກສະນະ​ບົກ​ແຫ້ງ ​ແລະ ອາດ​ເຮັດ​ໃຫ້​ຫລາຍ​ທ້ອງ​ຖິ່ນ​ປະ​ເຊີນ​ກັບ​ບັນຫາ​ການ​ຂາດ​​ແຄນ​ນໍ້າ​ໃຊ້ ​ແລະ ຈະ​ສົ່ງ​ຜົນ​ໃຫ້​ແກ່​ການ​ຜະລິດ​ນໍ້າ​ປະປາພົບ​ຄວາມ​ຫຍຸ້ງຍາກ,​ ດັ່ງ​ນັ້ນ​ການຫລີ້ນ​ນໍ້າ​​ໃນ​ໂອກາດປີ​ໃໝ່​ນີ້​ກໍ​ຂໍ​ໃຫ້​ມີ​ການ​ປະ​ຢັດ ​ແລະ ທັງ​ເປັນ​ການ​ຫລຸດຜ່ອນ​ຄ່າ​ນໍ້າ​ຢູ່ເຮືອນຂອງທ່ານ​ອີກດ້ວຍ.