ເຖິງແມ່ນວ່າຍັງບໍ່ທັນມີຂ່າວ ກ່ຽວກັບການລະບາດຂອງພະຍາດອີໂບລາ (Ebola) ໃນບັນດາປະເທດອາຊຽນກໍ່ຕາມ
ແຕ່ເພື່ອບໍ່ເປັນການປະໝາດ ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ອອກມາເຕືອນໃຫ້ທຸກພາກ
ສ່ວນ ເຝົ້າລະວັງຢ່າງໃກ້ຊິດ ເນື່ອງຈາກການລະບາດຂອງພະຍາດດັ່ງກ່າວ ມີຜູ້ເສຍຊີວິດແລ້ວ 887 ຄົນ ແລະ ມີຄົນ
ເຈັບ 1.603 ຄົນ.
ອີງຕາມໃບສະເໜີສະບັບເລກທີ 1253/ກຄພຕ ລົງວັນທີ 7 ສິງຫາ 2014 ເຫັນໄດ້ວ່າ: ພະຍາດອີໂບລາ ແມ່ນກຳລັງລະ
ບາດຢູ່ 3 ປະເທດຂອງທະວີບອາຟຣິກກາຕາເວັນຕົກ ເຊັ່ນ: ປະເທດໄລເບເຣຍ ກີເນຍ ແລະ ເຊຍຣາລອນ ມາຮອດວັນ
ທີ 4 ສິງຫາ 2014 ມີຄົນເຈັບເພີ່ມຂຶ້ນ 280 ຄົນ ແລະ ມີຜູ້ເສຍຊີວິດເພີ່ມຂຶ້ນ 158 ຄົນ ຖ້າທຽບໃສ່ການລະບາດຮອດ
ວັນທີ 27 ກໍລະກົດ 2014 ຜ່ານມາ ມີຄົນເຈັບພຽງ 1.323 ຄົນ ແລະ ເສຍຊີວິດ 729 ຄົນ.
ເຊື້ອຈຸລະໂຣກ ອີໂບລາ ເປັນສາເຫດທີ່ພາໃຫ້ເກີດອາການ ເລືອດໄຫຼຕາມອະໄວຍະວະພາຍໃນຕ່າງໆຂອງຮ່າງກາຍ ຜູ້
ຕິດເຊື້ອຈະມີອາການໄຂ້ ເຈັບຫົວ ເຈັບຕາມຂໍ້ຕໍ່ ກ້າມຊີ້ນ ຮ່າງກາຍ ອ່ອນເພຍ ຖອກທ້ອງ ຮາກ ເຈັບກະເພາະ ກິນເຂົ້າ
ບໍ່ແຊບ ມີເລືອດໄຫຼພາຍໃນຜົ້ງທ້ອງ ອາການດັ່ງກ່າວ ຈະເກີດຂຶ້ນພາຍຫຼັງທີ່ຄົນເຈັບໄດ້ສຳພັດກັບເຊື້ອຈຸລະໂຣກ ອີໂບ
ລາ ຈາກ 2-21 ວັນ ແຕ່ສ່ວນໃຫຍ່ຈະພົບອາການລະຫວ່າງມື້ທີ 8 ຫາມື້ທີ 10 ສຳລັບຄົນທີ່ຕິດເຊື້ອພະຍາດດັ່ງກ່າວ ທີ່ຍັງ
ບໍ່ສະແດງອາການອອກມາ ກໍ່ບໍ່ສາມາດຕິດໃສ່ຄົນອື່ນໄດ້ ນອກຈາກມີການສຳຜັດກັບຄົນເຈັບ ທີ່ສະແດງອາການຂອງ
ພະຍາດດັ່ງກ່າວອອກມາເທົ່ານັ້ນ.
ສຳລັບການກຽມພ້ອມ ຂອງກົມຄວບຄຸມພະຍາດຕິດຕໍ່ ໄດ້ເອົາໃຈໃສ່ຕໍ່ກັບການແຜ່ລະບາດ ຂອງພະຍາດດັ່ງກ່າວຢ່າງ
ໃກ້ຊິດ ໂດຍການສົມທົບກັບໜ່ວຍງານເຝົ້າລະວັງພະຍາດ ຂອງອົງການອະນາໄມໂລກ ປະຈຳ ສປປ ລາວ ເອົາໃຈໃສ່ສືບ
ຕໍ່ວຽກງານປັບປຸງ ເຝົ້າລະວັງທົ່ວປະເທດ ໂດຍສະເພາະແມ່ນຈຸດຜ່ານແດນ ເຊັ່ນ: ສະໜາມບິນສາກົນວັດໄຕ ຂົວມິດຕະ
ພາບ ດ່ານສາກົນບັນດາແຂວງຕ່າງໆ ແລະ ປັບປຸງວຽກງານປ້ອງກັນການຕິດເຊື້ອໃນໂຮງໝໍໃຫ້ເຂັ້ມງວດ ປັບປຸງໜ່ວຍ
ຕອບໂຕ້ໄວຕໍ່ການລະບາດຂອງທຸກພະຍາດ ແລະ ເຜີຍແຜ່ຄວາມຮູ້ໃຫ້ບັນດາກະຊວງ ໃນເວລາພົບກໍລະນີທີ່ໜ້າສົງໃສ.
ແຫຼ່ງຂ່າວ: http://vientianemai.net/teen/khao/1/12415