ໃນວັນທີ 22 ທັນວາ 2016 ຜ່ານມານີ້ ບໍລິສັດ ເບຍລາວຈໍາກັດ ໄດ້ມອບເງິນ 260.000.000 ກີບ ໃຫ້ກົມຕໍາຫລວດຈະລາຈອນ, ກະຊວງປ້ອງກັນຄວາມສະຫງົບ (ປກສ) ເພື່ອໃຊ້ເຂົ້າໃນກິດຈະກໍາ ໂຄສະນາໂຄງການ ປູກຈິດສໍານຶກ ດ້ານຄວາມປອດໄພ ທາງຖະໜົນ ພາຍໃຕ້ຫົວຂໍ້“ ດື່ມຢ່າງມີສະຕິຂັບຂີ່ປອດໄພ” ໂດຍຈະເລີ່ມຈັດຕັ້ງປະຕິບັດ ແຕ່ທ້າຍເດືອນທັນວາ 2016 ຫາ ທ້າຍເດືອນມີນາ 2017.
ພິທີມອບ-ຮັບດັ່ງກ່າວ, ໄດ້ຈັດຂຶ້ນທີ່ກົມໃຫຍ່ຕໍາຫລວດ, ລະຫວ່າງ ທ່ານ ສູນທອນ ພົມມະຈັກ ປະທານ ບໍລິສັດເບຍລາວ ຈໍາກັດ ແລະ ທ່ານ ພັນເອກ ຄໍາຖະຫວາຍ ເພັດອຸໄທ ຫົວໜ້າກົມຕໍາຫລວດຈະລາຈອນ ກະຊວງປ້ອງກັນຄວາມສະຫງົບ ໂດຍມີ ທ່ານ ພົນຈັດຕະວາ ທອງສະຫວັນ ວົງສະຫວັດ ຮອງຫົວໜ້າກົມໃຫຍ່ຕໍາຫລວດ, ກະຊວງ ປກສ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຄີພິຍານ
ໂຄງການດັ່ງກ່າວ, ຈະມີການຈັດສັນລະບຽບຕາມເສັ້ນທາງ, ສະຖານທີ່ຊຸມຊົນ ເຊິ່ງຈະມີການຈັດຕັ້ງ ຈຸນໍາໃຊ້ພາຫະນະກວດກາເຄື່ອນທີ່, ກວດກາການຈອດລົດສະຊາຍ ແລະ ສີ່ງກີດຂວາງຕາມເສັ້ນທາງ, ກວດຈັບຄວາມໄວເກີນຂອງພາຫະນະ ຕາມຈຸດອຸປະຕິເຫດເລື້ອຍໆ, ກວດກາທາດເຫລົ້າທາງລົມຫາຍໃຈຜູ້ຂັບຂີ້, ການຂົນສົ່ງ ຫລື ການກວດກາກໍ່ອາດຊະຍາກໍາ, ພ້ອມທັງເພີ່ມທະວີແນະນໍາ ລະບາຍການສັນຈອນໃນຕົວເມືອງ, ຕໍາຫລວດຈະລາຈອນນະຄອນຫລວງ, ແຂວງ ແລະ ເມືອງ ລົງເຮັດວຽກທີ່ແກ້ໄຂການຈະລາຈອນແອອັດ ແລະ ການກວດກາປະເມີນລະບຽບກົດໝາຍ ແລະ ອື່ນໆ.
ຂ່າວ: ສຳນັກຂ່າວສານປະເທດລາວ