ພະຍາດເບົາຫວານ ບໍ່ແມ່ນຈະເປັນນຳແຕ່ຜູ້ທີ່ຕຸ້ຍເທົ່ານັ້ນ, ຜູ້ທີ່ຈ່ອຍກໍເປັນໄດ້ເຊັ່ນກັນ ເພາະພະຍາດເບົາຫວານບໍ່ໄດ້ສະແດງອອກມາຊັດເຈນ ເຊິ່ງຮູບຮ່າງເປັນແນວໃດກໍສາມາດເປັນພະຍາດເບົາຫວານໄດ້, ແຕ່ພະຍາດເບົາຫວານນີ້ ມີສັນຍານເຕືອນໃຫ້ເຮົາຮູ້ໄດ້ ໂດຍສະເພາະຄົນທີ່ມີຄວາມສ່ຍງພິເສດເຊັ່ນ: ມີຄົນໃນຄອບຄົວເຄີຍເປັນ ຫຼືເຄີຍກວດສຸຂະພາບພົບວ່ານໍ້າຕານໃນເລືອດສູງ ຫຼືໃນນໍ້າປັດສະວະສູງ
- ເຫືອກເປັນບາດແຜອັກເສບ ຕິດເຊື້ອ: ເຫືອກເປັນອະໄວຍະວະສ່ວນໜຶ່ງທີ່ອາດເປັນບາດແຜໄດ້ງ່າຍ, ຖ້າຫາກລະດັບນໍ້າຕານໃນເລືອດຂອງເຮົາຫາກສູງ ແຜໃນເຫືອກກໍຍິ່ງອັກເສບ ແລະຕິດເຊື້ອໄດ້ງ່າຍ ແລະດີຍາກກວ່າປົກກະຕິ
- ຜິວດ່າງດຳ: ໂດຍສະເພາະໃນບໍລິເວນຫຼັງຄໍ ເຈົ້າອາດພົບວ່າສີຜິວບໍ່ສະໝໍ່າສະເໝີ, ມີສີດຳ ຫຼືຜິວກະດ່າງດຳ ບໍ່ສະໝໍ່າສະເໝີ ເຊິ່ງເປັນສັນຍານບົ່ງບອກເຖິງອາການຜິດປົກກະຕິໃນການເຮັດວຽກຂອງອິນຊູລິນ ເຮັດໃຫ້ຮ່າງກາຍສູນເສຍໂຮໂມນທີ່ເຮັດໃຫ້ຄວບຄຸມລະດັບກລູໂຄສ ຈົນອາດເຮັດໃຫ້ໄປສູ່ພະຍາດເບົາຫວານໄດ້
- ຮູ້ສຶກເຈັບບໍລິເວນຝາຕີນ: ຮູ້ສຶກຄືກັບໄຟຊ໋ອດເລັກໜ້ອຍ, ຮູ້ສຶກເຈັບໆ ແປັບໆ ຈົນເຮັດໃຫ້ສູນເສຍການສົມດູນໃນການຍ່າງ, ຢືນ ຫຼືລວມເຖິງການສູນເສຍຄວາມຮູ້ສຶກ ກັບສິ່ງທີ່ສຳຜັດກັບຕີນ
- ສູນເສຍການເບິ່ງ ແລະການໄດ້ຍິນ: ເມື່ອລະດັບນໍ້າຕານຂຶ້ນສູງເລື້ອຍໆ ລະບົບປະສາດຕ່າງໆ ຈະເລີ່ມຖືກທຳລາຍ ລວມເຖິງເຣຕິນາໃນດວງຕາ, ລວມເຖິງທາດແຫຼວໃນດວງຕາທີ່ຜິດປົກກະຕິ ເຮັດໃຫ້ເຈົ້າເຫັນພາບມົວໆ ເບີໆ ບໍ່ຊັດເຈນ ແລະຍັງເຮັດໃຫ້ລະບົບປະສາດການໄດ້ຍິນ ເຮັດວຽກຜິດປົກກະຕິ
- ຢາກນອນຫຼາຍຂຶ້ນ: ໃຜທີ່ນອນແລ້ວນອນອີກ ນອນແນວໃດກໍບໍ່ອິ່ມຕາ ອາດເປັນເພາະລະດັບນໍ້າຕານໃນເລືອດສູງເກີນໄປ ຈົນສ່ຽງເປັນພະຍາດເບົາຫວານ, ນອກຈາກນີ້ ບາງຄົນຍັງມີບັນຫາຂອງການນອນຫຼັບໃນຕອນກາງຄືນ ຈົນເຮັດໃຫ້ຢາກນອນໃນຕອນສວາຍ ເຊິ່ງຫາກນອນບໍ່ເປັນເວລາ ກໍຈະເພີ່ມຄວາມສ່ຽງເປັນພະຍາດເບົາຫວານຫລາຍຂຶ້ນ