ຕາມການລາຍງານຂອງສຳນັກຂ່າວເອເອຟພີ ເມື່ອວັນທີ 20 ທັນວາ 2016 ຜ່ານມາວ່າ ສະຖານະການເຕືອນໄພຂັ້ນສູງສຸດຈາກໝອກຄວັນພິດທີ່ປົກຄຸມນະຄອນຫຼວງປັກກິ່ງ ແລະພື້ນທີ່ດັ່ງກ່າວອີກ 20 ເມືອງຂອງພາກຕາເວັນອອກສ່ຽງເໜືອຂອງຈີນ, ສະະຖານະການຍັງບໍ່ດີຂຶ້ນ ເຖິງແມ່ນຈະເຂົ້າວັນທີ 5 ແລ້ວ, ຍັງສົ່ງຜົນກະທົບຕໍ່ຖ້ຽວບິນລະຫວ່າງປະເທດຍົກເລີກກວ່າ 217 ຖ້ຽວບິນ, ລວມເຖິງການສັນຈອນດ້ວຍລົດ ແລະລະບົບຂົນສົ່ງທາງລາງ ຕ້ອງຢຸດພັກ ເພາະຄວັນພິດໜາ ຈົນບໍ່ສາມາດເບິ່ງເຫັນເສັ້ນທາງໄດ້
ນະຄອນເຈຍຈວງ ເມືອງເອກມົນທົນເຫີເປ່ຍ ເປັນໜຶ່ງພື້ນທີ່ ທີ່ສະຖານະການຄວັນພິດຮ້າຍແຮງທີ່ສຸດ ເຊິ່ງທ່າອາກາດຍານ ຕ້ອງປິດບໍລິການຊົ່ວຄາວ ເພາະເຄື່ອງບິນບໍ່ສາມາດຂຶ້ນລົງໄດ້, ຂະນະທີ່ປະລິມານຝຸ່ນລະອອງປະເພດ ພີເອັມ 2.5 ທີ່ເປັນອັນຕະລາຍຕໍ່ມະນຸດ ຂຶ້ນເຖິງລະດັບ 844 ເຊິ່ງສູງກວ່າປະລິມານສູງສຸດ ທີ່ທາງອົງການອະນາໄມໂລກ ກຳນົດໄວ້ເຖິງ 34 ເທົ່າ.
ສະຖານະການນະຄອນຫຼວງປັກກິ່ງ ບັນດາຕຶກສູງຕ່າງໆ ປາກົດຢູ່ທ່າມກາງໝອກສີເຫຼືອງນໍ້າຕານ ເຮັດໃຫ້ທາງການຈີນຕ້ອງປິດຖະໜົນມໍເຕີເວ ເພື່ອຄວາມປອດໄພ ທາງສະຖານເອກອັກລາຊະທູດສະຫະລັດອາເມລິກາໃນພື້ນທີ່ເປີດເຜີຍວ່າ ປະລິມານຝຸ່ນລະອອງປະເພດ ພີເອັມ 2.5 ໃນນະຄອນປັກກິ່ງຢູ່ທີ່ 400 ເຊິ່ງທາງລົດໄຟຖືກຈຳກັດຄວາມໄວ ແລະ 34 ຂະບວນຕ້ອງຢຸດແລ່ນ