ທ່ອງທ່ຽວກັບລາວໂພສຕ໌ ເລີ່ມຕົ້ນປີແບບນີ້ ເຮົາມາລົງໃຕ້ໄປທ່ຽວ ເມືອງ ສຸຂຸມາ ດິນແດນແຫ່ງບູຮານສະຖານທີ່ເກົ່າແກ່ໃນສະໃໝຍຸກຂອມ ກັນດີກວ່າ ເຊິ່ງສະຖານທີ່ທີ່ພວກເຮົາຈະນຳສະເໜີນີ້ແມ່ນ “ພຣະທາດສາມປາງ”
ພຣະທາດສາມປາງ ຕັ້ງຢູ່ເຂດ 4 ໂນນຍ່າງ, ເມືອງສຸຂຸມາ ຫ່າງຈາກເມືອງສຸຂຸມາ ໄປທາງຕາເວັນຕົກສ່ຽງເໜືອປະມານ 13 ກິໂລແມັດ, ຫ່າງຈາກເມືອງປາກເຊ ໄປທາງຕາເວັນຕົກສ່ຽງໃຕ້ປະມານ 72 ກິໂລແມັດ ແລະ ຫ່າງຈາກວັດພູປະມານ 21 ກິໂລແມັດ ເຊິ່ງມີເສັ້ນທາງເຂົ້າເຖິງຢ່າງສະດວກ.
ສະຖານທີ່ແຫ່ງນີ້ ຕັ້ງຢູ່ທົ່ງຮາບຫ້ວຍຂະໜວນ ເຊິ່ງ ເປັນສາຂາໜຶ່ງ ຂອງແມ່ນໍ້າຂອງ ໃນອະດີດ ຫ້ວຍນີ້ມີນໍ້າໄຫຼ່ຢູ່ຕະຫຼອດເຊິ່ງຄົນບູຮານໄດ້ໃຊ້ເປັນເສັ້ນທາງຂົນສົ່ງ ແລະ ໄປມາຫາສູ່ກັນ. ພ້ອມນີ້ຍັງມີເສັ້ນທາງບູຮານ ທີ່ໄດ້ເນັ່ງຈາກວັດພູ ໄປທາງໃຕ້ ຈົນເຖິງຊາຍແດນກຳປູເຈຍ ເຊິ່ງປັດຈຸບັນນີ້ ກໍຍັງສາມາດໄດ້ພົບເຫັນຢູ່ບາງຕອນ ແລະ ບາງຕອນກໍຖືກທຳລາຍໂດຍສະເພາະປະຊາຊົນທີ່ເຮັດໄຮ່, ເຮັດນາ, ປຸກເຮືອນຊານໃສ່ ແຕ່ກໍຍັງສາມາດສັນນິຖານໄດ້ວ່າແມ່ນ “ເສັ້ນທາງຄູບູຮານ”
ພຣະທາດສາມປາງແຫ່ງນີ້ມີທັງໝົດສາມໜ່ວຍຕັ້ງຮຽງກັນ ແລະ ເພິ່ນໄດ້ສັນນິຖານໄວ້ວ່າ: ພຣະທາດສາມປາງແຫ່ງນີ້ໄດ້ສ້າງຕັ້ງຂຶ້ນພ້ອມກັບວັດພູແຂວງຈໍາປາສັກ ເປັນສະຖາປັດຕະຍະກຳຫີນແບບຂອມບູຮານຕັ້ງຢູ່ບ້ານທາດສາມປາງນອນ ໃນທຸກໆປີເມື່ອເຖິງມື້ຂຶ້ນ 15 ຄໍ່າເດືອນ 2 ( ເດືອນຍີ່ ) ບັນດາຊາວບ້ານ,ຊາວເມືອງຈະມີການຈັດພິທີສະເຫຼີມສະຫຼອງພຣະທາດສາມປາງແຫ່ງນີ້ ເຊິ່ງຖືເປັນ ປະເພນີທີ່ໄດ້ສືບທອດກັນມາຫຼາຍປີ.
ພາບປະກອບ ແລະ ຂໍ້ມູນຈາກ: https://targetlaos.com/article/10919
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!