ສຳນັກຂ່າວຕ່າງປະເທດ ລາຍງານໃນວັນທີ 15 ກຸມພາຜ່ານມານີ້ວ່າ ທ້າວ ສ່ຽວຫວງ ໜຸ່ມຈີນອາຍຸ 27 ປີ ຈາກເມືອງອູຮັ່ນ ແຂວງຫູເປິ່ຍ ໄດ້ເກີດລົ້ມລົງນັ່ງຄາພື້ນບໍລິເວນໜ້າໂຮງໝໍ ໃນຂະນະທີ່ກຳລັງຍ່າງໄປຂຶ້ນລົດແທັກຊີເພື່ອກັບບ້ານ ຫລັງຈາກທີ່ເດີນທາງເຂົ້າມາກວດພະຍາດທີ່ໂຮງໝໍແຫ່ງດັ່ງກ່າວ, ແຕ່ເນື່ອງຈາກຜູ້ກ່ຽວມີນ້ຳໜັກສູງເຖິງ 220 ກິໂລກຣາມ ຈຶ່ງບໍ່ສາມາດລຸກຂຶ້ນເອງໄດ້ ເຮັດໃຫ້ເຈົ້າໜ້າທີ່ຕຳຫລວດ, ກູ້ໄພ, ໝໍ ແລະ ປະຊາຊົນອ້ອມຂ້າງບໍລິເວນດັ່ງກ່າວ ລວມກັນກວ່າ 20 ຄົນ ເຂົ້າມາຊ່ວຍເຫລືອ ແຕ່ກໍບໍ່ສາມາດດຶງລຸກຂຶ້ນໄດ້.

ສຸດທ້າຍເຈົ້າໜ້າທີ່ຜູ້ໃຫ້ຄວາມຊ່ວຍເຫລືອ ໄດ້ຈັບຕົວຜູ້ກ່ຽວນອນລົງ ແລະ ກິ້ງຂຶ້ນຕຽງຂອງໜ່ວຍກູ້ໄພ ຈາກນັ້ນຈຶ່ງໄດ້ຊ່ວຍກັນຫາມຂຶ້ນຕຽງຄົນເຈັບຂອງໂຮງໝໍ ເພື່ອສົ່ງຕົວເຂົ້າໄປກວດຮ່າງກາຍຢູ່ໂຮງໝໍຄືນອີກເທື່ອໜຶ່ງ.