ຄວາມຫວັງຢາກມີໃບໜ້າໃໝ່ ຢາກພິກຊີວິດຂອງຄົນທີ່ມີຄວາມຜິດປົກກິຕິທາງໃບໜ້າ ໃຫ້ກາຍເປັນຄົນທີ່ໜ້າຕາສວຍງາມຄືດັ່ງຄົນທົ່ວໄປກຳລັງຈະເກີດຂຶ້ນກັບຄົນລາວກວ່າ 60 ຊີວິດ.
ເລີ່ມແຕ່ວັນທີ 07-20 ກຸມພາ 2017 ລວມເປັນເວລາ 2 ອາທິດ. ຄະນະທີມແພດອາສາສະໝັກຈາກອົງການ ການແພດ Interplast ຈາກປະເທດ ອົດສະຕາລີ ແລະ ນິວຊີແລນ ໄດ້ເດີນທາງມາເຖິງໂຮງໝໍມະໂຫສົດ ນະຄອນ ຫຼວງວຽງຈັນ ເພື່ອດຳເນີນໂຄງການໃຫ້ຄຳປຶກສາ ແລະ ການຜ່າຕັດ ໂດຍບໍ່ເສຍຄ່າ ໃຫ້ແກ່ ຜູ້ທີ່ມີອາການດ້ານຄວາມຜິດປົກກະຕິທາງໃບໜ້າຕັ້ງແຕ່ກຳເນີດ ແລະ ຈາກການຈະເລີນເຕີບໂຕ ທີມອາສາສະໝັກຂອງ ໂຄງການ Interplast ທີ່ປະກອບດ້ວຍແພດຜ່າຕັດໃສຍະກຳ ແລະ ຕົບແຕ່ງ, ແພດວາງຢາສະລົບ ແລະ ພະຍາບານ ໄດ້ດຳເນີນການປະເມີນກ່ອນຜ່າຕັດ. ເຊິ່ງຈະປະຕິບັດວຽກຮ່ວມ ແລະ ຝຶກອົບຮົມ ໃຫ້ພະນັກງານແພດ ປະຈຳຢູ່ໂຮງໝໍ ໃນໄລຍະການດຳເນີນໂຄງການ ແລະ ອົງການ WIG ຈະໃຫ້ການຊ່ວຍເຫຼືອ ຄົນເຈັບທັງໝົດກ່ອນ ແລະ ຫຼັງຜ່າຕັດ.
ໂຄງການ Interplast ປີ 2017 ແມ່ນການຜ່າຕັດສຳລັບ ຜູ້ທີ່ມີຄວາມຜິດປົກກະຕິທາງໃບໜ້າແຕ່ກຳເນີດ ແລະ ເກີດຈາກການຈະເລີນເຕີບໂຕ ຂອງຮ່າງກາຍ. ສະເພາະປີນີ້ ຄາດວ່າປະຊາຊົນຢູ່ນະຄອນຫຼວງວຽງຈັນ ປະມານ 60 ຄົນ ຈະໄດ້ຮັບການຜ່າຕັດ ໂດຍບໍ່ເສຍຄ່າ ແລະ ຈະຊ່ວຍປ່ຽນແປງຊີວິດເຂົາເຈົ້າໃຫ້ດີຂຶ້ນກວ່າເກົ່າ.
ໂຄງການດັ່ງກ່າວ, ໄດ້ຮັບການສະໜັບສະໜູນ ບໍລິສັດ ພູເບັ້ຍ ມາຍນິງ (PBM) ແລະ ກຸ່ມແມ່ຍິງສາກົນ (WIG) ເຊິ່ງເປັນການສືບຕໍ່ ການຈັດຕັ້ງໂຄງການທີ່ທາງ ບໍລິສັດ ໄດ້ຮ່ວມທຶນຮອນກັບ Interplast ນັບແຕ່ປີ 2012.
ນັບແຕ່ມີໂຄງການຮ່ວມມືດ້ານການຊ່ວຍ ເຫຼືອ, ບໍລິສັດ ພູເບັ້ຍ ມາຍນິງ ໄດ້ປະກອບສ່ວນທຶນ 220.000 ໂດລາສະຫະລັດ ເຊິ່ງໄດ້ ຊ່ວຍໃຫ້ມີການຜ່າຕັດໂດຍບໍ່ເສຍຄ່າ ເພື່ອປ່ຽນແປງຊີວິດ ໃຫ້ແກ່ຄົນໄຂ້ທີ່ເຂົ້າຮ່ວມໂຄງການ ຢູ່ລາວ ເຊິ່ງເປັນຜູ້ທີ່ບໍ່ສາມາດ ເຂົ້າເຖິງການບໍລິການດັ່ງກ່າວໄດ້.
ຮູບພາບ ແລະ ແຫລ່ງຂ່າວຈາກ: kuanjailao.com