ເພື່ອ​ແນ່​ໃສ່​ເຮັດ​ໃຫ້ ການ​ຄົມມະນາຄົມ-ຂົນ​ສົ່ງ ຂອງ​ສອງ​ປ​ະ​ເທດ ລາວ-ຫວຽດນາມ ສາມາດ​ເຊື່ອມ​ໂຍງ​ເຂົ້າກັນ​ໄດ້ ​ແລະ ​ເປັນ​ເງື່ອນ​ໄຂ​ອັນ​ດີ ​ໃນ​ການຂະຫຍາຍການຄ້າ, ການລົງທຶນ ແລະ ການທ່ອງທ່ຽວ ລະຫວ່າງ 2 ປະເທດ, ພ້ອມ​ທັງ​ເປັນ​ພາກ​ສ່ວນ​ໜຶ່ງໃນແຜນການພັດທະນາລາວ ໃຫ້ເປັນສູນກາງຂອງການເຊື່ອມຈອດ ດ້ານຄົມມະນາຄົມ-ຂົນສົ່ງ ໃນລຸ່ມແມ່ນ້ຳຂອງ, ​ເມື່ອບໍ່​ດົນ​ມາ​ນີ້ ໄດ້​ມີ​ກອງ​ປະຊຸມພົບ​ປະ​ສອງ​ຝ່າຍ ລະຫວ່າງ ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງໂຍທາ​ທິການ ​ແລະ ຂົນ​ສົ່ງ ​ແຫ່ງ ສປປ ລາວ ພ້ອມ​ດ້ວຍ​ຄະນະ ແລະ ທ່ານ ​ເຈືອງ ກວາງ ​ເງ້ຍ ລັດຖະມົນຕີກະຊວງ​ໂຍທາ​ທິການ-ຂົນ​ສົ່ງ ​ແຫ່ງ ສສ ຫວຽດນາມ ພ້ອມ​ດ້ວຍ​ຄະນະ,​ ​ເຊິ່ງ​ຝ່າຍ​ລາວ​ ​ໄດ້​ລາຍ​ງານການ​ເຊັນ​ເອກະສານ 2 ສະບັບ​ຄື: ຂໍ້​ຕົກລົງ​ວ່າ​ດ້ວຍ ​​ແຜນການ​ຮ່ວມ​ມື​ ດ້ານ​ຄົມມະນາຄົມ-ຂົນ​ສົ່ງ ລາວ-ຫວຽດນາມ ​ໄລຍະ 5 ປີ (2016-2020) ​ແລະ ຂໍ້ຂໍ້​ຕົກລົງ​ວ່າ​ດ້ວຍ​​ ການ​ລົງທຶນ​ກໍ່ສ້າງ​ເສັ້ນທາງ​ດ່ວນ ​ວຽງ​ຈັນ​-ຮ່າ​ໂນ້ຍ.

ກອງ​ປະຊຸມ​ດັ່ງກ່າວ, ​ເປັນ​ການສືບຕໍ່ຈັດຕັ້ງຜັນຂະຫຍາຍ ບົດບັນທຶກສອງ​ລັດຖະບານ ລາວ-ຫວຽດນາມ ກ່ຽວກັບຍຸດທະສາດ ການຮ່ວມມື ດ້ານຄົມມະນາຄົມ-ຂົນສົ່ງ ໄລຍະແຕ່ປີ 2016-2025, ວິ​ໄສທັດຮອດປີ 2030, ທົບທວນການຈັດຕັ້ງປະຕິບັດ ບັນດາໂຄງການທີ່ສອງກະຊວງ ກໍຄືສອງຂະແໜງການຄົມມະນາຄົມ-ຂົນສົ່ງ ທີ່ໄດ້ຕົກລົງນຳກັນຜ່ານມາ, ລວມທັງແຜນການຮ່ວມມືໃນຕໍ່ໜ້າ ຈຸດປະສົງຕົ້ນຕໍຂອງການພົບປະລະຫວ່າງສອງກະຊວງ ໃນຄັ້ງນີ້ ແມ່ນເພື່ອສຸມໃສ່ຜັນຂະຫຍາຍເນື້ອໃນ ການຕົກລົງຮ່ວມມື ລະຫວ່າງສອງລັດຖະບານ ລາວ-ຫວຽດນາມ ໃຫ້ປະກົດຜົນເປັນຈິງ.

