ຄະນະຮັບຜິດຊອບປະມູນຂາຍລົດການນຳຂັ້ນສູງຂອງລາວຊຸດທຳອິດ ໄດ້ເປີດເຜີຍຕໍ່ທີມຂ່າວລາວໂພສ ໃນຕອນແລງຂອງມື້ນີ້ ວັນທີ 20 ກຸມພາ 2017 ວ່າ ການເປີດຊອງປະມູນໄດ້ຖືກເລື່ອນອອກໄປກ່ອນ ໂດຍຍັງບໍ່ສາມາດບອກໄດ້ວ່າຈະຈັດຂຶ້ນໃນມື້ໃດ ຍ້ອນວ່າມາຮອດປັດຈຸບັນຍັງບໍ່ສາມາດຕົກລົງລາຄາເລິ່ມຕົ້ນໄດ້.
ລັດຖະບານໄດ້ອອກແຈ້ງການປະມູນລົດຫຼູຂອງການນຳໃນວັນທີ 8 ກຸມພາ 2017 ໂດຍກຳນົດເວລາຈ່າຍຊອງປະມູນເລິ່ມແຕ່ວັນທີ 13 ຫາວັນທີ 20 ກຸມພາ 2017 ແລະມີກຳນົດເປີດຊອງປະມູນໃນວັນທີ 21 ກຸມພາ 2017 ເວລາ 9:00 ທີ່ຫໍປະຊຸມແຫ່ງຊາດ.
ແຕ່ຫຼ້າສຸດມື້ນີ້, ທີມຂ່າວລາວໂພສໄດ້ສອບຖາມໄປຍັງຄະນະຜູ້ຮັບຜິດຊອບໃນການປະມູນລົດດັ່ງກ່າວ ໄດ້ຮັບຄຳຕອບວ່າມາຮອດປັດຈຸບັນນີ້ ຍັງບໍ່ໄດ້ແຈກຢາຍຊອງຕາມຂ່າວທີ່ອອກໄປກ່ອນໜ້ານັ້ນ ເນື່ອງຈາກຍັງບໍ່ສາມາດກຳນົດລາຄາເລິ່ມຕົ້ນໄດ້ ແລະຄະນະກຳມະການຈະໄດ້ປະຊຸມກັນເຖິງເລື່ອງດັ່ງກ່າວໃນວັນທີ 21 ກຸມພາ 2017 ນີ້ ເພື່ອກຳນົດລາຄາເລິ່ມຕົ້ນ ເຊິ່ງຈະຕ້ອງໄດ້ເອົາລາຄາຊື້ຕົວຈິງ ບວກພາສີນຳເຂົ້າ ແລ້ວຫັກຄ່າລຸ້ຍຫ້ຽນອອກ ຈຶ່ງສາມາດກຳນົດລາຄາປະມູນເບື້ອງຕົ້ນໄດ້.
ເຈົ້າໜ້າທີ່ຄົນດັ່ງກ່າວໄດ້ບອກວ່າ ຂ່າວທີ່ອອກໄປໃນກ່ອນໜ້ານັ້ນ ອາດຈະເປັນລາຄາຊື້ໃນຕອນນັ້ນ ທີ່ຍັງບໍ່ໄດ້ລວມພາສີນຳເຂົ້າ ແລະຍັງບໍ່ໄດ້ຫັກຄ່າລຸ້ຍຫ້ຽນອອກເທື່ອ.
ດັ່ງນັ້ນ, ສຳລັບວັນເວລາໃນການເປີດຊອງປະມູນ ຈຶ່ງໄດ້ເລື່ອນອອກໄປກ່ອນ ໂດຍທີ່ຍັງບໍ່ສາມາດບອກໄດ້ວ່າຈະຈັດຂຶ້ນໃນມື້ໃດ ແຕ່ຄາດວ່າຈະສາມາດຈັດຂຶ້ນໄດ້ໃນອີກບໍ່ດົນ.