ແຫຼ່ງຂ່າວຕ່າງປະເທດລາຍງານ ເມື່ອວັນທີ 5 ສິງຫາ 2014 ຜ່ານມາວ່າ ມີເດັກຊາຍອາເມຣິກັນ ອາຍຸ 9 ປີ
ກໍ່ເຫດສຸດຊ໊ອກ ຍື່ນປືນໃຫ້ເດັກນ້ອຍຊາຍອາຍຸ 5 ປີ ໄປຍິງເດັກຍິງອາຍຸ 3 ປີ ຈົນບາດເຈັບສາຫັດ ໂດຍສາ
ລະພາບເປັນຄົນຍື່ນປືນໃຫ້ນ້ອງ ຫຼັງຈາກໄດ້ຮຽນຮູ້ວິທີການຖືປືນ ຈາກວີດີໂອເກມທີ່ມີເນື້ອຫາຮຸນແຮງ.
ເຫດການດັ່ງກ່າວເກີດຂຶ້ນໃນລັດໂຄໂລຣາໂດ ສະຫະລັດອາເມຣິກາ ເມື່ອວັນທີ 4 ສິງຫາທີ່ຜ່ານມາ ເມື່ອເດັກ
ຊາຍອາຍຸພຽງ 9 ປີ ໄດ້ເອົາປືນສັ້ນມາຫຼິ້ນຢູ່ໃນສະໜາມຫຍ້າຫຼັງເຮືອນຕົນເອງ ກ່ອນທີ່ຈະຍື່ນປືນດັ່ງກ່າວ
ໃຫ້ກັບເດັກຊາຍອາຍຸ 5 ປີ ທີ່ກຳລັງຫຼິ້ນຢູ່ນຳກັນ ຫຼັງຈາກນັ້ນເດັກນ້ອຍ 5 ປີຄົນດັ່ງກ່າວ ກໍໄດ້ຫັນປາຍປືນ
ໄປທີ່ເດັກຍິງອາຍຸ 3 ປີ ແລ້ວລັ່ນໄກປືນຍິງເດັກຍິງຄົນດັ່ງກ່າວ ຈົນໄດ້ຮັບບາດເຈັບສາຫັດ.
ຈາກເຫດການດັ່ງກ່າວນີ້ ໄດ້ເຮັດໃຫ້ເດັກຜູ້ເຄາະຮ້າຍ ຖືກນຳໂຕສົ່ງໂຮງໝໍຢ່າງຮີບດ່ວນທາງເຮລິຄັອບເຕີ້
ແລະ ນາງຖືກນຳໂຕເຂົ້າຫ້ອງຜ່າຕັດ ເພື່ອນຳເອົາລູກກະສຸນອອກທັນທີ ເຊິ່ງຕອນນີ້ອາການຢູ່ໃນຂັ້ນຊົງໂຕ
ໃນຂະນະທີ່ການສອບສວນຂອງເຈົ້າໜ້າທີ່ຕຳຫຼວດພົບວ່າ ເດັກຊາຍອາຍຸ 9 ປີ ຜູ້ນຳເອົາປືນອອກມາຫຼິ້ນນັ້ນ
ໄດ້ສາລະພາບໂດຍດີ ວ່າເຂົາຮຽນຮູ້ວິທີການຈັບປືນ ມາຈາກວີດີໂອເກມຕໍ່ສູ້ສົງຄາມ ເຊັ່ນ: Call of Duty ແລະ
ເກມ Black Ops ເຊິ່ງເປັນເກມທີ່ມີເນື້ອຫາຮຸນແຮງ ໃຊ້ປືນໄລ່ຍິງຝ່າຍກົງກັນຂ້າມຕະຫຼອດທັງເລື່ອງ.
ເຖິງຢ່າງໃດກໍດີ ເດັກຊາຍທັງ 2 ລາຍ ບໍ່ໄດ້ຖືກດຳເນີນຄະດີໃດໆ ແຕ່ຕຳຫຼວດມຸ່ງເອົາຄວາມຜິດກັບຜູ້ໃຫຍ່ທີ່
ຢູ່ໃນເຮືອນໃນຊ່ວງເວລາເກີດເຫດ ຂໍ້ຫາລະເລີຍການເບິ່ງແຍງລູກ ຈົນເຮັດໃຫ້ລູກຖືກຍິງຈົນບາດເຈັບສາຫັດ.