ສະ​ເພາະໂຄງການກໍ່ສ້າງເສັ້ນທາງດ່ວນ ນະຄອນຫລວງວຽງຈັນ-ນະຄອນຫລວງຮ່າໂນ້ຍ ທີ່​ຈຳ​ເປັນ​ຕ້ອງ​ໄດ້​ສຸມ​ກຳລັງ​ແຮງ​ໃນ​ຫລາຍ​ດ້ານ​ຮ່ວມ​ກັນ​ທັງ​ສອງ​ຝ່າຍ ​ເພື່ອ​ໃຫ້ສາມາດຈັດ​ຕັ້ງ​ປະຕິບັດ​ໂຄງການດັ່ງກ່າວ ໃຫ້ປະກົດຜົນເປັນຈິງ; ​ແລວ​ທາງ​ດ່ວນ​ເຊື່ອມ​ຕໍ່ ວຽງ​ຈັນ-ປາກ​ຊັນ-ນ້ຳ​ອ່ອນ-​ແທັງ​ຖຸຍ-ຮ່າ​ໂນ້ຍ; ໂຄງການກໍ່ສ້າງ​ເສັ້ນທາງແຕ່ພູທິດເຜິ້ງຫານາຊອນ; ໂຄງການກໍ່ສ້າງເສັ້ນທາງ ແຕ່ຊຳໃຕ້-ທ່າເຫລົ້າ ແລະ ນາຊາງ-ທົ່ງທູ້ ແຂວງຫົວພັນ; ຂໍ້ສະເໜີໂຄງການຍົກລະດັບ ແລະ ປັບປຸງທາງຫລວງເລກທີ 18B ຂອງອຳນາດການປົກຄອງ ແຂວງອັດຕະປື (ລາວ) ແລະ ຄະນະກຳມະການປະຊາຊົນແຂວງກອນຕູມ (ຫວຽດນາມ); ສະໜາມບິນໜອງຄ້າງ ແຂວງຫົວພັນ;​ ຂໍ້ສະເໜີຂອງ ບໍລິສັດ ຫວຽດເຈັດແອ ເພື່ອດຳເນີນທຸລະກິດການບິນ ຢູ່ ສປປ ລາວ; ການສົ່ງເສີມບໍລິສັດຂອງທັງສອງຝ່າຍຮ່ວມທຸລະກິດການຂົນສົ່ງສິນຄ້າຮ່ວມກັນ, ການເປີດ​ເສັ້ນທາງຂົນ​ສົ່ງ​ໂດຍສານ ​ປະຈຳ​ທາງຮ່າຕິ້ງ (ສສ ຫວຽດ ນາມ) – ຄຳ​ມ່ວນ (ສປປ ລາວ) – ນະຄອນ​ພະນົມ (ປະ​ເທດ​ໄທ) ​ແລະ​ ກັບຄືນ; ການ​ຊຸກ​ຍູ້​ສົ່ງ​ເສີມ​ໃຫ້​ບັນດາ​ດ່ານ​ຊາຍ​ແດນ ລາວ-ຫວຽດນາມ ​ເພີ່​ມຊົ່ວ​ໂມງ​ເຮັດ​ວຽກຂຶ້ນ​ຕື່ມ; ການ​ບໍລິການ ”ຈຸດ​ດຽວ, ປອງ​ດຽວ” ທີ່​ດ່ານ​ຊາຍ​ແດນ ​ແດນ​ສະຫວັນ-ລາວ​ບາວ; ກາ​ນຕິດຕາມ​ວຽກ​ງານ​ຄຸ້ມ​ຄ້ອງທ່າເຮືອຫວຸ້ງອ່າງ ແຂວງຮ່າຕິ້ງ, ສສ ຫວຽດນາມ; ການ​ປັບປຸງ​ແຜນຜັງ​ແມ່​ບົດ​ ຂອງ​ທ່າ​ເຮືອ​ຮອນ​ລາ ​ແລະ ລະບົບທໍ່​ສົ່ງ​ນ້ຳມັນ ​ແຕ່​ແຂວງ​ກວາງ​ບິງ-​ແຂວງ​ຄຳ​ມ່ວນ ​ແລະ ການສ້າງຂີດຄວາມສາມາດ ໃຫ້ແກ່ບຸກຄະລາກອນຂອງຂະແໜງການໂຍທາທິການ ແລະ ຂົນສົ່ງ ສປປ ລາວ.

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!