ສຳນັກຂ່າວຕ່າງປະເທດລາຍງານຈາກເມື່ອງ ໂຮໄດດາ ປະເທດ ເຢເມນ ເມື່ອວັນທີ 17 ມີນາ 2017 ວ່າ ກຸ່ມກະບົດ ຮູຕີຂອງຊາວນິກາຍຊີວະ ໃນເຢເມນ ກ່າວຫາກອງກຳລັງພັນທະມິດອາຫຼັບນຳໂດຍ ຊາອຸດິອາຣະເບຍ ເປັນຜູ້ໂຈມຕີ ເຫດການໄດ້ເກີດຂຶ້ນເມືອເວລາປະມານ 03.00 ໂມງເຊົ້າວັນສຸກ ໂດຍມີຜູ້ເສຍຊີວິດຢ່າງໜ້ອຍ 42 ຄົນ ແລະ ມີຜູ້ບາດເຈັບກວ່າ 30 ຄົນ ຖືກນຳຂຶ້ນຝັ່ງຂອງເມືອງ ໂຮໄດດາ ທາງພາກຕະເວັນຕົກຂອງເຢເມນ ຂະນະທີ່ກອງກຳລັງພັນທະມິດ ກ່າວຫາກະບົດຮູຕິລັກລອບຂົນອາວຸດໃສ່ເຮືອຂະໜາດນ້ອຍ ຂຶ້ນຝັ່ງເມືອງ ໂຮໄດດາ

ຜູ້ລອດຊີວິດໃນເຮືອລາຍໜຶ່ງ ເຊິ່ງເປັນສະມາຊິກແກ໊ງລັກລອບຂົນຜູ້ອົບພະຍົບ ເຜີຍວ່າ ເຮືອລຳດັ່ງກ່າວບັນທຸກຜູ້ໂດຍສານປະມານ 140 ຄົນ ມີທັງເດັກນ້ອຍ ແລະ ແມ່ຍິງ ເປັນຜູ້ອົບພະຍົບຊາວໂຊມາເລຍ ທີ່ຫຼົບໜີໄພສົງຄາມໃນເຢເມນ ເພື່ອຈະເດີນທາງໄປທີ່ຊູດານ ເຮືອອອກເດີນທາງຈາກເມືອງ ຮາສ ອາຣາ ທາງໃຕ້ຂອງໂຮໄດດາ ແລະ ອອກສູ່ທະເລຫ່າງຊາຍຝັ່ງປະມານ 50 ກມ. ເມື່ອຖືກໂຈມຕີ

ຢ່າງໃດກໍ່ຕາມ ພລ.ຕ ອັສຊິຣິ ໂຄສົກກອງກຳລັງພັນທະມິດອາຫຼັບ ອອກມາກ່າວປະຕິເສດຂໍ້ກ່າວຫາ ໂດຍຢືນຢັນວ່າ ກອງກຳລັງພັນທະມິດ ບໍ່ໄດ້ກ່ຽວພັນກັບການສູ້ຮົບໃນເຂດເມືອງ ໂຮໄດດາ.