ສຳນັກຂ່າວຕ່າງປະເທດ ລາຍງານໃນວັນທີ 1 ກຸມພາຜ່ານມານີ້ວ່າ ເຈົ້າໜ້າທີ່ຕຳຫລວດມຽນມາ ສາມາດຍຶດຢາບ້າໄດ້ຫລາຍເປັນປະຫວັດການ ສູງເຖິງ 98 ລ້ານເມັດ ໃນປີ 2016 ທີ່ຜ່ານມາ ຊຶ່ງຫລາຍກວ່າເກືອບ 2 ເທົ່າ ຈາກທີ່ເຄີຍຍຶດໄດ້ໃນປີ 2015, ນອກຈາກນີ້ ຍັງສາມາດຍຶດເຮໂຣອີນໄດ້ອີກ 759 ກິໂລກຣາມ, ຝິ່ນ 945 ກິໂລກຣາມ ແລະ ຢາໄອ້ອີກ 2,464 ກິໂລກຣາມ ພາຍໃນປີ 2016, ສ່ວນການດຳເນີນຄະດີ ທີ່ກ່ຽວຂ້ອງກັບຢາເສບຕິດ ໄດ້ເພີ່ມສູງຂຶ້ນຈາກ 8,800 ຄະດີ ໃນປີ 2015 ເປັນ 13,500 ຄະດີ ໃນປີ 2016.
ທັງນີ້ ມຽນມາຖືເປັນໜຶ່ງໃນປະເທດທີ່ຜະລິດຢາເສບຕິດລາຍໃຫຍ່ຂອງໂລກ ເປັນຈຳນວນມະຫາສານ ຊຶ່ງສ່ວນໃຫຍ່ຖືກສົ່ງອອກໄປຂາຍ ໃນພາກພື້ນອາຊີ ແລະ ອື່ນໆ ໂດຍຢາເສບຕິດສ່ວນຫລາຍ ຖືກຜະລິດຂຶ້ນໃນເຂດພື້ນທີ່ຊາຍແດນ, ເຂດຫ່າງໄກສອກຫລີກ ຊຶ່ງກອງກຳລັງຊົນເຜົ່າສ່ວນນ້ອຍ ຄວບຄຸມຢູ່.
ຕິດຕາມເຮົາທາງFacebook ກົດຖືກໃຈເລີຍ!