ສຳນັກຂ່າວຕ່າງປະເທດ ລາຍງານໃນວັນທີ 15 ກຸມພາຜ່ານມານີ້ວ່າ ທ່ານ ນາງ ມາເຣຍ ຊາຄາໂຣວາ ໂຄສົກກະຊວງການຕ່າງປະເທດຣັດເຊຍ ໄດ້ອອກມາຖະແຫລງວ່າ ຣັດເຊຍຈະບໍ່ສົ່ງມອບຄືນດິນແດນໄຄຣເມຍ ຊຶ່ງເປັນດິນແດນສ່ວນໜຶ່ງຂອງ ສະຫະພັນຣັດເຊຍ ໃຫ້ແກ່ອູແກຣນ ພ້ອມທັງຈະບໍ່ມີການຫາລືໃນບັນຫານີ້ກັບປະເທດໃດອີກ ພາຍຫລັງທີ່ ທ່ານ ຢອນ ສະໄປເຊີ ໂຄສົກທຳນຽບປະທານາທິບໍດີ ສະຫະລັດອາເມຣິກາ ໄດ້ອອກມາລະບຸກ່ອນໜ້ານີ້ວ່າ ທ່ານ ໂດນັນ ທຣັມ ຄາດຫວັງທີ່ຈະຮ່ວມມືກັບຣັດເຊຍ ແຕ່ກໍຢາກໃຫ້ຣັດເຊຍ ສົ່ງມອບຄືນໄຄຣເມຍ ໃຫ້ແກ່ອູແກຣນ.

ທັງນີ້ ຣັດເຊຍໄດ້ຮັບເອົາດິນແດນໄຄຣເມຍ ເຂົ້າໄປເປັນສ່ວນໜຶ່ງຂອງຕົນໃນປີ 2014 ຕາມການຮ້ອງຂໍຂອງຊາວໄຄຣເມຍ ຊຶ່ງສ່ວນໃຫຍ່ເວົ້າພາສາຣັດເຊຍ ອັນໄດ້ເຮັດໃຫ້ສະຫະລັດອາເມຣິກາ ແລະ ສະຫະພາບເອີຣົບ ໃຊ້ມາດຕະການຂວ້ຳບາດກັບຣັດເຊຍ ສົ່ງຜົນເຖິງຄວາມສຳພັນລະຫວ່າງຊາດຕາເວັນຕົກ ກັບສະຫະພັນຣັດເຊຍ ຕົກຕ່ຳສຸດຂີດນັບຕັ້ງແຕ່ຫລັງສິ້ນສຸດ ຍຸກສົງຄາມເຢັນເປັນຕົ້ນມາ.