ຂປລ. ເພື່ອສຸມໃສ່ປຶກສາຫາລື, ຄົ້ນຄ້ວາ ແລະ ພິຈາລະນາ ບັນຫາສຳຄັນຕ່າງໆ ໃນການກຳນົດທິດທາງ ການເຄື່ອນໄຫວວຽກງານ ໃນ 4 ປີຕໍ່ໜ້າ ແລະ ແຜນວຽກຈຸດສຸມ ປະຈຳປີ 2017 ຂອງກຳມາທິການຍຸຕິທຳ ສະນັ້ນ ໃນວັນທີ 7 ກຸມພາ 2017 ທີ່ສະພາແຫ່ງຊາດ ຈຶ່ງໄດ້ຈັດກອງປະຊຸມ ຄົບຄະນະ ຄັ້ງທີ 1 ຂອງກຳມາທິການຂຶ້ນ ໂດຍການເປັນປະທານຂອງ ທ່ານ ນາງ ບົວຄຳ ທິບພະວົງ ປະທານກຳມາທິການຍຸຕິທຳ ແລະ ມີທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ຜູ້ຊີ້ນຳກຳມາທິການຍຸຕິທຳ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ບົວຄຳ ທິບພະວົງ ໄດ້ໃຫ້ຮູ້ວ່າ: ກອງປະຊຸມດັ່ງກ່າວແມ່ນ ເພື່ອປະກອບຄຳຄິດຄຳເຫັນ ໃສ່ບົດສະຫລຸບລາຍງານ ການເຄື່ອນໄຫວວຽກງານ ນັບແຕ່ກອງປະຊຸມ ຄັ້ງປະຖົມມະລຶກເຖິງປັດຈຸບັນ, ທິດທາງວຽກງານ 4 ປີ (2017-2020) ແລະ ວຽກງານຈຸດສຸມ ປະຈຳປີ 2017 ຂອງກຳມາທິການຍຸຕິທຳ ໂດຍສະເພາະ ແມ່ນວຽກງານຕິດຕາມການກວດກາ ການຈັດຕັ້ງປະຕິບັດ ລັດຖະທຳມະນູນ ແລະ ກົດໝາຍ, ວຽກງານແກ້ໄຂຄຳຮ້ອງ ຂໍຄວາມເປັນທຳ, ຄົ້ນຄວ້າທາບທາມຄຳເຫັນ ຂອງສະມາຊິກສະພາແຫ່ງຊາດ ໃສ່ຮ່າງປັບປຸງກົດໝາຍວ່າດ້ວຍ ອົງການໄອຍະການປະຊາຊົນ ແລະ ກົດໝາຍວ່າດ້ວຍ ສານປະຊາຊົນ, ພ້ອມເຜີຍແຜ່ມະຕິ ຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກຳມາທິການຍຸຕິທຳ ແລະ ລະບຽບຂອງສອງກົມ ທີ່ເປັນເສນາທິການ ຂອງກຳມາທິການຍຸຕິທຳ.
ທ່ານ ນາງ ບົວຄຳ ທິບພະວົງ ຍັງໃຫ້ຮູ້ຕື່ມອີກວ່າ: ໃນການດຳເນີນ ກອງປະຊຸມດັ່ງກ່າວ ແມ່ນຈະໄດ້ຮັບຟັງ ການລາຍງານ ກ່ຽວກັບການ ຈັດຕັ້ງປະຕິບັດວຽກງານ ຂອງອົງການໄອຍະການ ປະຊາຊົນສູງສຸດ, ສານປະຊາຊົນສູງສຸດ, ກະຊວງຍຸຕິທຳ ກ່ຽວກັບສະພາບການຈັດຕັ້ງປະຕິບັດຄຳຕັດສິນຂອງສານ ແລະ ການເຄື່ອນໄຫວ ຂອງສະພາທະນາຍຄວາມ; ພ້ອມທັງຮັບຟັງ ການໂອ້ລົມຂອງຂັ້ນເທິງ ຕໍ່ວຽກງານຂອງ ກຳມາທິການຍຸຕິທຳ.
ແຫລ່ງຂ່າວ:
