ສຳນັກຂ່າວຣອຍເຕີ້ ລາຍງານໃນວັນທີ 1 ກຸມພາຜ່ານມາ ໂດຍອ້າງອີງລາຍງານຈາກ ສະຖານີໂທລະພາບ ແລະ ວິທະຍຸຊານຕົງຂອງຈີນ ເມື່ອວັນອັງຄານທີ 31 ມັງກອນທີ່ຜ່ານມາ ລະບຸວ່າ ການຕໍ່ກຳປັ່ນບັນທຸກເຮືອບິນ ຊານຕົງ (Shandong) ຊຶ່ງເປັນກຳປັ່ນບັນທຸກເຮືອບິນລຳທີສອງຂອງຈີນ ໄດ້ມີຄວາມຄືບໜ້າເປັນຮູບເປັນຮ່າງຂຶ້ນມາແລ້ວ ຫລັງຈາກທີ່ເລີ່ມລົງມືສ້າງເມື່ອປີ 2014 ຫລື ເມື່ອສອງປີເກົ້າເດືອນທີ່ຜ່ານມາ ໂດຍບໍ່ທັນໄດ້ເປີດເຜີຍລາຍລະອຽດ ຄາດໝາຍກໍ່ສ້າງສຳເລັດເທື່ອ.
ກ່ອນໜ້ານີ້ ກະຊວງປ້ອງກັນປະເທດຈີນ ໄດ້ອອກມາຖະແຫລງວ່າ ກຳປັ່ນບັນທຸກເຮືອບິນ ຊານຕົງ ກຳລັງຖືກຕໍ່ຂຶ້ນທີ່ທ່າເຮືອ ໃນເມືອງຕ້າຫລຽນ ແຂວງຫລຽວໜິງ ທາງພາກຕາເວັນອອກສຽງເໜືອຂອງຈີນ ໂດຍຖືເປັນກຳປັ່ນບັນທຸກເຮືອບິນ ທີ່ຈີນລົງມືກໍ່ສ້າງດ້ວຍຕົນເອງ ຫລັງຈາກທີ່ກຳປັ່ນບັນທຸກເຮືອບິນລຳທຳອິດຊື່ ຫລຽວໜິງ (Liaoning) ໄດ້ຖືກຊື້ຕໍ່ມາຈາກອູແກຣນ ເມື່ອປີ 1997 ແລ້ວຖືກຍົກເຄື່ອງປັບປຸງໃໝ່ຢູ່ປະເທດຈີນ.
ຕິດຕາມເຮົາທາງFacebook ກົດຖືກໃຈເລີຍ!