ທ້າວ ໄບຣອັນ ຄົນອົສຕຣາລີ ໄດ້ບອກໃຫ້ນັກຂ່າວເຮົາຮູ້ວ່າ ມີຄົນຕ່າງປະເທດຫຼາຍຄົນທີ່ຕັ້ງໃຈວ່າຈະມາເຮັດທຸລະກິດ ໃນລະດັບນ້ອຍ-ກາງຢູ່ລາວຫຼາຍຄົນຖອດໃຈກັບບ້ານ ເມື່ອພົບກັບລະບຽບ-ຂັ້ນຕອນການຂຶ້ນທະບຽນວິສາຫະກິດທີ່ລະອຽດແລະຫຼາຍຂັ້ນຕອນຂອງລາວ.
ແຫຼ່ງຂ່າວບອກວ່າ ການຈົດທະບຽນສ້າງຕັ້ງວິສາຫະກິດຢູ່ລາວ ແມ່ນມີຄວາມລະອຽດສູງ ມີເອກະສານຫຼາຍຊຸດ ໂດຍສະເພາະແມ່ນຄົນຕ່າງປະເທດ ເຊິ່ງອາດຈະມີຫຼາຍກວ່າ 10 ລາຍການ ເຊັ່ນ ໃບສະເໜີຈອງຊື່ວິສາຫະກິດ, ໃບຄຳຮ້ອງຂຶ້ນທະບຽນວິສາຫະກິດ, ກົດລະບຽບຂອງບໍລິສັດ, ສັນຍາສ້າງຕັ້ງບໍລິສັດ, ບົດບັນທຶກກອງປະຊຸມສ້າງຕັ້ງບໍລິສັດ, ໃບຢັ້ງຢືນທີ່ຕັ້ງສຳນັກງານ, ບົດສະເໜີຫຍໍ້, ຄຳປະຕິຍານພາຍຫຼັງທີ່ໄດ້ຮັບການຂຶ້ນທະບຽນວິສາຫະກິດ, ໃບມອບສິດໃຫ້ຜູ້ພົວພັນເອກະສານ (ບາງກໍລະນີ), ໜັງສືແຕ່ງຕັ້ງຜູ້ຕາງໜ້າຜູ້ຖືຫຸ້ນ (ບາງກໍລະນີ), ໃບສັນຍາເຊົ່າສະຖານທີ່ (ໃນກໍລະນີມີການເຊົ່າ)…
ການມີເອກະສານຫຼາຍໆ ດັ່ງກ່າວຂ້າງເທິງນັ້ນ ຜູ້ຂຽນຄິດວ່າແມ່ນຄວາມຖືກຕ້ອງແລະຈຳເປັນດ້ວຍຫຼາຍເຫດຜົນ ທັງຮັບປະກັນທາງດ້ານຄວາມສະຫງົບ, ເປັນການທົດລອງໃຈຂອງນັກລົງທຶນວ່າຈະມີຈິດໃຈແນ່ວແນ່ສໍ່າໃດ, ເປັນການຢັ້ງຢືນວ່າບໍລິສັດທີ່ສ້າງຕັ້ງຂຶ້ນນັ້ນມີຕົວຕົນແທ້ ແລະຂໍ້ສຳຄັນອື່ນໆ
ແຕ່ສ່ວນດ້ານນັກທຸລະກິດພັດວ່າ ການມີເອກະສານຫຼາຍໆ ແບບນັ້ນ ມັນໄດ້ສ້າງຄວາມຫຍຸ້ງຍາກໃຫ້ແກ່ການຂຶ້ນທະບຽນ ເຊິ່ງອາດຈະເປັນສາເຫດໃຫ້ເກີດມີການດຳເນີນທຸລະກິດແບບບໍ່ຂຶ້ນທະບຽນ ຫຼືບໍ່ກໍເປັນສາເຫດໃຫ້ເກີດມີການຊື້ຈ້າງຈອບອອຍເກີດຂຶ້ນໃນຂະບວນການຈົດທະບຽນບໍລິສັດ ຫຼືຈຳເປັນຕ້ອງໄດ້ວ່າຈ້າງບໍລິສັດຊິບປິງແລ່ນຂຶ້ນທະບຽນແທນ ອັນນັ້ນເປັນການເພິ່ມຄ່າໃຊ້ຈ່າຍຕັ້ງແຕ່ຍັງບໍ່ໄດ້ຂຶ້ນທະບຽນ.
ໃນບັນດາເອກະສານທີ່ກ່າວມາຂ້າງເທິງນັ້ນ ນັກທຸລະກິດຕ່າງປະເທດບອກວ່າເກືອບທັງໝົດກໍບໍ່ເປັນອຸປະສັກ ແຕ່ເອກະສານຊຸດທີ່ເປັນອຸສັກກວ່າໝູ່ນັ້ນແມ່ນ ”ໃບສັນຍາການເຊົ່າສະຖານທີ່”. ເຂົາເຈົ້າບອກວ່າ ການເຊົ່າສະຖານທີ່ເຮັດທຸລະກິດສ່ວນຫຼາຍຕ້ອງສັນຍາເຊົ່າ 1 ປີຂຶ້ນໄປ ແລະຄ່າເຊົ່າກໍບໍ່ແມ່ນເປັນເງິນຈຳນວນໜ້ອຍ ຖ້າຫາກວ່າເຊົ່າສະຖານທີ່ໄປແລ້ວ ແຕ່ວິສາຫະກິດບໍ່ໄດ້ຮັບອະນຸຍາດ ກໍຈະເປັນການເສຍເງິນຄ່າເຊົ່າສະຖານທີ່ໄປໂດຍບໍ່ມີປະໂຫຍດ. ນີ້ເປັນສາເຫດສຳຄັນໜຶ່ງທີ່ເຮັດໃຫ້ນັກທຸລະກິດຂະໜາດນ້ອຍ-ກາງຈາກຕ່າງປະເທດຕັດສິນໃຈລົ້ມເລີກການຈົດທະບຽນວິສາຫະກິດ ແລະຖອນໂຕກັບໄປ.
ຜູ້ຄ້າຂາຍທີ່ກຳລັງຈະຈົດທະບຽນວິສາຫະກິດບອກວ່າ ຖ້າຫາກການຈົດທະບຽນວິສາຫະກິດຫຼຸດຂັ້ນຕອນລົງ ຫຼືສາມາດສະໝັກຜ່ານລະບົບອອນລາຍໄດ້ຄືກັບຢູ່ຕ່າງປະເທດ ຈະເຮັດໃຫ້ເກີດມີວິສາຫະກິດເກີດຂຶ້ນຢ່າງຫຼວງຫຼາຍ, ຜູ້ຄ້າຂາຍຈະເຂົ້າສູ່ລະບົບທີ່ລັດສາມາດຄຸ້ມຄອງໄດ້, ລັດສາມາດເກັບພາສີຈາກການດຳເນີນກິດຈະການໄດ້ຫຼາຍຂຶ້ນ…