ເຮືອບິນກອງທັບລັດເຊຍຫາຍໄປຈາກຈໍເລດ້າ ຫຼັງຈາກບິນຂຶ້ນຈາກເຂດອັດເລີ ໃນເມືອງໂຊຊີ ຂອງລັດເຊຍ ເມື່ອເວລາ 5:40 ຂອງວັນທີ 25 ທັນວາ 2016 ຕາມເວລາທ້ອງຖິ່ນ ໂດຍເທິງເຮືອບິນລຳດັ່ງກ່າວ ເຊິ່ງເປັນເຄື່ອງ ຕູ-154 ມີຜູ້ໂດຍສານຢູ່ 83 ຄົນ ແລະຈຸບິນອີກ 8 ຄົນ.
ຫຼ້າສຸດສຳນັກຂ່າວ ເອພີລາຍງານວ່າ ກະຊວງປ້ອງກັນປະເທດລັດເຊຍ ແຈ້ງເມື່ອວັນທີ 25 ທັນວາ 2016 ມື້ນີ້ວ່າ ພົບຊາກເຮືອບິນຂອງກອງທັບລັດເຊຍທີ່ຫາຍໄປຈາກຈໍເລດ້າມື້ເຊົ້ານີ້ແລ້ວ ໂດຍພົບຢູ່ໃນທະເລດຳ ໄກຈາກຝັ່ງເມືອງໂຊຊີຂອງລັດເຊຍປະມານ 1.5 ກິໂລແມັດ.
ສ່ວນສຳນັກຂ່າວອາໄອເອຂອງລັດເຊຍ ອ້າງເຖິງການເປີດເຜີຍຂອງແຫຼ່ງຂ່າວດ້ານຄວາມໝັ້ນຄົງຜູ້ໜຶ່ງເປີດເຜີຍວ່າ ຈາກຂໍ້ມູນເບື້ອງຕົ້ນຊີ້ໃຫ້ເຫັນວ່າ ເຮືອບິນປະສົບອຸບັດເຫດຕົກ ເນື່ອງຈາກເກີດການຂັດຂ້ອງທາງເທັກນິກ ແຕ່ຍັງບໍ່ມີການຢືນຢັນໃນລາຍງານດັ່ງກ່າວ.
ນອກຈາກນີ້ ອາໄອເອຍັງອ້າງກະຊວງປ້ອງກັນປະເທດລັດເຊຍວ່າ ເທິງເຮືອບິນລຳດັ່ງກ່າວອອກຈາກອັດເລີ ມີທະຫານແລະສະມາຊິກວົງດຸລິຍາງທະຫານ ຢູ່ເທິງເຮືອບິນ ເຊິ່ງຢູ່ລະຫວ່າງການບິນໄປຍັງຖານທັບອາກາດຂອງລັດເຊຍ ທີ່ເມືອງລາຕາເກຍ ປະເທດຊີເລຍ ເພື່ອໄປຈັດການສະແດງເນື່ອງໃນເທສະການປີໃໝ່ທີ່ກຳລັງຈະມາເຖິງ ນອກຈາກນີ້ຍັງມີນັກຂ່າວລັດເຊຍລວມຢູ່ 9 ຄົນພ້ອມ.
ທ່ານ ດະມິທຣີ ເປສຄອຟ ໂຄສົກທຳນຽບປະທານາທິບໍດີລັດເຊຍແຈ້ງວ່າ ທ່ານ ວະລາດິເມຍ ປູຕິນ ປະທານາທິບໍດີລັດເຊຍ ໄດ້ຮັບແຈ້ງສະຖານະການທີ່ເກີດຂຶ້ນແລ້ວ ແລະຄອຍຕິດຕາມຂໍ້ມູນການຄົ້ນຫາຢ່າງໃກ້ຊິດ.
