ເຈົ້າໜ້າທີ່ສຳຫຼວດທີ່ດິນຂອງກອງທັບຈີນ “ທ່ານ ຫວັງ ສີ” ທີ່ຕິດຢູ່ໃນປະເທດ ອິນເດຍ ດົນກວ່າ 50 ປີ ໄດ້ກັບຄືນສູ່ປະເທດ ຈີນ ແລ້ວ ເມື່ອວັນ ທີ 10 ກຸມພາ 2017 ທີ່ຜ່ານມາພ້ອມກັບລູກຊາຍ 1 ຄົນ ເມື່ອ ເດີນທາງມາຮອດສະໜາມບິນ ປັກກິ່ງ ກໍ່ໄດ້ຮັບການຕ້ອນຮັບຈາກຄອບຄົວ, ເພື່ອນ ແລະ ຜູ່ຄົນທີ່ມາລໍຖ້າຕ້ອນຮັບທີ່ສະໜາມບິນຢ່າງອົບອຸ່ນ.
ທ່ານ ຫວັງ ສີ ເລົ່າໃຫ້ຮູ້ວ່າ: “ເມື່ອ 50 ປີກ່ອນໃນລະຫວ່າງກໍ່ສ້າງທາງສຳລັບກອງທັບຈີນ ໃນເວລາຫວ່າງ ລາວໄດ້ຍ່າງອອກຈາກຄ້າຍ ເພື່ອໄປຍ່າງຫຼິ້ນກິນລົມຊົມວິວ ແຕ່ເກີດຍ່າງຫຼົງທາງຫາທາງກັບຄ້າຍບໍ່ໄດ້ ຈົນລາວໄດ້ໄປເຫັນລົດຂອງອົງກອນກາຊາດສາກົນ ດັ່ງນັ້ນ ລາວຈິ່ງໄດ້ໄປຂໍຄວາມຊ່ວຍເຫຼືອ ເຊິ່ງທາງອົງການກາຊາດສາກົນກໍ່ນຳຕົວລາວໄປສົ່ງໃຫ້ກອງທັບອິນເດຍ, ຫຼັງຈາກນັ້ນ ລາວກໍ່ຖືກຈັບຕິດຄຸກເປັນເວລາ 7 ປີ ກ່ອນຈະຖືກປ່ອຍຕົວ ຈາກນັ້ນຕຳຫຼວດຂອງອິນເດຍຍັງພາລາວໄປຢູ່ໝູ່ບ້ານ ຕິໂຣທີ ລັດມັດທະຍະ ປະເທດ ອິນເດຍ ເຊິ່ງນັບແຕ່ນັ້ນມາລາວກໍ່ບໍ່ໄດ້ຮັບອະນຸຍາດໃຫ້ເດີນທາງອອກນອກປະເທດອິນເດຍອີກເລີຍ, ໃນລະຫວ່າງທີ່ລາວອາໃສຢູ່ທີ່ອິນເດຍລາວໄດ້ສ້າງຄອບຄົວ ແຕ່ໄລຍະເວລາ 50 ປີມານີ້ ລາວບໍ່ໄດ້ຮັບອະນຸຍາດໃຫ້ໃຊ້ສັນຊາດຂອງ ອິນເດຍ ແລະ ເມື່ອບໍ່ດົນມານີ້ ກໍ່ມີນັກການທູດຈີນ ເຂົ້າຢ້ຽມຍາມລາວ ແລະ ບອກວ່າຈະປະສານງານຊ່ວຍເຫຼືອໃຫ້ລາວສາມາດເດີນທາງກັບເຂົ້າສູ່ປະເທດຈີນໄດ້ “
ແລະ ເມື່ອວັນທີ 10 ກຸມພາ ທີ່ຜ່ານມານີ້ ທ່ານ ຫວັງ ສີ ພ້ອມລູກຊາຍອີກໜຶ່ງຄົນໄດ້ເດີນທາງມາຮອດສະໜາມ ບິນ ປັກກິງ ໂດຍມີຍາດພີ່ນ້ອງ ເພື່ອນມິດສະຫາຍ ແລະ ຜູ່ຄົນຈຳນວນຫຼາຍມາຕ້ອນຮັບທີ່ສະໜາມບິນຢ່າງອົບອຸ່ນ ແລະ ຫຼັງຈາກນັ້ນ ທ່ານ ຫວັງ ແລະ ລູກຊາຍກໍ່ຈະເດີນທາງຕໍ່ໄປທີ່ເມືອງ ສຽນຫຍາງ ເຊິ່ງເປັນບ້ານເກີດຂອງລາວ.
ວິດິໂອຂ່າວຈາກ: 