ສຳນັກຂ່າວສານປະເທດລາວ ລາຍງານເມື່ອວັນທີ 01 ມີນາ 2017ວ່າ ນັກສຶກສາ ມະຫາວິທະຍາໄລແຫ່ງຊາດ ຄວ້າ 2 ລາງວັນຈາກການແຂ່ງຂັນ ນະວັດຕະກໍາຊາວໜຸ່ມ ກ່ຽວກັບການພັດທະນາ ແລະ ການປົກຄອງເຂດແມ່ນໍ້າ ລ້ານຊ້າງ-ແມ່ຂອງ ໃນຫົວຂໍ້ ການປ່ຽນແປງດິນຟ້າອາກາດ ແລະ ການປົກປ້ອງໄພພິບັດ ໃນລະຫວ່າງວັນທີ 12-16 ມັງກອນ 2017 ຢູ່ທີ່ເມືອງ ໜານໜິງ ສປ ຈີນ.
ໃນການແຂ່ງຂັນດັ່ງກ່າວ, ສປປ ລາວ ກໍ່ຄື ມະຫາວິທະຍາໄລແຫ່ງຊາດ ໄດ້ສົ່ງນັກສຶກສາ 6 ຄົນເຂົ້າຮ່ວມແຂ່ງຂັນ, ເຊິ່ງແບ່ງອອກເປັນ 2 ກຸ່ມ ແລະ ກໍາມະການຕັດສິນ 2 ທ່ານ, ເຊິ່ງຜົນການແຂ່ງຂັນແມ່ນນັກສຶກສາລາວ 2 ກຸ່ມໄດ້ຮັບລາງວັນ ຄື ທີມທີ 1 ປະກອບມີ ທ້າວ ວັນສີ ເພັງທະແຈ່ມ, ທ້າວ ສັນຕິສຸກ ລັດດາວົງ ແລະ ນາງ ແສງຕາວັນ ດວງພະຈັນ ໄດ້ຄິດຄົ້ນການນໍາໃຊ້ຕົ້ນໃບເຕີຍ ເຂົ້າໃນການຫຼຸດຜ່ອນຜົນກະທົບຢູ່ໂຕຣຟິເຄເຊິນ ໂດຍໄດ້ຮັບລາງວັນ ນະວັດຕະກໍາທີ່ດີເລີດ ແລະ ເງິນສົດ ຈໍານວນ 3.000 ຢວນ ແລະ ກຸ່ມທີ 2 ປະກອບມີ ທ້າວ ໄຊປະຊາ ລາດຊະວົງ, ນາງ ລັກສະນີ ພົງພັນ ແລະ ນາງ ທິບສະຫວັນ ສີລາກຸນ ໄດ້ຄິດຄົ້ນ ແພໄມ້ປ່ອງເພື່ອປ້ອງກັນການລະເຫີຍອາຍຂອງນໍ້າ ໂດຍໄດ້ຮັບລາງວັນ ໂຄງການບົ່ມເພາະດີເລີດ ແລະ ເງິນສົດ ຈໍານວນ 10.000 ຢວນ.
ໃນການເຂົ້າຮ່ວມແຂ່ງຂັນຄັ້ງນີ້, ປະກອບມີ 6 ປະເທດເຂົ້າຮ່ວມ ໄດ້ແກ່: ປະເທດກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ປະເທດຈີນ.