ເວັບໄຊມະຕິຊົນ ລາຍງານເມື່ອວັນທີ 16 ມີນາ 2017 ນີ້ວ່າ ຜູ້ພິພາກສາລັດຮາວາຍໄດ້ມີຄຳສັ່ງລະງັບຄຳສັ່ງຜູ້ບໍລິຫານປະເທດສະບັບໃໝ່ຫ້າມການເດີນທາງເຂົ້າສະຫະລັດຂອງພົນລະເມືອງ 6 ປະເທດ ຂອງປະທານາທິບໍດີ ໂດນັລ ທຣັມ ພຽງບໍ່ເທົ່າໃດຊົ່ວໂມງກ່ອນທີ່ຄຳສັ່ງດັ່ງກ່າວຈະມີຜົນບັງຄັບໃຊ້ຫຼັງທ່ຽງຄືນຂອງວັນທີ 16 ມີນາ ນີ້
ຜູ້ພິພາກສາ ທ່ານ ແດຣິດ ວັດສັນ ຂອງຮາວາຍ ຕັ້ງຂໍ້ສົງໃສກ່ຽວກັບຫຼັກຖານທີ່ລັດຖະບານນຳມາໂຕ້ແຍ້ງວ່າຄຳສັ່ງຫ້າມດັ່ງກ່າວເປັນເລື່ອງຂອງຜົນປະໂຫຍດດ້ານຄວາມໝັ້ນຄົງແຫ່ງຊາດສະຫະລັດ ໃນຂະນະທີ່ທຣັມ ລະບຸວ່າ ຄຳຕັດສິນຂອງສານສະແດງໃຫ້ເຫັນເຖິງການໃຊ້ອຳນາດເກີນຂອບເຂດທີ່ບໍ່ເຄີຍເກີດຂຶ້ນມາກ່ອນ
ຮາວາຍເປັນໜຶ່ງໃນຫຼາຍລັດຂອງສະຫະລັດທີ່ພະຍາຍາມຢຸດຕິຄຳສັ່ງຫ້າມດັ່ງກ່າວຂອງ ທຣັມ ໂດຍທະນາຍຄວາມໄດ້ໂຕ້ແຍ້ງຄຳສັ່ງຂອງ ທຣັມ ວ່າເປັນການລະເມີດລັດຖະທຳມະນູນຂອງສະຫະລັດ ໂດຍມີການເລືອກປະຕິບັດກັບຜູ້ຄົນບົນພື້ນຖານຂອງສັນຊາດ ຂະນະດຽວກັນຄຳສັ່ງຫ້າມ 6 ປະເທດມຸສລິມເຂົ້າສະຫະລັດ ຍັງສົ່ງຜົນກະທົບຕໍ່ພາກການທ່ອງທ່ຽວ, ການສຶກສາຕໍ່ໃນສະຫະລັດຂອງນັກສຶກສາຕ່າງຊາດຮວມເຖິງການຈ້າງແຮງງານອີກດ້ວຍ.