ສຳນັກຂ່າວເອເອບພີ ລາຍງານໃນວັນທີ 16 ກຸມພາຜ່ານມານີ້ວ່າ ທ່ານ ຊີ ສ່ຽວໝິງ ອາຍຸ 62 ປີ ອະດີດຮອງປະທານ ສານປະຊາຊົນສູງສຸດຂອງຈີນ ໄດ້ຖືກພິພາກສາຕັດອິດສະຫລະພາບຕະຫລອດຊີວິດ ໃນຂໍ້ຫາຮັບເງິນສິນບົນ ມູນຄ່າຫລາຍກວ່າ 16 ລ້ານໂດລາສະຫະລັດຯ ຊຶ່ງນັບເປັນເຈົ້າໜ້າທີ່ລະດັບສູງສຸດຂອງຝ່າຍຕຸລາການທີ່ໄດ້ຮັບໂທດ ນັບຕັ້ງແຕ່ການດຳເນີນນະໂຍບາ່ຍ ປາບປາມການສໍ້ລາດບັງຫລວງຂອງລັດຖະບານຈີນ.
ຄຳຖະແຫລງຢ່າງເປັນທາງການຂອງສານ ໄດ້ລະບຸວ່າ ທ່ານ ຊີ ສ່ຽວໝິງ ມີຄວາມຜິດໃນຂໍ້ຫາຮັບເງິນສິນບົນ ເພື່ອແລກປ່ຽນກັບ ການຊ່ວຍເຫລືອບຸກຄົນ ແລະ ອົງກອນ ໃນລະຫວ່າງການຖືກຮ້ອງຟ້ອງດຳເນີນຄະດີ ແລະ ໃຫ້ຄວາມຮ່ວມມືກັບບຸກຄົນ ແລະ ບໍລິສັດເຫລົ່ານີ້ ໃນການແຂ່ງຂັນດ້ານທະລຸກິດໃນຕະຫລາດໂດຍບໍ່ເປັນທຳ.
ແຫລ່ງຂ່າວໄດ້ລະບຸວ່າ ທ່ານ ຊີ ສ່ຽວໝິງ ເຂົ້າຮັບຕຳແໜ່ງເປັນຜູ້ພິພາກສາ ສານປະຊາຊົນສູງສຸດຂອງຈີນ ເມື່ອປີ 1982 ແລະ ໄດ້ກະທຳຄວາມຜິດຢ່າງຕໍ່ເນື່ອງເປັນເວລາກວ່າ 20 ປີ ເລີ່ມຕັ້ງແຕ່ປີ 1996 ເປັນຕົ້ນມາ.