ຊາວບ້ານໃນເມືອງອີຣ໌ຄຸຕສ ແຄວ້ນໄຊບີເຣຍ ປະເທດຣັດເຊຍ ຈໍານວນກວ່າ 55 ຄົນເສຍຊີວິດຈາການດື່ມຜະລິດຕະພັນນໍ້າມັນອາບນໍ້າທີ່ມີສ່ວນປະສົມຂອງແອວກໍຮໍແທນເຫຼົ້າ ເນື່ອງຈາກມີລາຄາຖືກກວ່າ ແລະມີ 13 ຄົນຢູ່ໃນອາການໜັກ.
ອີງຕາມສໍານັກຂ່າວຕ່າງປະເທດລາຍງານວັນທີ 21 ທັນວານີ້ວ່າ: ເຈົ້າໜ້າທີ່ທ້ອງຖິ່ນໃນເມືອງອີຣ໌ຄຸຕສ ແຄວ້ນໄຊບີເຣຍ ປະເທດຣັດເຊຍ ໄດ້ເຂົ້າກວດຄົ້ນບ້ານ ຫຼືເຮືອນປະຊາຊົນແບບຫຼັງຕໍ່ຫຼັງ ເພື່ອຄົ້ນຫາຫຼັກຖານເພີ່ມເຕີມ ພ້ອມທັງປະກາດສະຖານະການສຸກເສີນ ເມື່ອວັນທີ 19 ທັນວາ ທີ່ຜ່ານມາ ຂະນະລັດຖະບານຣັດເຊຍຮຽກຮ້ອງໃຫ້ເພີ່ມຄວາມເຂັ້ມຂຸ້ນດ້ານກົດລະບຽບຂອງຕະຫຼາດແອວກໍຮໍ.
ເນື່ອງຈາກມີຊາວບ້ານຈໍານວນຫຼາຍພາກັນດື່ມຜະລິດຕະພັນນໍ້າມັນສໍາຫຼັບອາບນໍ້າທີ່ມີຊື່ວ່າ Boyaryshnik (Hawthorn) ຂອງປອມ ທີ່ມີສ່ວນປະສົມຂອງເມທານອລ ຫຼືແອວກໍຮໍ ຊຶ່ງເປັນພິດແທນເຫຼົ້າ ທັງຍັງມີລາຄາຖືກ ໂດຍຫວັງວ່າຈະໃຫ້ຄວາມຮູ້ສຶກຄືກັບການດື່ມເຫຼົ້າຈົນເປັນເຫດໃຫ້ເສຍຊີວິດແລ້ວຫຼາຍສິບຄົນ.
ຕາມການລາຍງານລະບຸວ່າ ຫຼັງເກີດເຫດເຈົ້າໜ້າທີ່ອອກກວດຄົ້ນຕະຫຼາດຫຼາຍແຫ່ງ ທີ່ເປັນແຫຼ່ງຂາຍຜະລິດຕະພັນປອມດັງກ່າວ ພ້ອມທັງຢຶດຂອງແຫຼວເປັນພິດລວມ 500 ລິດ ຈາກຮ້າຄ້າເກືອບ 100 ແຫ່ງໄວ້ກວດສອບ ແລະຈັບກຸມປະຊາຊົນ 7 ຄົນ ທີ່ສົງໄສວ່າເປັນຜູ້ຈໍາໜ່າຍຜະລິດຕະພັນນີີ້ ໂດຍເຈົ້າໜ້າທີ່ເຜີຍວ່າ ທີ່ເຈ້ຍຕິດຂ້າງແກ້ວຜະລິດຕະພັນດັງກ່າວມີຂໍ້ຄວາມລະບຸໄວ້ຊັດເຈນວ່າ ບໍ່ເໝາະສໍາຫຼັບດື່ມ ແຕ່ເນື້ອຫາດ້ານໃນກັບຂຽນລະບຸພຽງວ່າມີສ່ວນປະສົມຂອງເອທານອລ ຫຼືເອທິລແອວກໍຮໍ ຊຶ່ງເປັນແອວກໍຮໍຊະນິດໜຶ່ງເທົ່ານັ້ນ
ທັງນີ້ ການບໍລິໂພກເຫຼົ້າຕົ້ມກັ່ນຕອງເອງ ແລະຜະລິດຕະພັນພື້ນບ້ານປະສົມແອວກໍຮໍ ໄດ້ຮັບຄວາມນິຍົມແຜ່ຫຼາຍທົ່ວຣັດເຊຍ ໃນຖານະທາງເລືອກລາຄາຖືກຂອງເຫຼົ້າຍີ່ຫໍ່ມາດຕະຖານ ແຕ່ກໍເປັນສາເຫດການເສຍຊີວິດຂອງຜູ້ດື່ມເປັນຈໍານວນຫຼາຍເຊັ່ນກັນ.