ເອເອຟພີລາຍງານວ່າ ຄະນະມົນຕີຄວາມໝັ້ນຄົງແຫ່ງອົງການສະຫະປະຊາຊາດເອີ້ນປະຊຸມດ່ວນ ໃນວັນທີ 4 ເມສາ 2017 ຕາມຄຳຮ້ອງຂອງລັດຖະບານອັງກິດແລະຝຣັ່ງ ກໍລະນີຊາວຊີເຣຍຖືກໂຈມຕີດ້ວຍອາວຸດເຄມີອັນຕະລາຍ ມີຜູ້ເສຍຊີວິດຢ່າງໜ້ອຍ 58 ຄົນ ແລະອີກຫຼາຍກວ່າ 200 ຄົນເຈັບປ່ວຍ ສ້າງຄວາມວິຕົກກັງວົນເປັນຢ່າງຍິ່ງ.
ເຫດດັ່ງກ່າວເກີດຂຶ້ນທີ່ເມືອງຂ່ານ ຊີກຄຸນ ຖານທີ່ໝັ້ນຂອງກຸ່ມໄອເອສ ຕັ້ງຢູ່ທາງຕອນກາງຂອງແຂວງອິດລິບ ພາກຕາເວັນອອກສຽງເໜືອ ເຮືອບິນຮົບບໍ່ຮູ້ວ່າເປັນຂອງຝ່າຍໃດ ຖິ້ມລະເບີດໂຈມຕີດ້ວຍແກັດພິດ ໃນບ້ານຂ່ານ ຊີກຄຸນ ສົ່ງຜົນໃຫ້ມີຜູ້ຄົນເສຍຊີວິດຫຼາຍກວ່າ 58 ຄົນ ໃນນັ້ນມີເດັກນ້ອຍທີ່ເສຍຊີວິດລວມຢູ່ນຳເຖິງ 11 ຄົນ ຕໍ່ມາເຮືອບິນລຳດັ່ງກ່າວຍັງຍິງຖະຫຼົ່ມຊໍ້າໃສ່ຄະລີນິກທີ່ໃຫ້ການປິ່ນປົວຜູ້ບາດເຈັບຈາກແກັດພິດນຳອີກ.
ໜ່ວຍກູ້ໄພໝວກຂາວ ໜ່ວຍກາງໃນການຊ່ວຍເຫຼືອຜູ້ບາດເຈັບລະຫວ່າງສົງຄາມໃນຊີເຣຍ ຮີບເຂົ້າໄປຊ່ວຍ ໂດຍໃຊ້ສາຍຢາງສີດນໍ້າລ້າງພິດໃຫ້ກັບຜູ້ບາດເຈັບ ບາງຄົນມີອາການໝົດສະຕິ ນໍ້າຕາໄຫຼ ຮາກ ລວມໄປທັງເປັນຟອດອອກຈາກປາກ ຂະນະທີ່ຈຳນວນຢາບໍ່ພຽງພໍ ແລະຕ້ອງຂໍຄວາມຊ່ວຍເຫຼືອການຂົນສົ່ງດ້ານການແພດແລະຢາຈາກຕວກກີ.
ໜ່ວຍງານດັ່ງກ່າວຍັງບໍ່ສາມາດສະຫຼຸບໄດ້ວ່າການກະທຳດັ່ງກ່າວມາຈາກການໂຈມຕີທາງອາກາດຂອງຊີເຣຍ ຫຼືຣັດເຊຍ ແລະອາດຈະມີຄວາມເປັນໄປໄດ້ວ່າຈະເປັນການໂຈມຕີຈາກກອງກຳລັງທີ່ນຳພາໂດຍສະຫະລັດທີ່ແນໃສ່ໂຈມຕີຝ່າຍໄອເອັສ.
ດ້ານສະຫະພາບເອີລົບ ຫຼື ອີຢູ ລະບຸເຖິງເຫດທີ່ເກີດຂຶ້ນວ່າ ເປັນສິ່ງໂຫດຮ້າຍແລະຝ່າຍທີ່ຕ້ອງສົງໄສທີ່ສຸດຄືກອງທັບຊີເຣຍທີ່ນຳໂດຍປະທານາທິບໍດີບາຊາ ອັນ ອັດຊາດ.
ຂະນະທີ່ລັດຖະບານຣັດເຊຍຖະແຫຼງວ່າ ຣັດເຊຍບໍ່ໄດ້ເປີດປະຕິບັດການໂຈມຕີໃນພື້ນທີ່ດັ່ງກ່າວ ສ່ວນລັດຖະບານຊີເຣຍປະຕິເສດເຊັ່ນກັນ ພ້ອມທັງກ່າວຫາກຸ່ມກະບົດເປັນຝ່າຍທີ່ໃຊ້ອາວຸດຕ້ອງຫ້າມດັ່ງກ່າວ.
ດ້ານເວັບໄຊບິນລາຍງານວ່າ ອາວຸດເຄມີທີ່ໃຊ້ເປັນແກັດຊາຣິນ ເຊິ່ງເປັນອາວຸດເຄມີຮຸນແຮງຕໍ່ປະສາດແລະເປັນອາວຸດອານຸທຳລາຍລ້າງສູງ ໃນຂໍ້ມະຕິສະຫະປະຊາຊາດທີ່ 687 ແລະຖືກສັ່ງຫ້າມໂດຍສະຫະປະຊາຊາດ.