ຂປລ. ໃນວັນທີ 8 ກຸມພາ 2017 ນີ້ ທີ່ກະຊວງການຕ່າງປະເທດ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດແຫ່ງ ສປປລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງທ່ານ Pablo Antonio Rodriguez Vidal ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສກູບາ ປະຈໍາ ສປປ ລາວ ຄົນໃໝ່ ພາຍຫລັງທີ່ໄດ້ຍືນສານຕາຕັ້ງ ຕໍ່ປະທານປະເທດແຫ່ງ ສປປ ລາວ.
ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ການດໍາລົງຕໍາ ແໜ່ງ ເປັນເອກອັກຄະລັດຖະທູດ ວິສາມັນຜູ້ມີອໍານາດເຕັມແຫ່ງ ສ ກູບາ ປະຈໍາ ສປປ ລາວ ຄົນໃໝ່ຂອງທ່ານ Pablo Antonio Rodriguez Vidal ແລະ ໄດ້ຕີລາຄາສູງ ການພົວພັນສອງຝ່າຍ ແມ່ນມີການພົວພັນກັນ ຢ່າງເປັນປົກກະຕິ ແລະ ເປັນການພົວພັນ ທີ່ມີມູນເຊື້ອນໍາກັນ ຕະຫລອດມາ ໂດຍສະເພາະ ໃນໂອກາດສໍາຄັນຕ່າງໆ ການນໍາຂັ້ນສູງ ຂອງສອງປະເທດ ກໍໄດ້ສົ່ງສານອວຍພອນເຊິ່ງກັນ ແລະ ກັນ, ສະແດງຄວາມເສຍໃຈ ອີກເທື່ອໜຶ່ງຕໍ່ການລ່ວງລັບໄປ ຂອງສະຫາຍ ຟີເດນ ກາສໂຕຼ ຣຸດສ໌ ເຊິ່ງຖືເປັນການສູນເສຍ ຜູ້ນໍາການປະຕິວັດທີ່ຍິ່ງໃຫຍ່ ຂອງພັກ–ລັດຖະບານ ແລະ ປະຊາຊົນອ້າຍນ້ອງ ທີ່ເປັນການສູນເສຍເພື່ອນມິດສະຫາຍ ຮ່ວມອຸດົມການ ຂອງພັກ–ລັດຖະບານ ປະຊາຊົນລາວອີກດ້ວຍ ພ້ອມນີ້ ທ່ານ ສະເຫລີມໄຊ ກົມມະສິດ ຍັງໄດ້ສະເໜີທ່ານທູດຄົນໃໝ່ ໃຫ້ການຊ່ວຍເຫລືອ ໃນການພັດທະນາຊັບພະຍາກອນມະນຸດຂອງລາວ ໃນຮູບການໃຫ້ທຶນການສຶກສາ ໃຫ້ແກ່ນັກສຶກສາລາວ ແລະ ນັກການທູດໜຸ່ມນ້ອຍ, ດ້ານພາສາຕ່າງປະເທດ, ເຕັກນິກວິຊາສະເພາະ ໃນໄລຍະສັ້ນ ແລະ ຍາວໃນອະນາຄົດ, ສະເໜີໃຫ້ສືບຕໍ່ຊ່ວຍຊຸກຍູ້ ໃຫ້ມີການແລກປ່ຽນ ຢ້ຽມຢາມເຊິ່ງກັນ ແລະ ກັນ ຂອງການນໍາຂັ້ນສູງ ລະຫວ່າງ ສອງປະເທດ ເພື່ອເປັນການເສີມຂະຫຍາຍ ການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ນໍາກັນ ຫລື ຂະແໜງການຮ່ວມມືອື່ນໆ ທີ່ສອງຝ່າຍມີ ຄວາມສົນໃຈຮ່ວມກັນ ໃນໂອກາດນີ້ ທ່ານ ສະເຫລີມໄຊ ກົມມະສິດ ຍັງໄດ້ແຈ້ງຜົນສໍາເລັດ ຂອງການເປັນເຈົ້າພາບ ຈັດກອງປະຊຸມສໍາຄັນຕ່າງໆ ໂດຍສະເພາະ ການເປັນປະທານ ຈັດກອງປະຊຸມ ສຸດຍອດອາຊຽນ ຄັ້ງທີ 28-29 ແລະ ກອງປະຊຸມປິ່ນອ້ອມຕ່າງໆ ໃນລະຫວ່າງວັນທີ6-8 ກັນຍາ 2016 ຜ່ານມາ, ອວຍພອນໃຫ້ສະຫາຍທູດ ປະສົບຜົນສໍາເລັດ ໃນການປະຕິບັດໜ້າທີ່ ວຽກງານຂອງຕົນຢູ່ ສປປ ລາວ
ທ່ານ Pablo Antonio Rodriguez Vidal ໄດ້ສະແດງ ຄວາມຂອບໃຈຕໍ່ທ່ານ ສະເຫລີມໄຊ ກົມມະສິດ ທີ່ໄດ້ໃຫ້ຕ້ອນຮັບໃນຄັ້ງນີ້ ພ້ອມທັງ ສະແດງຄວາມຂອບໃຈ ຕໍ່ການສະໜັບສະໜູນຂອງ ສປປ ລາວ ໃນໄລຍະຜ່ານມາ ແລະ ສະເໜີໃຫ້ສືບຕໍ່ ການສະໜັບສະໜູນ ເຊິ່ງກັນ ແລະ ກັນ ໃນເວທີສາກົນ, ຢືນຢັນການພົວພັນຮ່ວມມື ລະຫວ່າງ ສປປ ລາວ ແລະ ສ ກູບາ ຖານສະຫາຍອ້າຍນ້ອງ ຈະບໍ່ມີການປ່ຽນແປງ ໃນນາມເອກອັກຄະລັດຖະທູດຜູ້ມີອໍານາດເຕັມແຫ່ງ ສ ກູບາ ປະຈໍາ ສປປ ລາວ ຈະເຮັດສຸດຄວາມສາມາດ ໃນການເສີມຂະຫຍາຍ ແລະ ເພີ່ມທະວີການພົວພັນຮ່ວມມື ອັນດີທີ່ເປັນມູນເຊື້ອ ລະຫວ່າງ ສອງປະເທດ ລາວ–ສ ກູບາ ໂດຍສະເພາະ ຜັນຂະຫຍາຍຜົນການຢ້ຽມຢາມ ສ ກູບາ ຂອງທ່ານປະທານປະເທດ ໃນໄລຍະຜ່ານມາທັງຝ່າຍພັກ ແລະ ຝ່າຍລັດ.
ແຫລ່ງຂ່າວ:
