ສຳນັກຂ່າວຕ່າງປະເທດ ລາຍງານໃນວັນທີ 6 ກຸມພານີ້ວ່າ ກົມພາສີຂອງສະວິດ ໄດ້ອອກມາເປີດເຜີຍລະບຸ ໃນເດືອນທັນວາປີ 2016 ທີ່ຜ່ານມາ ປະລິມານການສົ່ງອອກຄຳແທ່ງ ຈາກປະເທດສະວິດ ໄປຍັງປະເທດຈີນ ມີຈຳນວນສູງຂຶ້ນເປັນ 158 ໂຕນ ຈາກໃນເດືອນພະຈິກກອ່ນໜ້າ ມີປະລິມານລວມພຽງ 30.6 ໂຕນເທົ່ານັ້ນ.

ທ່ານ ຈາງ ເປົ່າສຽງ ນັກວິເຄາະດ້ານຄຳ ໃນນະຄອນຫລວງປັກກິ່ງໃຫ້ຄວາມເຫັນວ່າ ການນຳເຂົ້າຄຳຈາກປະເທດສະວິດ ເພີ່ມສູງຂຶ້ນ ອາດເກີດຈາກຄວາມຕ້ອງການຊື້ຄຳ ໃນໄລຍະກ່ອນເທດສະການກຸດຈີນ ແລະ ການຊື້ຄຳສຳຮອງຂອງ ທະນາຄານກາງ ແຫ່ງ ປະເທດຈີນ ເພື່ອຫລຸດຜ່ອນຄວາມສ່ຽງຂອງຕະຫລາດຮຸ້ນ ແລະ ປັດໄຈພາຍນອກອື່ນໆ ໂດຍທະນາຄານກາງຂອງຈີນ ອາດກຳລັງເພີ່ມການຖືຄອງຄຳ ເພື່ອແທນເງິນໂດລາສະຫະລັດຯ ເນື່ອງຈາກຄວາມບໍ່ແນ່ນອນທາງເສດຖະກິດ ລະຫວ່າງຈີນ ແລະ ສະຫະລັດອາເມຣິກາ ຫລັງຈາກການກ້າວຂຶ້ນສູ່ຕຳແໜ່ງຂອງ ປະທານາທິບໍດີ ໂດນັນ ທຣັມ.