ຄຳລຳ ໜັງໃໝ່ ມື້ນີ້ແອັດມິນຮູບເງົາເລື່ອງໃຫມ່ທີ່ຈະມາແນະນຳ ບອກເລີຍວ່າເລື່ອງນີ້ໜ້າເບິ່ງສຸດໆອີກເລື່ອງໜຶ່ງ ເຊິ່ງເປັນຮູບເງົາທີ່ຜະລິດໂດຍສີມືຂອງຄົນລາວ ຢ່າງ “ວັນຄົບຮອບ”.
ສົມກັບການລໍຄອຍອັນແສນຍາວນານ ສຳລັບຮູບເງົາເລື່ອງ “ວັນຄົບຮອບ” ທີ່ໄດ້ຜູ້ກຳກັບມືທອງຢ່າງ JoJo Miracle ຊຸບຕາຣ໌ແຫ່ງວົງການບັນເທີງບ້ານເຮົາ ງານນີ້ຜູ້ກຳກັບຄົນເກັ່ງບ່າວ ໂຈໂຈ້ ທຸ້ມເຕັມທີ່ເພື່ອເຮັດໃຫ້ຜົນງານອອກມາດີທີ່ສຸດເພື່ອບໍ່ໃຫ້ແຟນໆທີ່ລໍຄອຍເບິ່ງຜົນງານຕ້ອງຜິດຫວັງ ສຳລັບບົດພະນາງຂອງຮູບເງົາເລື່ອງນີ້ໄດ້ດາຣາສາວໜ້າຫວານຢ່າງ ສາວ “ວີນ່າ” ແລະ ບ່າວໜ້າຫຼໍ່ໜ້າກິນຢ່າງ “ປັອບປີ” ທັງສອງຖືເປັນການໂຄຈອນມາຮ່ວມງານກັນໃນດ້ານການສະແດງຮູບເງົາຄັ້ງທຳອິດກໍ່ວ່າໄດ້ ແລະ ນອກຈາກນີ້ຍັງມີດາຣາແຖວໜ້າຂອງເມືອງລາວອີກຫຼາຍທ່ານຮ່ວມສົມທົບ ແຖມຍັງໄດ້ທີມງານຄຸນນະພາບຢ່າງ Miraclelao Productions ມາເຮັດໜ້າທີ່ຖ່າຍທຳໃຫ້ອີກຕ່າງຫາກ ເວົ້າມາແລ້ວກໍ່ຢ່າງໃຫ້ຮອດມື້ສາຍໄວໆ ເພາະຈະໄດ້ເບິ່ງຜົນງານເລື່ອງນີ້
“ວັນຄົບຮອບ” ຈະເຂົ້າສາຍໃນໂຮງຮູບເງົາບ້ານເຮົາພ້ອມກັນ 3 ໂຮງຮູບເງົາ Major Cineplex Vientiane Center , Major Cineplex Pakse & Itec Cineplex Vientiane ໃນວັນທີ 30 ມີນາ 2017 ນີ້ ແຟນຮູບເງົາທີ່ມັກເບິ່ງແນວຮັກໂຣແມນຕິກບໍ່ຄວນພາດ! ແຕ່ກ່ອນຈະຮອດມື້ສາຍ ແອັດກໍ່ມີຕົວຢ່າງຮູບເງົາມາໃຫ້ແຟນເວັບໄຊລາວໂພສຕ໌ ເບິ່ງອຸ່ນເຄື່ອງກັນກ່ອນ.
ຂໍ້ມູນຈາກ: JoJo Miracle