ເຈົ້າໜ້າທີ່ໜ່ວຍງານສະກັດກັ້ນ ແລະຕ້ານຢາເສບຕິດກອງບັນຊາການ ປກສ ເມືອງໂພນໂຮງ ແຂວງວຽງຈັນ ໄດ້ຮັບຂໍ້ມູນຈາກພົນລະເມືອງດີວ່າ: ຢູ່ໃນຂອບເຂດເມືອງໂພນໂຮງ ໄດ້ມີຄົນບໍ່ດີຈຳນວນໜຶ່ງລັກລອບຊື້-ຂາຍຢາເສບຕິດປະເພດຢາບ້າ, ຈາກນັ້ນເຈົ້າໜ້າທີ່ໄດ້ເລັ່ງຕິດຕາມເປົ້າໝາຍທີ່ມີການເຄື່ອນໄຫວເສບ, ຊື້-ຂາຍຢາເສບຕິດປະເພດຢາບ້າ, ຢາໄອໃນລະຫວ່າງເດືອນມັງກອນ-ເດືອນກຸມພາ 2017 ນີ້, ຈາກນັ້ນສາມາດຈັບຕົວໄດ້ທັງໝົດ 4 ຄົນມາລົງໂທດຕາມກົດໝາຍບ້ານເມືອງ
ເຈົ້າໜ້າທີ່ ປກສ ເມືອງໂພນໂຮງເຜີຍວ່າ: ຈຳນວນ 4 ຄົນທີ່ຈັບໄດ້ນັ້ນມີ: ທ້າວ ເຊຍລີ ອາຍຸ 58 ປີ ອາຊີບຊາວນາ ຢູ່ບ້າໂພນແຍງ ເມືອງເຟືອງ ຖືກກັກຕົວວັນທີ 26 ມັງກອນ 2017 ພ້ອມຂອງກາງຢາບ້າ 364 ເມັດ, ຢາໄອ 54 ຫຼອດດູດ ພ້ອມເຄິ່ງຖົງນ້ອຍ ແລະໂທລະສັບອີກ 8 ໜ່ວຍ; ທ້າວ ພົງພັດ ອາຍຸ 27 ປີ ອາຊີບຊາວນາ ຢູ່ບ້ານ ໂພນສົມບູນ ເມືອງໂພນໂຮງ ຖືກຈັບຕົວຄັ້ງວັນທີ 21 ມັງກອນ 2017 ພ້ອມຂອງກາງຢາບ້າ 20 ເມັດ ແລະໂທລະສັບ 2 ໜ່ວຍ; ທ້າວ ໄມວ່າງ ອາຍຸ 30 ປີ ວ່າງງານ ຢູ່ບ້ານໂພນຄຳໃຕ້ ເມືອງໂພນໂຮງ ຖືກກັກຕົວວັນທີ 1 ກຸມພາ 2017 ພ້ອມຂອງກາງຢາບ້າ 6 ເມັດ, ແປ້ງຜົງສີບົວ 2 ຖົງ ໜັກປະມານ 400 ກຣາມ ແລະໂທລະສັບ 2 ໜ່ວຍ; ນາງ ເຕ້ຍ ອາຍຸ 36 ປີ ກຳມະກອນ ຢູ່ບ້ານໂພນໄຊ ເມືອງໂພນໂຮງ ຖືກກັກຕົວວັນທີ 17 ມັງກອນ 2017 ພ້ອມຂອງກາງຢາບ້າ 30 ເມັດ ແລະໂທລະສັບອີກ 2 ໜ່ວຍ ເຈົ້າໜ້າທີ່ໄດ້ເອົາທັງ 4 ຄົນມາສືບສວນ-ສອບສວນ
ປັດຈຸບັນເຈົ້າໜ້າທີ່ ກອງບັນຊາການ ປກສ ເມືອງໂພນໂຮງ ກຳລັງສືບສວນ-ສອບສວນ ພວກກ່ຽວທັງ 4 ຄົນ ແລະຂະຫຍາຍຜົນຫາກຸມແກ້ງເຄືອຂ່າຍ ແລະຜູ້ຮ່ວມຂະບວນການມາລົງໂທດຕາມລະບຽບກົດໝາຍຢ່າງເຂັ້ມງວດ
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