ເວັບໄຊຂ່າວ ມະຕິຊົນອອນລາຍ ລາຍງານເມື່ອວັນທີ 28 ກຸມພາ 2017 ທີ່ຜ່ານມາວ່າ ມີຜູ້ເສຍຊີວິດຢ່າງໜ້ອຍ 160 ຄົນ ໃນໄລຍະ 3 ເດືອນ ຈາກເຫດການປະທະກັນລະຫວ່າງກອງທັບມຽນມາ ແລະ ຊົນກຸ່ມນ້ອຍຕິດອາວຸດ ບໍລິເວນຊາຍແດນມຽນມາທີ່ຕິດກັບຈີນໃນລັດຊານຂອງມຽນມາ ຈາກການເປີດເຜີຍຂອງເຈົ້າໜ້າທີ່ຂັ້ນສູງຂອງກອງທັບມຽນມາ ທ່າມກາງຄາມພະຍາຍາມການເຈລະຈາຂອງທັງສອງຝ່າຍທີ່ບໍ່ເຫັນຜົນດີຂຶ້ນ
ນອກຈາກມີຜູ້ເສຍຊີວິດແລ້ວ ຍັງມີຜູ້ຄົນອົບພະຍົບຈາກຖິ່ນຖານຫຼາຍກວ່າ 20,000 ຄົນ ນັບຕັ້ງແຕ່ເກີດມີການຕໍ່ສູ້ກັນລະຫວ່າງກອງທັບທະຫານ ກັບ ຊົນກຸ່ມນ້ອຍຕິດອາວຸດ ເຊິ່ງເລີ່ມຕັ້ງແຕ່ເດືອນພະຈິກເປັນຕົ້ນມາ ເຊິ່ງເຫດການຄວາມວຸ້ນວາຍດັ່ງກ່າວໄດ້ລຸກລາມໄປຮອດລັດກະຈິ່ນທີ່ເປັນລັດຢູ່ຂ້າງຄຽງ ເຊິ່ງເປັນອຸປະສັກຂັດຂວາງເຮັດໃຫ້ຄວາມພະຍາຍາມໃນການເຈລະຈາສັນຕິພາບເພື່ອການຢຸດຕິຄວາມຂັດແຍ້ງບໍລິເວນຊາຍແດນທີ່ດຳເນີນມາຍາວນານຫຼາຍສິບປີ ຂອງລັດຖະບານມຽນມາພາຍໃຕ້ການນຳຂອງທ່ານ ນາງ ອອງ ຊານ ຊູຈີ ທີ່ປຶກສາແຫ່ງລັດ ຕ້ອງຖືກຢຸດຕິລົງ ປັດຈຸບັນນີ້ຜູ້ຊ່ຽວຊານຈຳນວນຫຼາຍລະບຸວ່າ ການຕໍ່ສູ້ປະທະກັນທີ່ບໍລິເວນຊາຍແດນໃນຄັ້ງນີ້ແມ່ນມີຄວາມຮຸນແຮງທີ່ສຸດໃນຮອບ 30 ປີຜ່ານມາ.