ນັບທັງພໍ່ແມ່ປະຊາຊົນ, ພະນັກງານລັດຖະກອນ, ທະຫານ, ຕຳຫຼວດ ຕ່າງກໍຮູ້ສຶກພາກພູມໃຈນຳທີ່ຄະນະນຳຂັ້ນສູງຂອງລາວຊຸດທີ 8 ນີ້ ໄດ້ເສຍສະລະເອົາລົດປະຈຳຕຳແໜ່ງຂອງຕົນທີ່ມີລາຄາແພງອອກປະມູນຂາຍຈຳນວນ 14 ຄັນ, ໃນນັ້ນມີລົດເກັງ BMW ລຸ້ນ 730 LI ຈຳນວນ 7 ຄັນ ແລະ ລົດເກັງ ຍີ່ຫໍ້ Mercedes BENZ ລຸ້ນ S350 ຈຳນວນ 7 ຄັນ ເປັນແບບຢ່າງໃນການປະຢັດແລະຕ້ານການຟູມເຟືອຍ ເຊິ່ງການເສຍສະລະດັ່ງກ່າວມັນໄດ້ກາຍເປັນແວ່ນແຍງອັນປະເສີດໃຫ້ແກ່ລູກຫລານເຮົາຮໍ່າຮຽນເອົາຕໍ່ຄຸນສົມບັດທັດສະນະອັນດີເລີດຂອງຜູ້ເປັນການນຳຍຸກນີ້ ທີ່ບໍ່ເຄີຍມີມາໃນປະຫວັດສາດກໍວ່າໄດ້.
ແນວໃດກໍຕາມ, ກໍຍັງມີຫຼາຍຫາງສຽງຂອງກຸ່ມຄົນຈຳນວນໜ້ອຍໜຶ່ງ ຕັ້ງຂໍ້ສົງໄສວ່າ: ລົດຈຳນວນດັ່ງກ່າວນັ້ນ ຈັກແມ່ນລົດຂອງໃຜແດ່ ເຊັ່ນ ຄັນໃດເປັນລົດຂອງປະທານປະເທດ, ຄັນໃດເປັນລົດຂອງນາຍົກ, ຄັນໃດເປັນລົດຂອງລັດຖະມົນຕີທ່ານໃດ… ຫຼືລົດຈຳນວນດັ່ງກ່າວນັ້ນເປັນລົດຂອງໃຜກັນແທ້? ອັນນີ້ເປັນຂໍ້ສົງໄສຂອງປະຊາຊົນ ເຊິ່ງຄວາມຈິງແທ້ນັ້ນ ພາກສ່ວນເຈົ້າໜ້າທີ່ທີ່ຮັບຜິດຊອບການປະມູນຂາຍລົດດັ່ງກ່າວນັ້ນຄົງຈະມີຂໍ້ມູນລະອຽດຢູ່ແລ້ວ ຕ່າງແຕ່ບໍ່ທັນໄດ້ເປີດເຜີຍສູ່ສາທາລະນະຊື່ໆ ບໍ່ຕ້ອງຫ່ວງວ່າຊິບໍ່ໂປ່ງໃສ.
ສັງຄົມໃຫ້ທັດສະນະວ່າ ຖ້າຫາກເປີດເຜີຍວ່າລົດຄັນໃດເຄີຍເປັນລົດປະຈຳຕຳແໜ່ງນາຍົກ, ລົດຄັນໃດເຄີຍເປັນລົດປະຈຳຕຳແໜ່ງລັດຖະມົນຕີທ່ານໃດ… ລົດຈຳນວນດັ່ງກ່າວອາດຈະຖືກຊື້ໄປຢ່າງໄວວາ ແລະໄດ້ລາຄາດີກວ່າປົກກະຕິກໍໄດ້. ໃນຂະນະດຽວກັນກໍແຈ້ງວ່າຖືກຊື້ໄປທໍ່ໃດ ໃຜເປັນຄົນຊື້ ເພາະນີ້ຄືສິ່ງທີ່ພໍ່ແມ່ປະຊາຊົນໃຫ້ຄວາມສົນໃຈຢາກຮູ້ ເນື່ອງຈາກໄລຍະທີ່ຜ່ານມານັ້ນພາກພູມໃຈໃນແຜນການ ແຕ່ລາຍລະອຽດນັ້ນຍັງບໍ່ມີໃຜຮູ້ວ່າຖືກປະມູນຊື້ໄປແລ້ວຫຼືບໍ່?