ສະຫະພາບກະຈາຍສຽງທະວີບອາຊີ (ABU), ໄດ້ອະນຸຍາດໃຫ້ໂທລະພາບແຫ່ງຊາດລາວ ຮັບລິຂະສິດດຳເນີນການ
ຖ່າຍທອດສົດງານມະຫະກຳກິລາເອຊຽນເກມ ຄັ້ງທີ 17 ຢູ່ ເມືອງອິນຊອນ ປະເທດສາທາລະນະລັດເກົາຫລີ ນັບແຕ່
ວັນທີ 19 ກັນຍາ – ວັນທີ 4 ຕຸລາ 2014 ເພື່ອໃຫ້ປະຊາຊົນລາວບັນດາເຜົ່າໄດ້ຮັບຊົມງານມະຫະກຳກິລາລະດັບໃຫຍ່
ທົ່ວພາກພື້ນອາຊີ.
ທ່ານ ບຸນເຈົ້າ ພິຈິດ ອຳນວຍການໃຫຍ່ສະຖານີໂທລະພາບແຫ່ງຊາດລາວ ໄດ້ຖະແຫລງຂ່າວຕໍ່ສື່ມວນຊົນລາວໃນ
ວັນທີ 11 ສິງຫານີ້ວ່າ: ງານກິລາເອຊຽນເກມຄັ້ງນີ້ ໂທລະພາບແຫ່ງຊາດລາວ ຈະມີການຖ່າຍທອດສົດວັນທີ 19 ກັນ
ຍາ ມື້ເປີດງານ ແລະ ວັນທີ 4 ຕຸລາເປັນມື້ປິດງານ ແລະ ຈະມີການຄັດເລືອກຖ່າຍທອດສົດບາງປະເພດກິລາສຳຄັນ
ໃນຈຳນວນ 36 ປະເພດ, 39 ລາຍການແຂ່ງຂັນ, ໃນນັ້ນຈະລົງເລິກການຖ່າຍທອດສົດທຸກປະເພດການແຂ່ງຂັນກິ
ລາ ຂອງ ສປປ ລາວ, ລວມທັງນັບຊີງຫລຽນທຸກປະເພດເພື່ອອອກອາກາດທາງຊ່ອງ ທຊລ 3 ແລະ ທຊລ 1.
ທ່ານ ວິນລ່ຽມ ສຸວັນນາມ ຮອງອຳນວຍການສະຖານີໂທລະພາບແຫ່ງຊາດລາວກ່າວຕື່ມວ່າ: ງານກິລາຄັ້ງນີ້ປະຊາ
ຊົນລາວບັນດາເຜົ່າຈະສາມາດຮັບຊົມໄດ້ທາງເຄເບິນ ແລະ ດີຈີຕອນ, ແຝງກ້າງປາ ຫລື ໜວດກຸ້ງ, ພ້ອມດຽວກັນ
ນີ້ ສະຖານີໂທລະພາບແຫ່ງຊາດ ຈະມີການເຊື່ອມຕໍ່ທາງສາຍໃຍແກ້ວໃຫ້ແກ່ບັນດາແຂວງໃຫຍ່ເປັນຕົ້ນ: ແຂວງ
ຫລວງພະບາງ, ແຂວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ ແລະ ແຂວງຈຳປາສັກ ເພື່ອໃຫ້ບັນດາແຂວງ
ໃຫຍ່ນີ້ ກະຈາຍຕໍ່ໃຫ້ປະຊາຊົນໄດ້ຮັບຊົມ ຄາດວ່າປະຊາຊົນລາວຈະໄດ້ຮັບຊົມການຖ່າຍທອດສົດງານກິລາຄັ້ງນີ້ປະ
ມານ 60% ໃນທົ່ວປະເທດ.
ແຫຼ່ງຂ່າວ: http://laophatthananews.blogspot.com/2014/08/17.html