ວັນ​ທີ 26 ມັງກອນ 2017 ທີ່​ກະຊວງ​ການ​ຕ່າງປະເທດ ທ່ານ ສະເຫຼີມ​ໄຊ ກົມ​ມະ​ສິດ ລັດ​ຖະມົນຕີ​ກະຊວງ​ການ​ຕ່າງປະເທດ ໄດ້​ໃຫ້​ກຽດ​ຕ້ອນຮັບ​ການ​ເຂົ້າຢ້ຽມ​ຄຳນັບ​ອຳ​ລາ​ຂອງ​ທ່ານ ກວນ ຫົວ​ປິງ ເອກ​ອັກ​ຄະ​ລັດ​ຖະທູດ​ຈີນ​ປະຈຳ​ລາວ ໃນ​ໂອກາດ​ທີ່ສຳເລັດ​ໜ້າທີ່​ການ​ທູດ​ຢູ່​ລາວ.

ໂອກາດ​ນີ້ ທ່ານ​ລັດຖະມົນຕີ ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ໜ້າທີ່​ການ​ທູດ​ຢູ່​ລາວຂອງ​ທ່ານ​ທູດ ເຊິ່ງ​ຕະຫຼອດ​ປະຕິ​ບັດ​ໜ້າທີ່​ການ​ທູດ​ທ່ານ​ທູດ​ເອງ ໄດ້​ປະກອບສ່ວນ​ຢ່າງ​ຕັ້ງໜ້າ​ ໃນການ​ເພີ່ມ​ພູນ​ຄູນ​ສ້າງ​ສາຍ​ພົວພັນ​ມິດຕະພາບ​ອັນ​ເປັນ​ມູນເຊື້ອ ແລະ ການ​ເປັນ​ຄູ່​ຮ່ວມ​ຍຸດ​ທະສາດ​ຮອບດ້ານ ໂດຍ​ສະເພາະ ການ​ສືບຕໍ່​ຊຸກຍູ້​ຈັດ​ຕັ້ງ​ປະ​ບັດການ​ຕົກລົງ​ຂອງ​ຜູ້ນຳ​ສອງ​ປະເທດ ລາວ-ຈີນ.

ນອກ​ນີ້ ທ່ານ​ຍັງ​ໄດ້​ປະກອບສ່ວນ​ເຂົ້າ​ໃນ​ວຽກ​ງານ​ຈັດ​ກິດ​ຈະກຳ​ ສະເຫຼີມສະຫຼອງ​ວັນ​ສ້າງຕັ້ງສາຍ​ພົວພັນ​ການ​ທູດ ລາວ-ຈີນ ຄົບຮອບ 55 ປີ ສະໜັບສະໜູນການ​ເປັນ​ປະທານ​ອາ​ຊຽນ​ຂອງລາວ ການ​ພົວພັນ​ຮ່ວມ​ມື​ດ້ານເສດຖະກິດ-ການ​ຄ້າ​ສອງ​ປະເທດ ກໍ່​ຄືການ​ຊຸກຍູ້​ໃຫ້​ວິ​ສະຫະກິດ​ຈີນ​ມາ​ລົງທຶນ​ຢູ່​ລາວ ເປັນຕົ້ນ ໂຄງການ​ກໍ່ສ້າງ​ເຂື່ອນ​ໄຟຟ້າ​ນ້ຳຕົກ ກະສິກຳ ແລະ ພື້ນຖານ​ໂຄງລ່າງ ເຮັດ​ໃຫ້​ຈີນ​ກາຍເປັນ​ອັນ​ດັບ 1 ການ​ລົງທຶນ​ຕ່າງປະເທດ ແລະ ເປັນ​ຄູ່​ຄ້າ​ອັນ​ດັບ 2 ຂອງ​ລາວ ພ້ອມ​ດຽວ​ກັນ ໄດ້​ຊຸກຍູ້​ເຮັດ​ໃຫ້ໂຄງການ​ລະດັບ​ຊາດ​ມີ​ຄວາມ​ຄືບ​ໜ້າ​ບັນລຸ​ເປົ້າ​ໝາຍ ເປັນຕົ້ນ ໂຄງການ​ປ່ອຍ​ດາວ​ທຽມ​ຂຶ້ນ​ສູ່​ວົງ​ໂຄຈອນ ໂຄງການ​ກໍ່ສ້າງ​ເສັ້ນທາງລົດໄຟ ລາວ-ຈີນ ປຸກລະດົມ​ຂົນຂວາຍ​ເອົາ​ການ​ຊ່ວຍເຫຼືອ​ຈາກລັດຖະບານ​ຈີນ ໃຫ້​ແກ່​ລັດ​ຖະບານ​ລາວ ​ອັນ​ພົ້ນ​ເດັ່ນ​ແມ່ນ​ໂຄງການ​ກໍ່ສ້າງ​ຕຶກ​ອາຄານ​ສຳນັກງານ​ສູນ​ກາງ​ພັກ ອາຄານ​ເຝີກອົບຮົມ​ສູນ​ກາງ​ແນວ​ລາວ​ສ້າງຊາດ ແລະ ໃຫ້​ທຶນ​ການ​ສຶກ​ສາແກ່​ນັກ​ສຶກ​ສາ​ລາວ ຈຳນວນ 6.900 ທຶນ ໃນ​ປີ 2015.

ຍ້ອນ​ເຫັນ​ໄດ້​ເຖິງ​ຄຸນ​ງາມຄວາມ​ດີ ແລະ ຜົນງານ​ອັນ​ດີເລີດດັ່ງກ່າວ ​ທ່ານ​ລັດຖະມົນຕີ​ໄດ້​ຕາງໜ້າ​ໃຫ້​ລັດຖະບານ​ລາວ ປະດັບຫຼຽນ​ໄຊ​ມິດຕະພາບ​ໃຫ້​ທ່ານ ກວນ ຫົວ​ປິງ ເພື່ອ​ເປັນ​ການ​ສະແດງ​ຄວາມ​ຂອບໃຈ ຄວາມ​ຮູ້​ບຸນຄຸນ ແລະ ຊົມເຊີຍ​ຜົນສຳເລັດຈາກ​ລັດຖະບານ ແລະ ປະຊາຊົນລາວ ຕໍ່​ການ​ປະ​ບັດ​ໜ້າທີ່​ວຽກງານ​ອັນ​ມີ​ກຽດ ແລະ ສູງ​ສົ່ງ​ຂອງທ່ານ​ທູດ

ພາບແລະຂ່າວ: ວຽງຈັນໃໝ່
ຕິດຕາມຂ່າວເສດຖະກິດລາວ ກົດໄລຄ໌ເລີຍ!