ສຳນັກຂ່າວຕ່າງປະເທດ ລາຍງານໃນວັນທີ 17 ທັນວາຜ່ານມານີ້ວ່າ ກະຊວງການຕ່າງປະເທດ ສະຫະລັດອາເມຣິກາ ໄດ້ອອກມາຖະແຫລງ ໃນວັນສຸກທີ 16 ທັນວາຜ່ານມາ ໂດຍປະກາດມອບເງິນລາງວັນ ຈຳນວນ 25,000,000 ໂດລາສະຫະລັດຯ ເປັນຄ່າຫົວສຳລັບການນຳຈັບ ທ້າວ ອາບູ ບາຄາ ອັນ-ບັກດາດີ ຫົວໜ້າກຸ່ມລັດອິດສະລາມ ຫລື ໄອເອັສ, ການປະກາດລາງວັນນຳຈັບໃນຄັ້ງນີ້ ໄດ້ເພີ່ມຂຶ້ນກວ່າ 2 ເທົ່າ ຫລັງຈາກທີ່ໃນປີ 2011 ກະຊວງການຕ່າງປະເທດອາເມຣິກາ ໄດ້ປະກາດລາງວັນເບື້ອງຕົ້ນ 10,000,000 ໂດລາສະຫະລັດຯ ສຳລັບຂໍ້ມູນທີ່ນຳໄປສູ່ທີ່ຢູ່, ການຈັບກຸມ ຫລື ພິສູດການກະທຳຜິດຂອງ ອັນ-ບັກດາດີ ໄດ້.
ທັງນີ້ ເຈົ້າໜ້າທີ່ສະຫະລັດອາເມຣິກາ ໄດ້ລະບຸຕະຫລອດມາວ່າ ອັນ-ບັກດາດີ ຄືສັດຕູໝາຍເລກ 1 ໃນການຕໍ່ສູ້ກັບກຸ່ມໄອເອັສ ໂດຍທີ່ຢູ່ຂອງເຂົາ ຍັງຄົງເປັນປິດສະໜາຈົນຮອດທຸກມື້ນີ້, ແຕ່ໃນເດືອນຕຸລາປີ 2015 ຜ່ານມາ ກອງທັບອີຣັກ ໄດ້ເຄີຍອອກມາອ້າງວ່າ ພວກເຂົາໄດ້ໂຈມຕີທາງອາກາດ ແລະ ຖືກຂະບວນລົດຂອງ ອັນ-ບັກດາດີ ໃນແຂວງອັນບາ ປະເທດອີຣັກ ແລະ ມີລາຍງານອີກວ່າ ຜູ້ນຳກຸ່ມໄອເອັສລາຍນີ້ ໄດ້ຮັບບາດເຈັບຈາກເຫດການດັ່ງກ່າວ.
ຕິດຕາມເຮົາທາງFacebook ກົດຖືກໃຈເລີຍ!