ໃນວັນທີ 5 ມັງກອນ 2017ຜ່ານມານີ້ ທີ່ໂຮງແລນມາກ ໄດ້ເປີດພິທີໂຄງການລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ ຂອງກົມສ່ວຍສາອາກອນ ກະຊວງການເງິນ ຮັບເໝົາໂຄງການໂດຍບໍລິສັດ LG CNS-HHI Consortium ໂດຍມີທ່ານ ອາດສະພັງທອງ ສີພັນດອນ ຮອງລັດຖະມົນຕີກະຊວງການເງິນ ທ່ານ Yang Kang Yoen ເອກອັກຄະລັດຖະທູດ ສ ເກົາຫຼີ ປະຈຳ ສປປ ລາວ ທ່ານ Woon Yeol Jeong ຮອງປະທານບໍລິສັດ LG CNS-HHI Consortium ພ້ອມດ້ວຍຄະນະນຳນັກທຸລະກິດ ແລະ ພາກສ່ວນກ່ຽວຂ້ອງສອງຝ່າຍເຂົ້າຮ່ວມ.
ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ໄດ້ຂຶ້ນລາຍງານໂຄງການພັດທະນາລະບົບຂໍ້ມູນຂ່າວສານ ຄຸ້ມຄອງລາຍຮັບສ່ວຍສາອາກອນ ໃຫ້ຮູ້ວ່າ: ໂຄງການດັ່ງກ່າວ ປະກອບມີ 2 ໜ້າວຽກໃຫຍ່ຄື: ວຽກພັດທະນາລະບົບຂໍ້ມູນຂ່າວສານດ້ານສ່ວຍສາອາກອນ ແມ່ນການສ້າງລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນແບບຄົບຊຸດ ລວມທັງການພັດທະນາຊຸດຄຳສັ່ງ ການແຈ້ງມອບລາຍຮັບ ການກວດສອບຫຼັງການແຈ້ງ ການປະເມີນຄາດຄະເນແຫຼ່ງລາຍຮັບ ການກຳນົດເລກປະຈຳຕົວຜູ້ເສຍອາກອນ ການເຊື່ອມຕໍ່ລະບົບຕ່າງໆຂອງກະຊວງການເງິນ ແລະ ຂະແໜງການອື່ນທີ່ກ່ຽວຂ້ອງຜ່ານທາງເອເລັກໂຕຣນິກ ແລະ ສ້າງສູນຂໍ້ມູນຂ່າວສານ (Data Center) ສ້າງສູນສຳຮອງຂໍ້ມູນ (Back Center) ເຊິ່ງເປັນຕຶກອາຄານ 6 ຊັ້ນ ຈະນຳໃຊ້ສຳລັບເກັບຖານຂໍ້ມູນ ການເຝິກອົບຮົມການບໍລິການຜູ້ເສຍອາກອນ ຫ້ອງການ ແລະ ຫ້ອງປະຊຸມ.
ການກໍ່ສ້າງໂຄງການນີ້ແມ່ນນຳໃຊ້ເງິນກູ້ຜ່ອນຜັນຂອງ Economic Devolvement and Cooperation Funds (EDCF) ຂອງລັດຖະບານ ສ ເກົາຫຼີ ມູນຄ່າເງິນກູ້ 28,5 ລ້ານໂດລາສະຫະລັດ ຫຼື ປະມານ 233 ຕື້ກວ່າກີບ ແລະ ທຶນສົມທົບຂອງລັດຖະບານລາວ 4 ລ້ານໂດລາ ຫຼື ປະມານ 32 ຕື້ກວ່າກີບ ລວມມູນຄ່າທັງໝົດ 32,5 ລ້ານໂດລາ ຫຼື ປະມານ 266 ຕື້ກວ່າກີບ ເຊິ່ງຈະມີການພັດທະນາລະບົບ ແລະ ທົດລອງການນຳໃຊ້ລະບົບ ຈະໃຊ້ເວລາປະມານ 18 ເດືອນ ສ່ວນການກໍ່ສ້າງພື້ນຖານໂຄງລ່າງ ຈະໃຊ້ເວລາ 24 ເດືອນ ຄາດວ່າການທົດລອງນຳໃຊ້ລະບົບ ແມ່ນຈະໄດ້ເລີ່ມກາງປີ 2018 ສ່ວນການປຸກສ້າງແມ່ນຈະສຳເລັດໃນຕົ້ນປີ 2019.
ແຫຼ່ງຂ່າວ: ໜັງສືພິມ ວຽງຈັນໃໝ່