ວັນທີ 23 ທັນວາ ປີ 1997 ຫຼືມື້ນີ້ເມື່ອ 19 ປີທີ່ແລ້ວ ເປັນມື້ວາງຈຳໜ່າຍຂອງເກມ Gran Turismo (GT) ເທິງເຄື່ອງ PS1 ທີ່ປະເທດຍີ່ປຸ່ນ. ໂດຍ GT ເປັນຊີຣີທີ່ບຸກເບີກເກມແຂ່ງລົດແນວໃໝ່ທີ່ເອີ້ນວ່າ: Driving Simulation ເຊິ່ງຜູ້ຫຼິ້ນຈະສາມາດປັບແຕ່ງລົດທີ່ໃຊ້ແຂ່ງໄດ້ດ້ວຍຕົນເອງ ແລະການປັບແຕ່ງໃນແຕ່ລະສ່ວນຂອງລົດກໍຈະອີງຕາມຫຼັກການຟີສິກ ແລະກົນສາດ ຫຼາຍກວ່າເກມແຂ່ງລົດອື່ນໆໃນຊ່ວງເວລານັ້ນ, ທັງນີ້ GT ຍັງເປັນອີກເກມ Exclusive ທີ່ພັດທະນາໂດຍ Sony Computer Entertainment (SCE) ອີກນຳ.
ຂັ້ນຕອນການພັດທະນາເກມ GT ໄດ້ໃຊ້ເວລາດົນເຖິງ 5 ປີເຕັມໆ, ໂດຍທ່ານ Kazunori Yamauchi (ຄາຊຶໂນຣິ ຢາມາອຸຈິ) ດີຊາຍເນີ້ຂອງເກມໄດ້ໃຫ້ສຳພາດວ່າແຜນການພັດທະນາເກມ Gran Turismo ໄດ້ເລີ່ມຂຶ້ນໃນຊ່ວງເຄິ່ງປີ 1992 ແລະບຸກຄະລາກອນໃນຕອນເລີ່ມພັດທະນາມີພຽງປະມານ 7-15 ຄົນເທົ່ານັ້ນ ແລະທຸກຄົນຕ່າງກໍຮ່ວມມືກັນເຮັດວຽກໝົດມື້ໝົດຄືນ ແບບທີ່ເວົ້າໄດ້ວ່າໂຕທ່ານຢາມາອຸຈິເອງໄດ້ກັບເຮືອນພຽງປີລະ 4 ມື້ເທົ່ານັ້ນ, ແຕ່ເມື່ອເກມສຳເລັດແລ້ວ ຜົນລັບທີ່ອອກມາທັງດ້ານຍອດຂາຍ ແລະຄຳວິຈານນັ້ນຖືວ່າກາຍເປົ້າໝາຍໄປຢ່າງຂາດລອຍ. ນອກຈາກນີ້ ທ່ານຢາມາອຸຈິ ຍັງເສີມອີກວ່າ ເກມ GT ພາກທຳອິດນີ້ໄດ້ດຶງພະລັງກຣາບຟິກຂອງເຄື່ອງ PS1 ອອກມາໄດ້ປະມານ 75% ຈົນມາຮອດ GT2 ຈຶ່ງສາມາດດຶງພະລັງເຄື່ອງ PS1 ອອກມາໄດ້ຈົນສຸດ.
ສຳລັບລົດທີ່ມີໃຫ້ເລືອກໃຊ້ໃນ GT ຈະມີຢູ່ທັງໝົດ 172 ຄັນ ໂດຍມາຈາກຜູ້ຜະລິດ 11 ລາຍ ແລະມີສະໜາມແຂ່ງໃຫ້ປະລອງຄວາມໄວທັງໝົດ 11 ສະໜາມ ເຊິ່ງຈະມີໂໝດໃຫ້ຫຼິ້ນຢູ່ 2 ໂໝດຫຼັກໆໄດ້ແກ່: ໂໝດອາເຂດ ແລະໂໝດຊິມູເລຊັ່ນ (ສຳລັບເວີຊັ່ນທີ່ວາງຈຳໜ່າຍໃນທະວີບຢຸໂຣບຈະປ່ຽນຊື່ໂໝດຊິມູເລຊັ່ນເປັນ Gran Turismo Mode) ເຊິ່ງໃນໂໝດຊິມູເລຊັ່ນນີ້ ຜູ້ຫຼິ້ນຈະຕ້ອງເຮັດການເສັງໃບຂັບຂີ່ດ້ວຍການຜ່ານການທົດສອບໃນຮູບແບບຕ່າງໆ ແລະທົວນາເມັ້ນທີ່ມີໃຫ້ເລືອກແຂ່ງໃນໂໝດຊິມູເລຊັ່ນຈະຕ້ອງການລະດັບຂອງໃບຂັບຂີ່ທີ່ແຕກຕ່າງກັນໄປ ເມື່ອຊະນະໃນແຕ່ລະລາຍການກໍຈະໄດ້ເງິນລາງວັນເພື່ອນຳໄປຊື້ລົດຫຼືອຸປະກອນແຕ່ງລົດໃຫ້ມີຄວາມແຮງຂຶ້ນໄດ້.
Fact ເລັກນ້ອຍກ່ຽວກັບເກມ Gran Turismo
- ບໍ່ເຊື່ອກໍຕ້ອງເຊື່ອວ່າ GT ພາກທຳອິດນີ້ເປັນເກມທີ່ເຮັດຍອດຂາຍສູງສຸດອັນດັບ 1 ຂອງເຄື່ອງ PS1 ເວົ້າໄດ້ວ່າແຊງທັງ Final Fantasy VII, Final Fantasy VIII ຫຼື Resident Evil ເລີຍ, ໂດຍສາມາດເຮັດຍອດຂາຍລວມທັງໝົດໄດ້ 10.85 ລ້ານຊຸດ ແລະເປັນພາກທີ່ຂາຍດີທີ່ສຸດຂອງຊີຣີ.
- Eiffel 65 ວົງດົນຕີຈາກເມືອງຕູຣິນ ປະເທດອີຕາລີ ເຄີຍພັນລະນາເຖິງຄວາມສຸດຍອດຂອງເກມ GT ໄວ້ໃນເນື້ອເພງ My Console ຖ້າຫາກໃຜທີ່ມີໃຈຮັກໃນຊີຣີ Gran Turismo ກໍໜ້າຈະລອງເຂົ້າໄປຟັງເບິ່ງກັນເດີ້
- ຄຳວ່າ Gran Turismo ເປັນພາສາອີຕາລີ ມີຄວາມໝາຍຕາມພາສາອັງກິດວ່າ: Grand Touring ທີ່ກ່າວເຖິງການແຂ່ງລົດຫຼູທີ່ມີຄວາມແຮງສູງໃນດ້ານຄວາມໄວແລະແລ່ນທາງໄກໄດ້ດີ ແລະລົດສ່ວນໃຫຍ່ທີ່ໃຊ້ແຂ່ງຈະເປັນແບບ 2 ປະຕູທີ່ມີ 2 ບ່ອນນັ່ງນັ້ນເອງ (ບາງຄັນອາດເປັນ 2 ປະຕູ ມີ 4 ບ່ອນນັ່ງ)
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: online station