ທ່ານ ສະເຫຼີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ພ້ອມດ້ວຍພັນລະຍາ ແລະຄະນະ ໄດ້ດຳເນີນການຢ້ຽມຢາມ ບຣູໄນ ດາຣູຊາລາມ ຢ່າງເປັນທາງການ ໃນວັນທີ 14-16 ມີນາ 2017 ເພື່ອຕອບຕອບສະໜອງ ຕາມການເຊີນຂອງ ທ່ານ ເປຮິນ ດາໂຕະ ລິມໂຈກ ເຊັງ ລັດຖະມົນຕີປະຈຳສຳນັກງານນາຍົກ ລັດຖະມົນຕີ, ລັດຖະມົນຕີ ກະຊວງການຕ່າງປະເທດ ແລະ ການຄ້າ ຜູ້ທີ 2 ແຫ່ງບຣູໄນ ດາ ຣູຊາລາມ ແລະເພື່ອເສີມຂະຫຍາຍສາຍພົວພັນມິດຕະພາບ ແລະການຮ່ວມມືທີ່ດີ ລະຫວ່າງ ລາວ-ບຣູໄນ
ໃນຕອນເຊົ້າຂອງວັນທີ 16 ມີນາ 2017ຜ່ານມານີ້, ລັດຖະມົນຕີກະຊວງການຕ່າງປະເທດ ລາວ -ບຣູໄນ ໄດ້ພົບປະສອງຝ່າຍ ທີ່ກະຊວງການຕ່າງປະເທດ ແລະ ການຄ້າບຣູໄນ. ໃນການພົບປະຄັ້ງນີ້, ລັດຖະມົນຕີຂອງລາວ ແລະ ບຣູໄນ ຕ່າງກໍໄດ້ ຕີລາຄາສູງຕໍ່ການພົວພັນ ແລະ ການຮ່ວມມືຂອງສອງປະເທດ ທີ່ມີບາດກ້າວຂະຫຍາຍຕົວ ແລະ ແຕກດອກອອກຜົນຢ່າງຕໍ່ເນື່ອງ, ເຫັນໄດ້ຈາກການ ແລກປ່ຽນການຢ້ຽມຢາມ ແລະ ໄປມາຫາສູ່ກັນຂອງຄະນະຜູ້ ແທນ ໃນລະດັບປະມຸກລັດ, ຫົວໜ້າລັດຖະບານ ແລະ ຂະແໜງການຕ່າງໆຢ່າງເປັນປົກກະຕິໃນໄລຍະຜ່ານມາ.
ໃນໂອກາດດຽວກັນ ທ່ານ ສະເຫຼີມໄຊ ກົມມະສິດ ໄດ້ສະແດງ ຄວາມຂອບໃຈຕໍ່ລັດຖະບານ ບຣູໄນ ທີ່ໄດ້ໃຫ້ການຊ່ວຍເຫຼືອ ແກ່ ສປປ ລາວ ໃນດ້ານຕ່າງໆ ໃນໄລຍະຜ່ານມາເຊັ່ນ: ການຊ່ວຍເຫຼືອກໍ່ສ້າງຕຶກອາຄານ ສະຫະພັນແມ່ຍິງລາວ, ສູນຟື້ນຟູຄົນພິການ, ໂຮງຮຽນເດັກກຳພ້າ, ໂຮງຮຽນມັດທະຍົມ, ສູນປິ່ນປົວ ແລະ ຟື້ນຟູຜູ້ຕິດຢາເສບຕິດ ແລະສະໜາມກິລາ ໃນຮົ່ມຄົບວົງຈອນສີເກີດ ຊຶ່ງລວມມູນຄ່າທັງໝົດ 4.016.250 ໂດລາສະຫະລັດ, ການຊ່ວຍ ເຫຼືອດ້ານການພັດທະນາຊັບ ພະຍາກອນມະນຸດພາຍໃຕ້ ໂຄງການ Brunei – US En- glish Language Enrichment Project for ASEAN ທີ່ໄດ້ເລີ່ມປະຕິບັດມາເປັນເວ ລາ 5 ປີແລ້ວ ແລະ ທ່ານຍັງສະແດງຄວາມຂອບໃຈ ຕໍ່ການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28 ແລະ ຄັ້ງທີ 29 ທີ່ ສປປ ລາວ ເປັນເຈົ້າພາບໃນປີ 2016 ທີ່ ວຽງຈັນ ຂອງສົມເດັດ ຊຸນຕານ ແຫ່ງ ບຣູໄນ ແລະ ໄດ້ປະກອບ ສ່ວນເປັນເງິນຈຳນວນ 300.000 ໂດລາສະຫະລັດ ເພື່ອຊຸກຍູ້ການເປັນປະທານ ອາຊຽນ ຂອງລາວ ແລະ 500.000 ໂດລາສະຫະລັດ ເພື່ອຊຸກຍູ້ກອງປະຊຸມສຸດຍອດ ອາເຊັມ ຄັ້ງທີ 9 ໃນປີ 2012.
ແຫຼ່ງຂ່າວ: ໜັງສືພິມ ປະຊາຊົນ