ພິທີເປີດເທສະການດອກງິ້ວບານ ໃນວັນທີ 10 ກຸມພາ 2017 ໂດຍເຂົ້າຮ່ວມຂອງທ່ານ ຈູມມາລີ ໄຊຍະສອນ ອະດີດປະທານປະເທດ ທ່ານ ຄຳພັນ ເຜີຍຍະວົງ ທ່ານ ຈ້າວເຫວີຍ ແລະ ຕາງໜ້າຈາກບັນດາແຂວງໃກ້ຄຽງ ບັນດາແຂວງຂອງໄທ ມຽນມາ ຫວຽດນາມ ພ້ອມພາກສ່ວນກ່ຽວຂ້ອງ ແລະ ມວນຊົນ. ເຊິ່ງທາງອົງການປົກຄອງແຂວງບໍ່ແກ້ວ ຮ່ວມກັບເຂດເສດຖະກິດພິເສດສາມຫຼ່ຽມຄຳ ແລະ ເມືອງຕົ້ນເຜິ້ງ ໄດ້ຈັດເທສະການດອກງິ້ວບານ ຄັ້ງທີ 17 ເພື່ອສົ່ງເສີມການທ່ອງທ່ຽວ ທັງຢູ່ໃນໄລຍະກະກຽມສະເຫຼີມສະຫຼອງແຂວງບໍ່ແກ້ວ ຄົບຮອບ 35 ປີ ພິເສດການຈັດງານຄັ້ງນີ້ ຍັງໄດ້ເຊີນສະຖານີໂທລະພາບແຂວງເຮີໜານ ສປ ຈີນ ຈັດການແຂ່ງຂັນຊົກມວຍ ວຸຫຼິນເຟິງ ແລະ ການແຂ່ງຂັນຊົນງົວ ແຂ່ງມ້າ ເພື່ອໃຫ້ແຂກ ແລະ ມວນຊົນທີ່ເຂົ້າມາຮ່ວມງານໄດ້ຮັບຊົມ ເຊິ່ງເທສະການຄັ້ງນີ້ ຈັດຂຶ້ນແຕ່ວັນທີ 10-12 ກຸມພານີ້.
ທ່ານ ຄຳພັນ ເຜີຍຍະວົງ ເຈົ້າແຂວງບໍ່ແກ້ວ ກ່າວວ່າ: ເທສະການດອກງິ້ວບານ ຈັດຂຶ້ນເພື່ອປົກປັກຮັກສາ ແລະ ເສີມຂະຫຍາຍຮີດຄອງປະເພນີຂອງຊາວເມືອງຕົ້ນເຜິ້ງ ກໍ່ຄືຊາວແຂວງບໍ່ແກ້ວ ທີ່ເຄີຍປະຕິບັດກັນມາຕະຫຼອດໄລຍະຜ່ານມາ ພ້ອມນັ້ນ ຍັງເປັນການຊຸກຍູ້ສົ່ງເສີມການທ່ອງທ່ຽວ ແລະ ການຜະລິດສິນຄ້າຂອງປະຊາຊົນ ໃຫ້ເປັນຂະບວນຟົດຟື້ນ ນັບມື້ເພີ່ມຂຶ້ນເລື້ອຍໆ ແລະ ຍັງເປັນປີທີ່ແຂວງບໍ່ແກ້ວ ສຸມໃສ່ພັດທະນາພື້ນຖານໂຄງລ່າງ ເຮັດໃຫ້ເປັນສູນກາງທາງດ້ານການທ່ອງທ່ຽວ ໂດຍແນໃສ່ຊຸກຍູ້ສົ່ງເສີມການທ່ອງທ່ຽວແບບຍືນຍົງກັບບັນດາແຂວງ ແລະ ບັນດາປະເທດໃກ້ຄຽງກັບພາກພື້ນໃຫ້ນັບມື້ກວ້າງຂວາງ.
ການຈັດງານໃນເທື່ອນີ້ ປະກອບມີຫຼາຍກິດຈະກຳ ເຊັ່ນ: ການຄັດເລືອກນາງສາວດອກງິ້ວບານ ການສະແດງຊຸດຊົນເຜົ່າ 13 ຊົນເຜົ່າຂອງແຂວງບໍ່ແກ້ວ ການສະແດງສິລະປະວັນນະຄະດີ ທີ່ປະກອບມີນັກຮ້ອງຈາກສູນກາງ ຄະນະສິລະປະຂອງແຂວງບໍ່ແກ້ວ ນອກນັ້ນຍັງມີຄະນະສິລະປະຈາກແຂວງສີບສອງພັນນາ ສປ ຈີນ ໄທ ແລະ ມຽນມາ ລວມທັງໝົດ 13 ຄະນະ ມີການວາງສະແດງ ແລະ ຈຳໜ່າຍສິນຄ້ານຳອີກ.
ແຫຼ່ງຂ່າວ: ວຽງຈັນໃໝ່