ສຳນັກຂ່າວຕ່າງປະເທດ ລາຍງານໃນວັນທີ 9 ກຸມພານີ້ວ່າ ທ່ານ ຮຸນແຊນ ນາຍົກລັດຖະມົນຕີກຳປູເຈຍ ໄດ້ໃຫ້ຄຳໝັ້ນສັນຍາ ຈະເພີ່ມທະວີມາດຕະການປາບປາມຢາເສບຕິດ ຫລັງຈາກທີ່ສາມາດຈັບກຸມຜູ້ຖືກສົງໄສ ຄະດີກ່ຽວຂ້ອງກັບຢາເສບຕິດໄດ້ເຖິງ 2,482 ຄົນພາຍໃນເດືອນດຽວ.  ມາດຕະການປາບປາມຢາເສບຕິດຄັ້ງໃຫຍ່ດັ່ງກ່າວນີ້ ໄດ້ເລີ່ມຂຶ້ນຕັ້ງແຕ່ເດືອນມັງກອນທີ່ຜ່ານມາ ຢູ່ປະເທດກຳປູເຈຍ ຊຶ່ງຄ້າຍຄືກັນກັບການເຮັດສົງຄາມກວາດລ້າງຢາເສບຕິດໃນຟິລິລປິນ ພາຍໃຕ້ການນຳຂອງ ທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ, ແຕ່ທ່ານ ຮຸນແຊນ ກ່າວວ່າ ການປາບປາມໃນກຳປູເຈຍນັ້ນ ຈະບໍ່ນຳໄປສູ່ການນອງເລືອດຄືຢູ່ຟິລິບປິນ ທີ່ມີປະຊາຊົນກວ່າ 7,000 ຄົນ ຖືກສັງຫານ ພາຍໃນໄລຍະ 7 ເດືອນຜ່ານມາ.