ວັນ​ທີ 21 ກຸມພາ 2017 ຜ່ານມາ ທີ່ສຳນັກງານ ​ຄະນະໂຄສະນາອົບຮົມ​ສູນ​ກາງ​ພັກ, ສະຫາຍ ກິ​ແກ້ວ​ ໄຂ​ຄຳ​ພິທູນ,​ ເລຂາທິການ​ສູນ​ກາງ​ພັກ, ຫົວໜ້າຄະນະໂຄສະນາອົບຮົມ ​ສູນ​ກາງ​ພັກ ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ ຂອງຄະນະ​​ຜູ້​ແທນ​ ພັກ​ກອມ​ມູນິດ​ຈີນ ນຳ​ໂດຍ ສະຫາຍ ລີ​ຈືຢົງ (LI ZHIYONG), ຮອງ​ຫົວໜ້າ​ຜູ້​ປະຈຳການ ຂອງ​ຄະນະ​ວຽກ​ງານ​ອົງການ​ອ້ອມຂ້າງ ສູນ​ກາງ​ພັກ​ກອມ​ມູນິດ​ຈີນ ພ້ອມ​ດ້ວຍ​ຄະນະ ທີ່​ມາ​ຢ້ຽມຢາມ ​​ແລະ ​ເຮັດ​ວຽກ ຢູ່ ສປປ ລາວ ​ລະ​ຫວ່າງວັນ​ທີ 21-24 ກຸມພາ 2017 ນີ້.

ສະຫາຍ ກິ​ແກ້ວ ​ໄຂ​ຄຳ​ພິທູ​ນ ​ໄດ້​ສະ​ແດງ​ຄວາມ​ຊົມ​ເຊີຍ ​ຕໍ່​ການ​ມາ​ຢ້ຽມຢາມ ​ຂອງ ຄະນະ​ໃນ​ຄັ້ງ​ນີ້, ​ເຊິ່ງ​ເປັນ​ການ​ປະກອບສ່ວນ ​ອັນ​ສຳຄັນ ​ເຂົ້າ​ໃນ​ການ​ເພີ່ມ​ທະວີ​ສາຍ​ພົວພັນ ມິດຕະພາບ ​ອັນ​ເປັນ​ມູນ​ເຊື້ອ ​ແລະ​ ການ​ຮ່ວມ​ມື​ ແບບ​ຄູ່​ຮ່ວມ​ຍຸດ​ທະ​ສາດ ຮອບດ້ານ ໝັ້ນຄົງຍາວ​ນານ ລະ​ຫວ່າງ ສອງ​ພັກ, ສອງ​ລັດ ​ແລະ ປະ​ຊາ​ຊົນ​ສອງ​ຊາດ ລາວ-​ຈີນ, ​ໃຫ້​ນັບ​ມື້​ນັບ​ແຕກ​ດອກ​ອອກ​ຜົນ​ຍິ່ງໆ​ຂຶ້ນ, ພ້ອມ​ໄດ້​ຕີ​ລາຄາ​ສູງ ​ຕໍ່​ການ​ພົວພັນ​ຮ່ວມ​ມືລະຫວ່າງ ສອງ​ພັກ, ສອງ​ລັດ ​ໃນ​ໄລຍະ​ຜ່ານ​ມາ ​ແລະ ​ໄດ້​ແຈ້ງ​ສະພາບ​ການພົ້ນ​ເດັ່ນ​ ຂອງ ສປປ ລາວ ​ໃຫ້​ຄະນະ​ໄດ້​ຮັບ​ຊາບ,​ ໂດຍ​ສະ​ເພາະ​ແມ່ນ​ຜົນສຳ​ເລັດ ຂອງກອງ​ປະຊຸມ ຄັ້ງ​ທີ X ຂອງ​ ພັກ ສປປ ລາວ, ຜົນສຳ​ເລັດກອງ​ປະຊຸມ​ ສະ​ໄໝ​ສາມັນ ຄັ້ງ​ທີ 2 ຂອງສະພາ​ແຫ່ງ​ຊາດ ສະ​ໄໝ​ທີ 8 ກໍຄື ການຈັດ​ຕັ້ງ​ປະຕິບັດ​ ແຜນ​ພັດທະນາ​ເສດຖະກິດ-​ສັງຄົມ 5 ປີ ຄັ້ງ​ທີ VIII ​ແລະ ການ​ພັດທະນາ​ຊົນນະ​ບົດ​ ຮອບດ້ານ​ເພື່ອ​ແກ້​ໄຂ​ຄວາມທຸກ​ຍາກ ​ແລະ ນຳ​ເອົາ​ປະ​ເທດ​ຊາດ​ຫລຸດ​ພົ້ນ​ ອອກ​ຈາກ​ສະຖານະ​ພາບ​ ດ້ອຍ​ພັດທະນາ​ໃນ ປີ 2020.

ໃນໂອກາດດຽວກັນນີ້, ສະ​ຫາ​ຍ ລີຈືຢົງ ​ໄດ້​ສະ​ແດງ​ຄວາມ​ຂອບ​ໃຈ ​ຕໍ່ສະຫາຍ ກິ​ແກ້ວ​ ໄຂ​ຄຳ​ພິທູນ ທີ່​ໃຫ້​ກຽດ​ຕ້ອນຮັບ ​ແລະ ​ແຈ້ງ​ສະພາບ​ການ​ພົ້ນ​ເດັ່ນຂອງ ສປປ ລາວ ຕໍ່​ຄະນະ​ຊາບ, ທ່ານຍັງ​ໄດ້​ແຈ້ງ​ໃຫ້​ຊາບກ່ຽວ​ກັບ ຜົນສຳ​ເລັດ​ຂອງ​ກອງ​ປະຊຸມ​ຄົບ​ຄະນະ ຄັ້ງ​ທີ 6 ສະ​ໃໝທີ XVIII ຂອງ ພັກ​ກອມ​ມູນິດ​ຈີນ, ສະພາບ​ການ​ພົ້ນ​ເດັ່ນຂອງ​ການ​ພັດທະນາ​ໃນ ສປ ຈີນ ​ແລະຍັງໄດ້ແຈ້ງກ່ຽວກັບຈຸດປະສົງຂອງການມາຄັ້ງນີ້ ໃຫ້ທ່ານ ກິແກ້ວ ໄຂຄຳພິທູນ ໄດ້ຮັບຊາບ

ແຫຼ່ງຂ່າວ: ສຳນັກຂ່າວສານປະເທດລາວ