ອີງຕາມສໍານັກຂ່າວຕ່າງປະເທດລາຍງານໃນວັນທີ 20 ທັນວາຜ່ານມາວ່າ: ເມື່ອຕອນເຊົ້າຂອງວັນທີ 16 ທັນວາທີ່ຜ່ານມາ ຕາມເວລາທ້ອງຖິ່ນ ເຈົ້າໜ້າທີ່ຕໍາຫຼວດໃນນິວຢອກ ສະຫະລັດອະເມລິກາ ໄດ້ຮັບແຈ້ງວ່າມີຄົນພົບເຫັນຍິງຊະລາຄົນໜຶ່ງກໍາລັງຈະແຂງຕາຍຢູ່ໃນລົດ ທີ່ເມືອງແມນຮັດຕັນ ຫຼັງຈາກເຈົ້າໜ້າທີ່ຕໍາຫຼວດຮອດຈຸດເກີດເຫດກໍພົບວ່າ ຍິງຊະລາຄົນດັ່ງກ່າວໃສ່ໜ້າກາກອອກຊິເຈນ ນັ່ງນິ້ງໂຕແຂງບໍ່ເໜັງບໍ່ຕີງ ລັກສະນະທ່າທາງຄືກໍາລັງຈະແຂງຕາຍຢູ່ໃນລົດທີ່ດັບເຄື່ອງໄວ້ ແລະຖືກປົກຄຸມໄປດ້ວຍຫິມະ.
ເຈົ້າໜ້າທີ່ຕໍາຫຼວດໄດ້ຮີບທຸບແວ່ນລົດເພື່ອເຂົ້າຊ່ວຍເຫຼືອທັນທີ ແຕ່ພໍເປີດປະຕູລົດໄດ້ ເຈົ້າໜ້າທີ່ເຖິງກັບເວົ້າບໍ່ອອກບອກບໍ່ຖືກ ບໍ່ຮູ້ວ່າຈະຫົວ ຫຼືຊິຮ້ອງໄຫ້ດີ ເພາະຍິງຊະລາທີ່ເຫັນນັ້ນເປັນພຽງຫຸ່ນຈໍາລອງ ສໍາຫຼັບໃຊ້ຝຶກອົບຮົມການແພດເທົ່ານັ້ນ.
ທັງນີ້ ເຈົ້າໜ້າທີ່ຕໍາຫຼວດໄດ້ຕິດຕໍ່ຫາເຈົ້າຂອງລົດທີ່ຖືກທຸບແວ່ນຄັນດັງກ່າວແລ້ວ ພ້ອມທັງອອກມາເຕືອນເຖິງຄົນທີ່ມີຫຸ່ນຈໍາລອງຄືຄົນແທ້ເຫຼົ່ານີ້ ວ່າຄວນໃຫ້ຄວາມສົນໃຈ ເພາະຫາກໃນລົດມີຫຸ່ນຈໍາລອງດັງກ່າວ ພວກເຂົາອາດຈະຕ້ອງທຸບແວ່ນລົດ ເພື່ອເຂົ້າຊ່ວຍເຫຼືອຫຸ່ນເຫຼົ່ານັ້ນໄດ້ ເນື່ອງຈາກລັກສະນະຂອງຫຸ່ນຈໍາລອງດັງກ່າວຄືຄົນແທ້ ບໍ່ວ່າຈະເປັນຜິວພັນ, ໃບໜ້າ, ເສັ້ມຜົມ, ແວ່ນຕາ ແລະອື່ນໆ.