ຄວາມຄືບໜ້າຍິງລາວຂົນເງິນ

ຜົນການກວດກາທະນະບັດສະກຸນບາດໄທ 30 ລ້ານທີ່ຕຳຫຼວດໄທຢຶດໄດ້ຈາກຍິງລາວມື້ວານນີ້ທີດ່ານມຸກດາຫານ-ສະຫວັນນະເຂດ ເປັນເງິນແທ້ ນັກທຸລະກິດລາວສະແດງໂຕເປັນເຈົ້າຂອງ ພ້ອມສະແດງຫຼັກຖານປ່ຽນເງິນ 1 ລ້ານໂດລາ ແຕ່ເປັນຊື່ເອື້ອຍ ອ້າງເຫດຜົນວ່າເພື່ອໂອນເງິນຊື່ເຄື່ອງດື່ມຊູກຳລັງຂອງໄທໄປຂາຍ ແຕ່ຕຳຫຼວດຍັງບໍ່ເຊື່ອ ແລະຈະຕ້ອງກວດກາຕື່ມອີກກ່ອນ.

ຄວາມຄືບໜ້າກໍລະນີເຈົ້າໜ້າທີ່ປະຈຳດ່ານພາສີມຸກດາຫານ ຈັບຍິງຊາວລາວທີ່ຂັບລົດຂົນເງິນໄທ 30 ລ້ານບາດ ກຽມຂ້າມຊາຍແດນມາຍັງປະເທດລາວ ໂດຍຈັບໄດ້ທີ່ດ່ານຂົວມິດຕະພາບລາວ-ໄທ 2 ສະຫວັນນະເຂດ-ມຸກດາຫານ ເຊິ່ງເປັນການຜິດກົດໝາຍໄທ ຫ້າມເອົາເງິນອອກນອກປະເທດເກີນ 5 ແສນບາດ.

ຫຼ້າສຸດ ທ່ານ ສໍລະສິດ ລິດສອນໄກ ຮອງເຈົ້້າແຂວງ(ຈັງຫວັດ) ມຸກດາຫານ ພ້ອມດ້ວຍ ພັນເອກ ກິດຕິສັກ ຈຳລັດປະເສີດ ຮອງ ຜູ້ບັນຊາການຕຳຫຼວດ ມຸກດາຫານ ມາກວດສອບດ່ານມຸກດາຫານ ໂດຍເຊີນເຈົ້າໜ້າທີ່ທະນາຄານກຸງໄທ ເຈົ້າໜ້າທີ່ທະນາຄານກຸງສີອະຍຸດທະຍາ ແລະກອງພິສູດຫຼັກຖານກວດກາທະນະບັດທັງໝົດ ຜົນການກວດກາພົບວ່າທັງໝົດເປັນທະນະບັດຂອງແທ້.

ຂະນະທີ່ກຳລັງກວດກາຢູ່ນັ້ນ ໄດ້ມີ ທ້າວ ຄຳຈັນ ສິລິຍະພັນ ປະຊາຊົນລາວ ມາສະແດງໂຕເປັນເຈົ້າຂອງເງິນ ພ້ອມເອົາຫຼັກຖານເອກະສານການປ່ຽນເງິນໂດລາ 1 ລ້ານຫຼຽນ ເມື່ອວັນທີ 7 ສິງຫາ 2014 ມາສະແດງຕໍ່ເຈົ້າໜ້າທີ່ຕຳຫຼວດ ແລະກວດກາຫຼັກຖານການແລກປ່ຽນເງິນປາກົດວ່າເປັນຊື່ຂອງນາງ ບຸນຮຽງ ຈັນໂທ ບໍ່ແມ່ນຂອງທ້າວຄຳຈັນ ສິລິຍະພັນ.

ທ້າວຄຳຈັນ ອ້າງວ່ານາງບຸນຮຽງ ເປັນເອື້້ອຍຂອງຕົນເອງ ແລະເງິນທັງໝົດເປັນຂອງເອື້ອຍ ເຊິ່ງໃຫ້ຕົນເອງມາຍື່ນແທນເນື່ອງຈາກເອື້ອຍກຳລັງເຂົ້າປົວພະຍາດຢູ່ໂຮງໝໍ ເຊິ່ງເຈົ້າໜ້າທີ່ຈະໄດ້ກວດກາແລະສອບສວນອີກ ເນື່ອງຈາກຜູ້ມາສະແດງຕົນເປັນນັກທຸລະກິດຫຼາຍກິດຈະການໃນ ສປປລາວ.

ແນວໃດກໍຕາມ, ເຈົ້າໜ້າທີ່ຕຳຫຼວດໄທ ມຸກດາຫານ ຍັງບໍ່ເຊື່ອໃນທີ່ມາຂອງເງິນທັງ 30 ລ້ານບາດວ່າເປັນໄປຕາມຄຳໃຫ້ການຂອງທ້າວຄຳຈັນ ທີ່ໃຫ້ການວ່າເອື້້ອຍເປັນເຈົ້າຂອງເງິນໃຊ້ເງິນໂດລາມາແລກປ່ຽນເພື່ອຈະໂອນໄປຊື້ເຄື່ອງດື່ມຊູກຳລັງຍີ່ຫໍ້ໜຶ່ງຂອງໄທເພື່ອເອົາມາຂາຍຢູ່ລາວ ໂດຍເຈົ້າໜ້າທີ່ຕຳຫຼວດໄດ້ເກັບຫຼັກຖານທັງໝົດໄວ້ເພື່່ອກວດສອບຫາທີ່ມາຂອງເງິນດັ່ງກ່າວອີກເທື່ອໜຶ່ງ. ຂະນະທີ່ຜົນການສອບສວນນາງມະຕະພອນ ໂຄ້ພອນສະກຸນ ຜູ້ຖືກຫາໃຫ້ການວ່າ ຕົນເອງລູກນ້ອງຂອງນາງບຸນຮຽງ ຈັນໂທ ແລະເງິນດັ່ງກ່າວເປັນຂອງທ້າວຄຳຈັນ ສິລິຍະພັນ.

ໂດຍເຈົ້າໜ້າທີ່ໄດ້ຕັ້ງຂໍ້ກ່າວຫາກະທຳຄວາມຜິດຖານລັກລອບເອົາເງິນຕາ (ສະກຸນບາດໄທ) ເຊິ່ງເປັນຂອງຕ້ອງຈຳກັດ ອອກໄປນອກປະເທດ ເປັນການກະທຳຜິດກ່ຽວກັບການລັກລອບໜີພາສີຕາມກົດໝາຍວ່າດ້ວຍພາສີອາກອນ ແລະເປັນຄວາມຜິດຖານຕາມລັດຖະດຳລັດ ປ້ອງກັນແລະປາບປາມການຟອກເງິນຂອງໄທ.