ຕາມການລາຍງານ ຂອງທ່ານ ຮ້ອຍເອກ ທະນູສອນ ຈິນດາວົງ ຮອງຫົວໜ້າພະແນກສອບສວນຄະດີອາຍາ ກອງບັນຊາການ ປກສ ແຂວງສະຫວັນນະເຂດ ແຈ້ງໃຫ້ຮູ້ວ່າ: ເວລາປະມານ 17 ໂມງ ຂອງວັນທີ 10 ສິງຫາ 2014 ຢູ່ທີ່ກິໂລແມັດທີ 02 ບ້ານໂພໄຊ ເມືອງໄກສອນພົມວິຫານ (ກົງກັນຂ້າມກັບໂຮງແຮມສຸລິນສຸກ) ໄດ້ເກີເຫດມີກຳມະກອນຊາວຫວຽດນາມຍິງກັນ ເຮັດໃຫ້ມີຜູ້ບາດເຈັບສາຫັດ 1 ຄົນ. ຜ່ານການສືບສວນສອບສວນຂອງເຈົ້າໜ້າທີ່ ຈຶ່ງໄດ້ພົບວ່າ: ຜູ້ໄດ້ຮັບບາດເຈັບ ຊື່ ທ້າວ ຫງວຽນດຶກຟ້ອງ (ບີ້) ອາຍຸ 35 ປີ, ສັນຊາດຫວຽດນາມ, ຢູ່ບ້ານນອງ, ເມືອງເຮືອງຖຸ້ຍ ແຂວງເທືອທຽນເຫ້, ອາຊີບກຳມະກອນ ສ້ອມແປງລົດໃຫຍ່ ຖືກຍິງຢູ່ຄໍ ແຕ່ຊ້າຍຫາຂວາ ຈຳນວນ 1 ລູກ ໄດ້ຮັບບາດເຈັບສາຫັດ, ໝູ່ໄດ້ນຳສົ່ງໂຮງໝໍແຂວງ ເມື່ອອາການບໍ່ດີຂຶ້ນ ທາງຍາດພີ່ນ້ອງຈຶ່ງໄດ້ນຳສົ່ງໄປປິ່ນປົວຢູ່ໂຮງໝໍປະເທດໄທ.
ສ່ວນຄົນທີ່ລົງມືຍິງຄື ທ້າວ ເລວັນຕື ອາຍຸ 47 ປີ, ສັນຊາດຫວຽດນາມ, ຢູ່ບ້ານສາຖຸຍພຸ ເມືອງເຮືອງຖຸ້ຍ ແຂວງເທືອທຽນເຫ້, ອາຊີບກຳມະກອນກໍ່ສ້າງ ໄດ້ນຳໃຊ້ປືນ k59 ພ້ອມກະສຸນເຕັມແມັກ, ຍິງອອກ 2 ລູກ, ອີກລູກໜຶ່ງ ຄ້າງຢູ່ປືນ ດັ່ງນັ້ນ ຈຶ່ງເຮັດໃຫ້ເຈົ້າໜ້າທີ່ ປກສ ບ້ານ, ປກສ ກຸ່ມບ້ານ ພ້ອມດ້ວຍພົນລະເມືອງດີ ໄດ້ຈັບຕົວໃນສະຖານທີ່ເກີດເຫດຢ່າງທັນການ ແລ້ວມອບຕົວໃຫ້ເຈົ້າໜ້າທີ່ຕຳຫຼວດ ສົ່ງຄຸມຂັງຫຼັກ 6 ພ້ອມດ້ວຍຂອງກາງ ປືນ k59 ຈຳນວນ 1 ກະບອກ ແລະລູກປືນອີກ 5 ລູກແມ່ນເຈົ້າໜ້າທີ່ເກັບຮັກສາໄວ້ ພ້ອມຈະສືບສວນ-ສອບສວນຫາທີ່ມາຂອງປືນດັ່ງກ່າວນຳພ້ອມ.
ສາຍເຫດທີ່ພາໃຫ້ທ້າວ ເລວັນຕື ເອົາປືນຍິງໃສ່ທ້າວ ຫງວຽນດຶກຟ້ອງ ແມ່ນຍ້ອນຜູ້ກ່ຽວເມົາ, ເວົ້າສຽງດັງ ແລະຢາກຮ້າຍທີ່ທ້າວ ຫງວຽນດຶກຟ້ອງ ໄປແຈ້ງຕຳຫຼວດມາຈັບຜູ້ກ່ຽວ, ຈຶ່ງໄດ້ຍ່າງອອກໄປ ແລ້ວກັບເຂົ້າມາ ພ້ອມດ້ວຍປືນ ຈຶ່ງເຮັດໃຫ້ເປັນເຫດຄືດັ່ງກ່າວ, ເບື້ອງຕົ້ນ ທາງເຈົ້າໜ້າທີ່ໄດ້ຕັ້ງຂໍ້ 2 ຂໍ້ຫາຄື: ຄາດຕະກຳໂດຍເຈດຕະນາ ແລະມີອາວຸດເສິກໄວ້ໃນຄອບຄອງ ໂດຍບໍ່ໄດ້ຮັບອະນຸຍາດ.
ຂ່າວ: ສະຫວັນພັດທະນາ