ສຳນັກຂ່າວບີບີຊີ ລາຍງານໃນວັນທີ 16 ກຸມພາຜ່ານມານີ້ວ່າ ເກີດເຫດລະເບີດຂ້າຕົວຕາຍ ໂຈມຕີວິຫານລັດທິຊູຟີ ໃນເມືອງເຊວານ ແຂວງສິນ ທາງພາກໃຕ້ຂອງປາກີສະຖານ ສົ່ງຜົນເຮັດໃຫ້ມີຜູ້ເສຍຊີວິດ ຢ່າງໜ້ອຍ 70 ຄົນ ແລະ ບາດເຈັບອີກກວ່າ 250 ຄົນ ໃນຂະນະທີ່ກອງກຳລັງລັດອິດສະລາມ ຫລື ກຸ່ມໄອເອັສ ໄດ້ອອກມາປະກາດ ເປັນຜູ້ຢູ່ເບື້ອງຫລັງຂອງການກໍ່ເຫດ.

ທ່ານ ນາວາດ ຊາຣີບ ນາຍົກລັດຖະມົນຕີປາກີສະຖານ ໄດ້ອອກມາກ່າວປະນາມ ຜູ້ກໍ່ເຫດການສັງຫານໝູ່ດັ່ງກ່າວ ແລະ ປະກາດວ່າ ລັດຖະບານປາກີສະຖານ ຈະດຳເນີນການຕໍ່ສູ້ກັບ ກອງກຳລັງສຸດໂຕ່ງທີ່ກໍ່ເຫດໂຈມຕີຫລາຍຄັ້ງຕິດຕໍ່ກັນ ໃນໄລຍະບໍ່ພໍເທົ່າໃດວັນຜ່ານມານີ້.